Tou Manavasiʼi Kia Sehova ʼi Te ʼAho Katoa
1 “Ko te manavasiʼi kia Sehova ko te kamataʼaga ʼo te poto.” (Pes. 111:10) ʼE ina uga tatou ke tou fai he ʼu gāue lelei pea ʼe tokoni mai ke tou maliu mai te meʼa ʼaē ʼe kovi. (Taag. 16:6) Ko te manavasiʼi ʼaia ʼe ko he fakaʼapaʼapa lahi ki totatou Tupuʼaga, ʼe ina uga tatou ke ʼaua naʼa tou fakaloto mamahi ia ia pea mo talagataʼa kia te ia. ʼE ko he meʼa ʼe tonu ke tou maʼu pea mo fakahā ʼi te ʼaho katoa.—Taag. 8:13.
2 ʼI te ʼaho fuli, ʼe fakaneke lahi tatou e te manatu ʼo te mālama ʼa Satana ke tou mulimuli ki tona ʼu ala ʼaē ʼe kovi. (Ef. 6:11, 12) Ko totatou kakano heʼe haohaoa ʼe agahala pea ʼe holi tuʼumaʼu ki te meʼa ʼaē ʼe kovi. (Kal. 5:17) Koia, ke feala hatatou mulimuli ki te ʼu fakatotonu ʼa Sehova, mo maʼuli fiafia, pea mo maʼu te maʼuli, ʼe tonu ke tou manavasiʼi kia te ia ʼi te ʼaho katoa.—Teu. 10:12, 13.
3 Ia Hepeleo 10:24, 25 ʼe tokoni mai ke tou fakatahitahi ke feala hatatou fefakaloto mālohiʼaki, “tāfito” ʼi te ʼu temi ʼaenī ʼaē ʼe tou maʼuʼuli ai. Ko tatatou kau tuʼumaʼu ki te ʼu fono ʼe maʼuhiga mo kapau ʼe tou fia hāo ʼi te ʼu ʼaho fakamuli ʼaenī. Ko tatatou manavasiʼi ʼaē naʼa tou fai he meʼa ʼe mole leleiʼia e te ʼAtua, ʼe ina uga tatou ke tou kau ki te ʼu fono pea ke tou faka maʼuhigaʼi ʼaupito te fakatuʼutuʼu ʼaia. Ko nātou ʼaē ʼe manavasiʼi ki te ʼAtua ʼe ko he pilivilesio taputapu kia nātou te kau ki te ʼu fono.
4 ʼE tou toe fakahā tatatou manavasiʼi ki te ʼAtua mokā tou fakalogo ki te fakatotonu ʼaē ke tou faka mafola te logo lelei ʼo te Puleʼaga. (Mat. 28:19, 20; Gaue 10:42) Ko te ʼuluaki fakatuʼutuʼu ʼo tatatou gāue fai faka mafola, ʼe ko te tokoni ki te hahaʼi ke nātou manavasiʼi kia Sehova pea ke nātou fakalogo ki tona finegalo. ʼE tou fai te faʼahi ʼaia mokā tou fai te ʼu ʼaʼahi, mo faiga ke tou kamata he ʼu ako Tohi-Tapu, pea mo akoʼi ki ʼihi te ʼu fakatotonu fuli ʼa te ʼAtua. ʼE tou fakahā ai tatatou manavasiʼi kia Sehova pea mo tatatou ʼofa ki te kāiga.—Mat. 22:37-39.
5 Ko nātou ʼaē ʼe mole manavasiʼi ki te ʼAtua ʼe mole nātou leleiʼia te ʼu meʼa fakalaumālie, pea ʼe nātou muliʼi te ʼaele, peʼe ko te manatu ʼo te mālama ʼaē ʼe iku ki te mate. (Ef. 2:2) Tou fakatotonu ke tou “momoli ki te Atua he tauhi e tuha, fakatahi mo te [“manavasiʼi,” MN ] pea mo te manavahe.” (Hep. 12:28) ʼE tou maʼu ai anai te ʼu tapuakina ʼo nātou ʼaē ʼe manavasiʼi kia Sehova ʼi te ʼaho katoa.