Tou Tui Mālohi Mokā Tou Faka Mafola Te Logo Lelei
1 ʼI te kamata ʼo te ʼuluaki sēkulō, neʼe fakatotonu e Sesu ki tana kau tisipulo ke nātou faka mafola te logo lelei ʼo te Puleʼaga, pea mo “fakahoko he u tisipulo i te atu puleaga.” (Mat. 24:14; 28:19, 20) ʼE maʼuhiga ki te kau Fakamoʼoni ʼa Sehova tana fakatotonu ʼaia, koia ʼo aʼu ki te fakaʼosi ʼo te 20 sēkulō, kua tuputupu totatou famili fakatautehina Kilisitiano ʼo aʼu ki te toko 5 900 000 tupu kau tisipulo ia fenua e 234. ʼE ko he toe fakavikiviki lahi ʼaia ki totatou Tāmai ʼi selo!
2 Kua tou hū nei ki te 21 sēkulō. ʼAki he ʼu aga fakakākā, ʼe faiga e totatou Fili ke ina fakagata tatatou gāue maʼuhiga ʼaē ko te faka mafola ʼo te Puleʼaga pea mo te fai ʼo ni ʼu tisipulo. ʼE ina fakaʼaogaʼi te ʼu fakaneke ʼo te mālama ʼaenī moʼo fakahēʼi tatou, ke puli totatou temi pea mo tatatou mālohi ki he ʼu tuʼuga meʼa ʼe mole maʼuhiga. ʼAua naʼa tou tuku ke fakatuʼutuʼu e te tuʼu ʼaenī te ʼu meʼa ʼaē ʼe tonu ke maʼuhiga ʼi totatou maʼuli, kae ke tou ʼiloʼi papau ʼaki te Folafola ʼa te ʼAtua, ko te meʼa ʼaē ʼe maʼuhiga ʼaupito—ʼe ko te fai ʼo te finegalo ʼo Sehova. (Loma 12:2) Ko tona faka ʼuhiga ke tou fakalogo ki te fakaloto mālohi ʼaē ʼe fai mai e te Tohi-Tapu, ke tou ‘faka mafola te folafola, ʼi te temi faigamālie pea mo te temi faigataʼa, pea ke katoa totatou minisitelio.’—2 Tim. 4:2, 5.
3 Tou Maʼu He Tui Mālohi: ʼE ʼaoga ki te kau Kilisitiano “ke [nātou] katoa pea mo [nātou] tui papau ʼo ʼuhiga mo te finegalo katoa ʼo te ʼAtua.” (Kol. 4:12, MN) Ko te kupu “tui” ko tona faka ʼuhiga ʼe ko he “tui mālohi ki he meʼa, peʼe ko te tui pau ʼa he tahi” ki he meʼa. ʼI totatou ʼuhiga Kilisitiano, ʼe tonu ke tou tui mālohi ʼe hoko moʼoni anai te ʼu lea faka polofeta ʼa te ʼAtua pea kua tou fakaōvi lahi ki te temi ʼo te fakaʼosi. ʼE tonu ke mālohi totatou tui ohage ko te ʼapositolo ko Paulo, ʼaē neʼe ina ʼui fēnei ko te logo lelei ʼe “ko te Mafimafi o te Atua ki te fakamauli o te hahai tui fuape.”—Loma 1:16.
4 ʼE fakaʼaogaʼi e te Tevolo te ʼu hahaʼi agakovi pea mo kākā ʼaē kua fakahēʼi, ke nātou fakaneke pea mo fakahalaʼi te hahaʼi. (2 Tim. 3:13) Kua fakatokagaʼi te faʼahi ʼaia kia tatou, koia ʼe tou fai anai he ʼu fakatuʼutuʼu moʼo fakamālohiʼi totatou tui ʼaē kua tou maʼu te moʼoni. ʼE mole tou tuku anai ki te ʼu tuʼania ʼo te maʼuli ke nātou fakavaivaiʼi tatatou gāue lahi, kae ʼe tou haga fakamuʼamuʼa anai te Puleʼaga. (Mat. 6:33, 34) ʼE mole tonu ke galo kia tatou te maʼuhiga ʼo te temi, pea ke ʼaua naʼa tou manatu ʼe kei mamaʼo te ʼaho ʼo te fakaʼosi ʼo te tuʼu ʼaenī, he kua ōvi ʼaupito mai. (1 Pet. 4:7) Tatau aipe peʼe tou manatu ʼe mole lahi te ʼu fua ʼo te faka mafola ʼo te logo lelei ʼi te ʼu fenua ʼaē kua fai ai te gāue, kae ʼe tonu ke tou hoko atu te gāue ʼaē ko te fakatokagaʼi ʼo te hahaʼi.—Esk. 33:7-9.
