ʼE Faka Kolōliaʼi Ia Sehova ʼAki He ʼu Gāue Lelei
1 Ka ʼua lahi, pea ʼe ko he meʼa lelei hatatou maʼu he ʼapi moʼo fakamalumalu ai! ʼE koutou fia nonofo ʼi te loto fale ʼaia, mo kapau ʼe māfanagia pea mo koutou logolelei ʼi loto, pea kapau ʼe agalelei te ʼu hahaʼi ʼo te ʼapi ʼaia. Ko te gāue ʼaē ko te faka mafola ʼo te Puleʼaga, ʼe ina taki mai te hahaʼi ʼaē ʼi te mālama ʼa Satana ki te taʼi nofoʼaga ʼaia. ʼE feala koa ʼaki tatatou aga ʼo te ʼaho fuli, ke tou tokoni ki te hahaʼi ke nātou sio ki te lelei ʼo te nofoʼaga ʼaia? Ei, he neʼe ʼui e Sesu, ko te hahaʼi ‘ ʼe nātou sio anai ki tatatou ʼu gāue lelei pea mo nātou faka kolōlia ki tatatou Tāmai ʼaē ʼe ʼi selo.’—Mat. 5:16.
2 ʼE tonu ke feafeaʼi tatatou aga, ke feala ai he fia ʼōmai ʼa te hahaʼi kia Sehova pea mo tana kautahi? ʼE tonu ke tou tuku ki te ʼu palalau ʼa Sesu ʼaē ʼe tuʼu ia Luka 6:31 pea mo te 10:27 ke nātou takitaki totatou maʼuli ʼo te ʼaho fuli. ʼE ina uga anai tatou ke tou ʼofa ki te hahaʼi, pea ke tou kehe ʼi te mālama agakovi pea agamālohi ʼaenī.
3 Neʼe ʼalu te tuagaʼane ʼi te sitima, pea neʼe sio ki te fafine neʼe logo mahaki, ʼo mole feala hana tokaga ki tana kiʼi tamasiʼi tagata. Neʼe kole age e te tuagaʼane ke ina tuku age te kiʼi tamasiʼi ke tokaga ki ai. ʼI te kole age ʼa te fafine pe koteā te meʼa ʼaē ʼe feala ke ina fai moʼo fakamālo age kia ia, neʼe ʼui fēnei age e te tuagaʼane: ‘ ʼE ʼau kole atu ke ke fakalogo ki te kau Fakamoʼoni ʼa Sehova mokā nātou ʼolo atu ʼo ʼaʼahi koe.’ Neʼe mulimuli te fafine kiai, pea ʼi te temi nei ko ia mo tona ʼohoana ko te ʼu Fakamoʼoni ʼa Sehova. Ko te ʼu gāue lelei ʼe feala ke nātou uga te hahaʼi ke nātou tali te logo ʼa te Puleʼaga.
4 ʼE Kau Kiai Totatou Maʼuli Katoa: ʼE maʼu e te hahaʼi he faʼahiga manatu ʼo ʼuhiga mo tatou pea mo tatatou lotu, ʼi tanatou sio ki tatatou aga ʼi te gāue peʼe ʼi te faleako, pea lolotoga te ʼu temi fakafiafia. Koia ʼe tonu ke tou fai kia tatou te ʼu fehuʼi ʼaenī: ‘Koteā te manatu ʼa te hahaʼi ʼo ʼuhiga mo ʼau pea mo toku famili? ʼE sio koa e tomatou ʼu vāhaʼa fale ʼe maʼa tomatou ʼapi pea mo tomatou malaʼe? ʼE sio koa e taku ʼu kaugā gāue pea mo taku ʼu kaugā ako ʼe ʼau haʼu tautonu pea mo ʼau gāue lelei? ʼE sio koa te hahaʼi ʼe tou aga fakapoipoi pea mo aga fakaʼapaʼapa ʼi tatatou faʼahiga teuteu?’ ʼE leleiʼia anai e te hahaʼi te tauhi kia Sehova, ʼuhi ko tatatou ʼu gāue lelei.
5 Neʼe ʼui e Petelo ʼe vāʼi anai te kau Kilisitiano. (1 Pet. 4:4) Tou tokakaga naʼa tou fai he ʼu aga ʼe valokiʼi ai tatou. (1 Pet. 2:12) Kapau ko tatatou ʼu gāue ʼo te ʼaho fuli ʼe nātou faka kolōlia te ʼAtua ʼaē ʼe tou atolasio ki ai, pea ʼe tou hage anai ko he ʼu mālama taki ʼe sio lelei kiai te hahaʼi, pea ʼe ina uga anai nātou ke ʼōmai ki te malumaluga ʼaē ʼe foaki mai e Sehova.—Mat. 5:14-16.