Koteā Tatatou Fakatuʼutuʼu?
1 He koʼe ʼe tou fai he ʼu ako Tohi-Tapu? ʼE tou fai pe koa moʼo foaki te ʼatamai mālama, moʼo hikihiki te maʼuli ʼo te hahaʼi, peʼe moʼo foaki kia nātou he ka haʼu lelei? Kailoa. ʼE tou fakatuʼutuʼu ke tou fai he ʼu tisipulo ʼa Sesu Kilisito! (Mat. 28:19; Gaue 14:21) Koia ʼe maʼua ai kia nātou ʼaē ʼe ako ke nātou kau ki te ʼu fono. Ke feala hanatou tuputupu ʼi te faʼahi fakalaumālie, ʼe tonu ke nātou mahino fakalelei ki te kautahi faka Kilisitiano.
2 ʼE Tou Lava Fakahoko Feafeaʼi Te Faʼahi ʼAia: ʼO kamata mai te ʼuluaki ako, koutou uga tuʼumaʼu ia ia ʼaē ʼe ako ke kau ki te ʼu fono. (Hep. 10:24, 25) Koutou fakamahino age kia ia ʼe fakaloto mālohi anai e te ʼu fono tana tui, ʼe tokoni anai kia ia ke ina fai te finegalo ʼo te ʼAtua, pea ʼe fakatahi ai mo he ʼu hahaʼi lelei ʼe nātou loto mo nātou ke nātou vikiʼi ia Sehova. (Pes. 27:13; 32:8; 35:18) Ko takotou ʼu palalau ʼaē ʼe hā ai tokotou ʼofa pea mo takotou leleiʼia te kokelekasio pea mo te ʼu fono, ʼe nātou uga anai ia ia ke fia kau kiai.
3 ʼE tonu ke mahino kia nātou ʼaē ʼe foʼou, ko te kautahi ʼa Sehova ʼe ko he fale tautēhina ʼi te kele katoa. Koutou fakahā age kia nātou te ʼu foʼi fime viteo Les Témoins de Jéhovah : un nom, une organisation pea mo te Toute la communauté de nos frères (Fakapilitānia). Koutou tokoni kia nātou ke nātou mahino ʼe fakaʼaogaʼi e Sehova ʼi te malamanei katoa, te hahaʼi e lauʼi miliona kua nātou foaki tonatou maʼuli kia te ia moʼo fakahoko tona finegalo. Koutou fakahā ki te hahaʼi foʼou ʼaia ʼe toe fakaafe mo nātou ke nātou tauhi ki te ʼAtua.—Isa. 2:2, 3.
4 ʼE ko he toe fiafia lahi hakita sio ki he tahi ʼe ako te Tohi-Tapu, ʼe liliu ko he tisipulo moʼoni ʼa Sesu. ʼE ko tatatou fakatuʼutuʼu ʼaia!—3 Soa. 4.