5 ʼI te temi fakaʼosi ʼaenī, ʼe tonu ke tou fai te ʼu fehuʼi maʼuhiga ʼaenī: ‘ ʼE ʼau fakahoko fakalelei koa te fakatotonu ʼa Sesu ke fai ni ʼu tisipulo? ʼI taku faka mafola te logo lelei, ʼe ʼau fakahā koa taku tui mālohi ʼaē ʼe moʼoni te Puleʼaga? ʼE ʼau lotomālohi koa ke ʼau kau lahi ki te minisitelio ʼaia ʼaē ʼe ina hāofaki te maʼuli ʼa te hahaʼi?’ ʼI tatatou ʼiloʼi ʼaē kua tou ōvi ki te temi ʼo te fakaʼosi, ʼe tonu ke tou tokakaga kia tatou pea mo te fekau ʼaē ke tou fai faka mafola pea mo ako te hahaʼi. ʼI tatatou fai te gāue ʼaia, ʼe tou hāofaki ai anai tatou pea mo nātou ʼaē ka fagono mai. (1 Tim. 4:16) ʼE lava feafeaʼi kia tatou fuli ke tou fakamālohiʼi tatatou tui ʼi totatou ʼuhiga kau minisi?
6 Tou Faʼifaʼitakiʼi Te Kau Tesalonika: ʼI te manatuʼi e te ʼapositolo ko Paulo te gāue kinakina ʼa te ʼu tēhina ʼo Tesalonika, neʼe ina ʼui fēnei kia nātou: “Nee mole gata’pe mo te lea o te fakaha o tamatou evaselio kia koutou, kae nee fai aki te malohi, mo te Laumalie-Maonioni pea mo te loto pau. Pea e koutou iloi, te faahiga tagata nee matou kau ai i te lotolotoga o koutou o uhiga mo koutou. Pea mo koutou, nee matou liliu mo te Aliki ko outou faifaitakiʼaga, i tautou talitali te Folafola aki te fiafia o te Laumalie-Maonioni i te lolotoga o tautou tali mamahi lahi.” (1 Tes. 1:5, 6) Ei, neʼe vikiʼi e Paulo te kokelekasio ʼo Tesalonika koteʼuhi, logope la te ʼatu fakataga ʼaē neʼe hoko kia nātou, kae ʼaki he tui mālohi neʼe lahi tanatou fai faka mafola. Koteā ʼaē neʼe tokoni kia nātou ke nātou fai te faʼahi ʼaia? Ko te meʼa ʼaē neʼe tokoni tāfito kia nātou, neʼe ko tanatou sio ki te gāue lahi pea mo te tui ʼaē neʼe maʼu e Paulo pea mo tana ʼu kaugā gāue. ʼO feafeaʼi?
7 Neʼe fakamoʼoni e te maʼuli ʼo Paulo pea mo te ʼu tēhina ʼaē neʼe kaugā ʼolo mo ia, neʼe nātou maʼu te laumālie ʼo te ʼAtua, pea neʼe nātou tui ʼaki tonatou loto katoa ki te ʼu meʼa ʼaē neʼe nātou faka mafola. ʼI muʼa ʼo tanā ʼolo ki Tesalonika, neʼe gaohi koviʼi ia Paulo pea mo Sila ʼi Filipe. Neʼe mole fakamāuʼi nāua e he telepinale, kae neʼe tā nāua, neʼe nā pilisoni, pea neʼe fakamaʼu ʼonā nima pea mo ʼonā vaʼe ki te ʼu ʼakau. Kae ko te ʼahiʼahi ʼaia ʼo nāua neʼe mole ina fakavaivaiʼi tanā gāue fakamalotoloto ki te logo lelei. Neʼe faka ʼāteaina nāua e te ʼAtua, ʼo tafoki ai te tagata leʼo pilisoni pea mo tona famili, pea neʼe toe lava hoko atu ai te minisitelio ʼo te ʼu tēhina ʼaia.—Gaue 16:19-34.
