“Tauʼi Te Tau Matalelei ʼo Te Tui”
1 Neʼe tokoniʼi e te ʼapositolo ko Paulo ia Timoteo ke ina “tauʼi te tau matalelei ʼo te tui.” (1 Tim. 6:12, MN ) Neʼe maʼuliʼi e Paulo te ʼu palalau ʼaia. Ki muli age, neʼe ina ʼui fakahagatonu neʼe ina tauʼi moʼoni te tau matalelei. (2 Tim. 4:6-8) Ia meʼa fuli pe, neʼe ina fakahoko tana minisitelio ʼaki he lototoʼa pea mo he faʼa kātaki. Kapau ʼe tou muliʼi tana faʼifaʼitaki, pea ʼe tou lava ʼiloʼi papau ai mo tatou, ʼe tou faiga mālohi ʼi tatatou tau ʼo ʼuhiga mo te tui faka Kilisitiano.
2 Koutou Fai He ʼu Faiga ʼe ʼAoga: Neʼe gāue kinakina ia Paulo ʼi te minisitelio. (1 Ko. 15:10) Koia tou kumi ia nātou fuli ʼaē ʼe nātou fia logo ʼi totatou telituale. (Mat. 10:11) Moʼo maʼu ʼihi ia nātou ʼaia, ʼe lagi tonu anai ke tou ʼaʼala kei uhuuhu moʼo fagonogono kia nātou ʼaē ʼe tou felāveʼi ʼi te ʼu ala. Peʼe tonu ke tou gāue ʼi te fakaʼosi hili hoʼatā peʼe ʼi te kamata afiafi ke tou maʼu te hahaʼi mokā kua nātou ʼōmai kiō nātou.
3 ʼE tonu ke tou fai he ʼu fakatuʼutuʼu lelei pea mo fai he polokalama lelei ke ʼaua naʼa tou tauhala ki te ʼu fono gāue ʼo te fai faka mafola. Ohage la, ko ʼihi ʼi te famili ʼo te Petele ʼi Amelika, ʼe nātou kau ki te minisitelio ʼo te ʼu kokelekasio ʼaē neʼe hinoʼi nātou kiai, pea ʼi te ʼu fakaʼosi vāhaʼa fuli ʼe nātou fai te hola katoa ʼi tanatou ʼolo pea mo tanatou liliu mai ki te Petele. Tahi ʼaē meʼa, ʼe tou fakamālo ki ʼihi kau fai faka mafola pea mo te ʼu famili ʼo tatatou kokelekasio, heʼe nātou ʼōmai tautonu logola tanatou nonofo mamaʼo. Koia ʼe lelei ke tou faʼifaʼitaki te ʼu hahaʼi faʼafai ʼaia, ʼaē ʼe nātou fai he fakatuʼutuʼu lelei.
4 ʼE tonu ke tou ʼolo ʼo ʼaʼahi ia nātou fuli ʼaē neʼe nātou fia logo ki tatatou fai faka mafola. Peʼe tou tufa he tohi ki he tahi neʼe tou maʼu ʼi te ala, peʼe ʼi te fagonogono faigamālie, kae tou faiga ke ina tuku mai tona tuʼasila peʼe ko tona numelo telefoni. Pea ke tou telefoni ki ai moʼo fakatuputupu tana fia logo, pea mo tou faiga ke tou kamata hana ako Tohi-Tapu.
5 Tou Kau Tuʼumaʼu Ki Te Minisitelio: Ko te fai faka mafola ʼa Paulo neʼe fakaʼaluʼalu lelei pea neʼe katoa. (Loma 15:19) E feafeaʼi kia koutou? ʼE koutou kau tuʼumaʼu koa ki te minisitelio? Neʼe kua koutou kau koa ki te fai faka mafola ʼi te māhina ʼaenī? Ko te kau takitaki ʼo te ʼu ako tohi ʼo te kokelekasio ʼe nātou loto ke kau katoa tanatou ako tohi ki te minisitelio ʼo te māhina ʼo ʼAukusito. ʼE nātou toe tokoni feiā anai kia koutou ʼi te faʼahi ʼaia.
6 Kapau ʼe tou muliʼi te faʼifaʼitaki ʼa Paulo ʼo tou lagolago katoa ki te logo lelei, pea ʼe tou hoko atu anai tatatou “tauʼi te tau matalelei ʼo te tui.”