8 ʼAki te mālohi ʼo te laumālie ʼo te ʼAtua, neʼe ʼalu ai ia Paulo ki Tesalonika. ʼI te kolo ʼaia, neʼe gāue ai moʼo taupau tona maʼuli, pea neʼe gāue katoa leva moʼo akoʼi te moʼoni ki te kau Tesalonika. Neʼe ina tala te logo lelei ʼi te ʼu lakaga fuli pe. (1 Tes. 2:9) Ko te tui mālohi ʼaē neʼe maʼu e Paulo ʼi tana faka mafola ki te hahaʼi ʼo te kolo ʼaia, neʼe malave mālohi kia nātou, ʼo līaki ai e ʼihi tanatou tauhi tamapua pea nātou liliu ai ko he ʼu kaugana ʼo te ʼAtua moʼoni, ko Sehova.—1 Tes. 1:8-10.
9 Logope la te ʼu fakataga, kae neʼe mole fakavaivai ai e te hahaʼi tui ʼaia tanatou faka mafola te logo lelei. Neʼe lotomālohi te kau Tesalonika ke nātou tala te moʼoni ʼaē neʼe nātou tali fakafiafia, pea neʼe uga ai nātou e tanatou tui foʼou ʼaia pea mo tanatou tui papau ʼaē ʼe nātou maʼu anai he ʼu tapuakina heʼegata. Neʼe mālohi ai te gāue ʼa te kokelekasio ʼaia, pea ko te ʼu logo ʼo ʼuhiga mo tanatou tui pea mo tanatou gāue fakamalotoloto neʼe mafola ki te tahi ʼu potu ʼo Masetonia pea mo Akaia. Koia, ʼi te ʼuluaki tohi ʼa Paulo ki te kau Tesalonika, neʼe kua ʼiloʼi lelei tanatou ʼu gāue lelei. (1 Tes. 1:7) ʼE ko he faʼifaʼitaki maʼuhiga ʼaia!
10 ʼE Uga Tatou e Te ʼOfa Ki Te ʼAtua Pea Mo Te Hahaʼi: Ohage ko te kau Tesalonika, ʼe lava feafeaʼi hatatou maʼu he tui mālohi mokā tou faka mafola te logo lelei ia ʼaho nei? ʼO ʼuhiga mo te kau Tesalonika, neʼe tohi fēnei e Paulo: “ ʼE mātou manatuʼi tuʼumaʼu takotou gāue agatonu, mo takotou gāue kinakina ʼuhi ko tokotou ʼofa.” (1 Tes. 1:3, kiʼi nota ʼi te lalo pasina, MN) ʼE mahino ia neʼe nātou ʼofa ʼaki tonatou loto katoa kia Sehova ʼAtua pea mo te hahaʼi ʼaē neʼe nātou faka mafola kiai. ʼE ko te ʼofa ʼaia ʼaē neʼe ina uga Paulo pea mo tana ʼu kaugā gāue ke nātou foaki ki te kau Tesalonika “te Evaselio a te Atua, pea mo [ʼonatou] mauli foki.”—1 Tes. 2:8.
11 ʼO toe feiā, ko tatatou ʼofa lahi kia Sehova pea mo tatatou kāiga, ʼe ina uga tatou ke tou fia kau lahi ki te gāue fai faka mafola ʼaē neʼe tuku mai e te ʼAtua ke tou fai. ʼAki te taʼi ʼofa ʼaia, ʼe tou ʼiloʼi ai neʼe fakamaʼua mai e te ʼAtua ke tou faka mafola te logo lelei. Ko tatatou metitasio lelei pea mo tatatou leleiʼia ia meʼa fuli ʼaē neʼe fai e Sehova ʼi tana taki tatou ki “te mauli mooni,” ʼe ina uga ai tatou ke tou tala ʼaki totatou loto katoa ki te hahaʼi te ʼu moʼoni taulekaleka ʼaē ʼe tou tui kiai.—1 Tim. 6:19.
12 ʼI tatatou maʼumaʼua ʼi te fai faka mafola, ʼe tonu ai ke tuputupu tatatou ʼofa kia Sehova pea mo te hahaʼi. Kapau koia ʼaia, pea ʼe tou lotomālohi anai ke lahi age tatatou kau ki te minisitelio ʼi te ʼu ʼapi pea ke tou fakahoko te tahi ʼu agaaga ʼo te fai faka mafola. ʼE tou fakaʼaogaʼi lelei anai te ʼu faigamālie moʼo faka mafola ki tatatou ʼu kāiga mo tatatou vāhaʼa fale, pea mo tatatou ʼu feʼilo. ʼE fiafia totatou loto, logope la ko te tokolahi ʼo te hahaʼi ʼe nātou fakafisi ki te logo lelei ʼaē ʼe tou tala, pea mo te faiga ʼa ʼihi ke nātou fakagata te tala ʼo te Puleʼaga. He koʼe ʼe fiafia tokita loto? Heʼe tou ʼiloʼi neʼe tou faiga mālohi moʼo faka mafola te Puleʼaga, pea mo tokoni ki te hahaʼi ke nātou maʼu te fakamaʼuli. Pea ʼe tapuakina anai e Sehova tatatou ʼu faiga ke tou maʼu te ʼu hahaʼi ʼaē ʼe loto faitotonu. Tatau aipe peʼe lahi ʼaupito te ʼu fakaneke ʼaē ʼe fai mai kia tatou pea mo te faiga ʼa Satana ke ina pulihi tatatou fiafia, kae ʼe feala ke tou taupau tatatou tui mālohi pea mo tatatou gāue fakamalotoloto ʼi te faka mafola ki te hahaʼi. Kapau ʼe tou lagolago fuli kiai, pea ʼe liliu ai tatatou kokelekasio ʼo mālohi pea mo gāue fakamalotoloto ohage ko te kokelekasio ʼo Tesalonika.
13 ʼAua Naʼa Koutou Lotovaivai Mokā Hoko Te ʼAhiʼahi: ʼE toe ʼaoga ke tou tui mālohi mokā hoko mai he ʼu ʼahiʼahi kehekehe. (1 Pet. 1:6, 7) Neʼe fakahā lelei e Sesu ki tana kau tisipulo, kapau ʼe nātou fia muli ia te ia, pea ʼe “fehia anai te atu puleaga” kia nātou. (Mat. 24:9) Neʼe hoko te faʼahi ʼaia kia Paulo pea mo Sila ʼi tana nonofo ʼi Filipe. ʼE fakamatala ʼi te tohi ʼo Gaue kapite 16, neʼe pilisoniʼi Paulo pea mo Sila ʼi te kolo ʼaia pea neʼe fakamaʼu ʼonā vaʼe pea mo ʼonā nima ʼi te ʼu ʼakau. ʼI te agamāhani, ko te fale pilisoni tāfito ʼe hage ko he malaʼe peʼe ko he hūʼaga, mo he ʼu kogafale pilisoni ʼi ʼona tafa, pea neʼe feala ke hū kiai te mālama ʼo te laʼā pea mo te ʼaele. Kae ko te ʼu kogafale pilisoni ʼaē ʼi loto neʼe fakapōʼuli pea neʼe mole faka ʼaele lelei. Neʼe nonofo Paulo pea mo Sila ʼi te fakapōʼuli, mo te vevela, pea mo te mamanu ʼo te fale ʼaia ʼaē neʼe punupunu. Koutou fakakaukauʼi age muʼa tanā maʼuli mamahi ʼi tanā nonofo ʼi te kogafale fakapōʼuli ʼaia lolotoga ni ʼu hola, pea mo te mamahi pea mo te totoʼia ʼo tonā ʼu tuʼa ʼaē neʼe tā!
14 Logope la te ʼu ʼahiʼahi ʼaia, kae neʼe nonofo agatonu ia Paulo pea mo Sila. Neʼe nā fakahā he tui mālohi, pea neʼe fakatupu lotomālohi ai kia nāua ke nā tauhi kia Sehova logola te faigataʼaʼia. ʼE hā lelei tanā tui mālohi ʼi te vaega 25 ʼo te kapite 16, ʼaē ʼe ʼui ai neʼe “faikole mo hiva katiko ia Paulo mo Sila ki te Atua.” ʼI tona fakahagatonu, logope la neʼe nā nonofo ʼi te fale pilisoni, kae neʼe nā tui papau ʼe leleiʼia nāua e te ʼAtua, pea neʼe nā hiva leʼolahi ke logo kiai te hahaʼi pilisoni! ʼE tonu ke tou maʼu mo tatou te tui mālohi ʼaia ia ʼaho nei, mokā ʼahiʼahiʼi tatatou tui.
15 ʼE lahi ʼaupito te ʼu ʼahiʼahi ʼaē ʼe fakatupu e te Tevolo kia tatou. ʼE lagi fakatagaʼi ʼihi e tonatou famili. Tokolahi te ʼu tēhina ʼe nātou tau mo te ʼu faigataʼaʼia ʼo ʼuhiga mo te lao. ʼE feala ke fakafeagai mai te kau ʼaposita. ʼE ʼi ai mo te ʼu maʼua faka paʼaga pea mo te tuʼania ʼo ʼuhiga mo te taupau maʼuli. ʼE ʼi ai te ʼu fakaneke ʼe fai ki te kau tūpulaga ʼi te faleako. ʼE tou lava tauʼi feafeaʼi koa te ʼu ʼahiʼahi ʼaia? Koteā ʼaē ʼe tonu ke tou fai ke mālohi ai tatatou tui?
16 ʼUluaki, ʼe tonu ke tou taupau he ʼu felogoi lelei mo Sehova. ʼI te nofo ʼa Paulo pea mo Sila ʼi te fale pilisoni, neʼe mole nā meo ʼo ʼuhiga mo tonā ʼaluʼaga fakaʼofaʼofa. Neʼe nā foimo faikole atu aipe ki te ʼAtua pea mo fai he ʼu hiva fakavikiviki kia te ia. Koteā tona tupuʼaga? He neʼe nā felogoi lelei mo tanā Tāmai ʼaē ʼi selo. Neʼe mahino kia nāua, neʼe nā maʼuli mamahi ʼuhi ko te faitotonu pea ʼe ko Sehova ʼaē ka ina hāofaki nāua.—Pes. 3:8.
17 Ka tou felāveʼi mo ni ʼu ʼahiʼahi ia ʼaho nei, ʼe tonu mo tatou ke tou haga kia Sehova. ʼE fakaloto mālohiʼi tatou e Paulo, ʼi totatou ʼuhiga kau Kilisitiano, ke tou “fakaha ki te Atua [totatou] u kole. Pea ko te tokalelei o te Atua aia e fakalaka i te atamai fuape, e ina malui anai [totatou] loto mo [totatou] fakakaukau.” (Filp. 4:6, 7) ʼI meʼa fakaloto fīmālie tatatou ʼiloʼi ʼaē ʼe mole tuku feiā tatou e Sehova mokā hoko mai he ʼu ʼahiʼahi! (Isa. 41:10) ʼE nofo tuʼumaʼu mo tatou mo kapau ʼe tou tauhi kia te ia ʼaki he tui moʼoni.—Pes. 46:7.
18 Ko te tahi tokoni maʼuhiga ke mālohi ai tatatou tui, ʼe ko tatatou maʼumaʼua ʼi te tauhi kia Sehova. (1 Ko. 15:58) Neʼe pilisoniʼi Paulo pea mo Sila he neʼe nā maʼumaʼua ʼi te faka mafola ʼo te logo lelei. Neʼe nā fakagata koa tanā faka mafola ʼuhi ko tanā ʼu ʼahiʼahi? Kailoa, kae neʼe nā haga fai tanā fai faka mafola logope la tanā nonofo ʼi te fale pilisoni, pea ʼi tanā kua fakamavae mai ai, neʼe nā folau ki Tesalonika pea nā ʼolo ki te sinakoka ʼo te kau Sutea ʼo ‘palalau mo nātou ʼaki te Tohi-Tapu.’ (Gaue 17:1-3) Kapau ʼe tou tui kia Sehova pea mo tou tui mālohi kua tou maʼu te moʼoni, ʼe mole he meʼa “e feala anai tana fakamavae tatou mai te ofa o te Atua ia Kilisito Sesu totatou Aliki.”—Loma 8:35-39.
19 Ko He ʼu Faʼifaʼitaki ʼo Te Tui Mālohi ʼi Totatou Temi: ʼE lahi ʼi te temi nei te ʼu faʼifaʼitaki ʼo ʼihi neʼe nātou fakahā he tui mālohi, ohage ko Paulo pea mo Sila. Ko te tuagaʼane neʼe hāo mai te lotoʼā fakamamahi ʼo Auschwitz, ʼe ina fakamatala te tui mālohi ʼaē neʼe fakahā e te ʼu tēhina mo tuagaʼane ʼo te lotoʼā fakamamahi ʼaia. ʼE ina fakamatala fēnei: “ ʼI te tahi ʼaho, ʼi tanatou fakafehuʼi ʼau, neʼe haʼu te ofisie kia ʼau pea neʼe ina kukumi tona ʼu nima. Neʼe ina ʼui fēnei: ‘Koteā te meʼa ʼaē ka mātou fai kia koutou? Ka mātou puke koutou, pea ʼe mole koutou tuʼania. Ka mātou ʼave koutou ʼo pilisoniʼi, pea ʼe mole koutou lotohoha. Ka mātou ʼave koutou ki te lotoʼā fakamamahi, pea ʼe mole koutou matataku. Ka fakatūʼa koutou ki te mate, ʼe mole koutou tuʼaniaʼi te faʼahi ʼaia. Koteā te meʼa ʼaē ka mātou fai kia koutou?’ ” ʼE ko he meʼa fakaloto mālohi ki tatatou tui, mokā tou sio ki te tui mālohi ʼo tatatou ʼu tēhina ʼi te ʼu ʼaluʼaga faigataʼa ʼaia. Neʼe nātou kumi tokoni tuʼumaʼu kia Sehova ke nātou lava kātakiʼi.
20 ʼE lagi tou manatuʼi te tui ʼaē neʼe fakahā e te tokolahi ʼo totatou ʼu tēhina ʼi te ʼu taʼu pe ʼaenī ʼaē neʼe hoko ai te ʼu tau ʼuhi ko te ʼu kehekehe ʼo te lanu ʼo te hahaʼi. Logope la tanatou nonofo ʼi te ʼu ʼaluʼaga faigataʼa ʼaia, kae ʼe tokakaga te ʼu tēhina taupau ke fafaga tonatou ʼu tēhina mo tuagaʼane ʼi te faʼahi fakalaumālie. ʼE nātou haga nonofo agatonu fuli pea mo nātou tui mālohi ‘ko te mahafu tau fuli ʼe faʼu anai moʼo fakafeagai kia nātou ʼe iku noa anai.’—Isa. 54:17.
21 Ko te tokolahi ʼo totatou ʼu tēhina mo tuagaʼane ʼaē ʼe mole kau tonatou ʼohoana ʼi te moʼoni, ʼe nātou fakahā mo nātou he tui mālohi pea mo nātou faʼa kātaki. Neʼe ʼi ai te tēhina ʼi Guadeloupe neʼe fakafeagai mālohi kiai tona ʼohoana. Moʼo fakavaivaiʼi ia ia pea ke fakagata tana kau ki te ʼu fono, neʼe mole teuteuʼi e tona ʼohoana he meʼa kai, neʼe mole ina fai te fō, mo te fakamolemole, pea neʼe mole ina tui tana ʼu mutuʼi meʼa. Lolotoga ni ʼaho, neʼe mole gū kia ia. Kae neʼe kātakiʼi e te tēhina ia meʼa fuli, he neʼe tauhi kia Sehova ʼaki he tui mālohi, pea neʼe faikole kia ia ke tokoni age. Lolotoga temi e fia? Lolotoga taʼu e 20—pea neʼe fetogi māmālie leva te loto ʼo tona ʼohoana. Ki muli age, neʼe fiafia te tēhina he neʼe tali e tona ʼohoana te ʼamanaki ʼaē ʼe foaki e te Puleʼaga ʼo te ʼAtua.
22 Pea moʼo fakaʼosi, ʼe mole tonu ke tou galoʼi te tui mālohi ʼo totatou ʼu tēhina mo tuagaʼane tūpulaga ʼaē ʼe ʼolo ʼo ako ʼi te ʼaho fuli, pea ʼe fai kia nātou te ʼu fakaneke lahi pea mo te tahi ʼu faigataʼa. ʼO ʼuhiga mo te ʼu fakaneke ʼa te kau tūpulaga ʼi te faleako, neʼe ʼui fēnei e te tuagaʼane kei finemui: “ ʼI te faleako, ʼe uga tuʼumaʼu pe koutou e he tahi ke koutou agatuʼu. Pea ʼe fakaʼapaʼapa lahi te tamaliki kia koutou mokā koutou fai te aga ʼaia.” ʼE lahi te ʼu fakaneke ʼaē ʼe fai ki totatou kau tūpulaga! ʼE tonu ke nātou fakatotonu mālohi ʼi tonatou ʼatamai pea mo tonatou loto ke nātou tekeʼi te fakahala.
23 Tokolahi tatatou kau tūpulaga ʼe nātou taupau lelei tanatou agatonu mokā ʼahiʼahiʼi nātou. ʼE tuku mai te faʼifaʼitaki e te tuagaʼane kei finemui ʼi Falani. ʼI te tahi ʼaho, ʼi tana ʼosi kai, ko te kau tamaliki tagata neʼe nātou fakaneke ia ia ke ina ʼumaʼi nātou, kae neʼe faikole te tuagaʼane pea mo fakafeagai mālohi kia nātou, pea neʼe ʼolo ai te ʼu tamaliki tagata. Ki muli age, neʼe toe haʼu te tama ʼi te ʼu tamaliki tagata ʼaia, pea neʼe ina ʼui age neʼe ina fakaʼapaʼapa ki tana lototoʼa. Neʼe feala ai ki te tuagaʼane ke ina faka mafola te logo ʼo te Puleʼaga kia ia, ʼo ina fakamahino age ʼe fai e Sehova he ʼu lekula māʼoluga ke mulimuli kiai ia nātou fuli ʼaē ʼe nātou fia maʼu tana ʼu tapuakina. Tahi ʼaē meʼa, lolotoga te taʼu ʼaia, neʼe ina fakamahino tana tui ki tana kalasi.
24 ʼE ko he pilivilesio taulekaleka tatatou kau ia nātou ʼaē ʼe fia fakaʼaogaʼi e Sehova moʼo palalau ki tona finegalo ʼaki he tui mālohi! (Kol. 4:12) Tahi ʼaē meʼa, ʼe tou maʼu te fealagia taulekaleka ʼaē ke tou fakamoʼoni ki tatatou agatonu mokā ʼohofiʼi tatou e totatou Fili ko Satana te Tevolo, ʼaē ʼe hage ko he laione. (1 Pet. 5:8, 9) ʼAua naʼa galo kia tatou, ʼe fakaʼaogaʼi e Sehova te logo lelei ʼo te Puleʼaga moʼo hāofaki ʼo tatou ʼaē ʼe faka mafola, pea mo nātou ʼaē ʼe fagono mai. Tou fakaʼamu ke fakamoʼoni e te ʼu tonu ʼaē ʼe tou fai pea mo totatou faʼahiga maʼuli ʼo te ʼaho fuli, ʼe tou fakamuʼamuʼa te Puleʼaga. Tou haga tui mālohi mokā tou faka mafola te logo lelei!