Tou Akoʼi Ki Te Hahaʼi Te Lea Maʼa
1 Logola ko te kau Fakamoʼoni ʼa Sehova ʼe nātou ʼōmai mai “te ʼu fenua fuli pea mo te ʼu telepi pea mo te ʼu hahaʼi pea mo te ʼu lea fuli,” kae ʼe nātou logo tahi, ko he foʼi famili fakatautehina moʼoni ʼi te malamanei katoa. (Apk. 7:9, MN ) ʼE ko he ʼaluʼaga fakaofoofo ʼaia ʼi te mālama maveuveu ʼo totatou temi. He koʼe ʼe feala te faʼahi ʼaia? Koteʼuhi neʼe foaki mai kia tatou “te fetogi, ʼe ko he lea maʼa.”—Sofo. 3:9.
2 Tona ʼu Fua Fakaofoofo: Koteā te lea maʼa ʼaia? ʼE ko te mahino lelei ki te moʼoni ʼaē ʼe tuʼu ʼi te Folafola ʼa te ʼAtua ʼo ʼuhiga mo Sehova pea mo tona finegalo, tāfito te moʼoni ʼo ʼuhiga mo te Puleʼaga ʼo te ʼAtua. Ohage ko tona fakakikite e Sesu, ʼe faka mafola te moʼoni ʼaia e te hahaʼi ʼe ina fakaʼaogaʼi ʼi te kele, ko “te tagata kaugana agatonu mo poto,” pea ʼaki te gāue ʼaia ko te hahaʼi “mai te ʼu lea kehekehe ʼo te ʼu puleʼaga” ʼe nātou tali te tauhi moʼoni.—Mat. 24:45, MN; Sakl. 8:23.
3 Ka ako e te hahaʼi te lea maʼa ʼaia, pea ʼe uga ai nātou ke nātou faka ʼalutahi tonatou maʼuli mo te ʼu pelesepeto ʼa Sehova. ʼE nātou ako ke nātou “logo tahi fakalelei ʼi he laumālie pe e tahi pea mo he manatu pe e tahi.” (1 Ko. 1:10, MN ) Ko te ʼu akonaki fakaʼatua, ʼe ina toe fakatupu ʼi te hahaʼi ʼaia he aga ʼe lelei pea mo nātou fai he ʼu palalau maʼa pea mo moʼoni, tāfito ʼo ʼuhiga mo tanatou tala ki te hahaʼi te logo lelei. (Tito 2:7, 8; Hep. 13:15) Ko te ʼu fetogi fakaofoofo ʼaia ʼe nātou faka kolōliaʼi ia Sehova.
4 Ohage la, ko te kaugā fai faka mafola neʼe ina tala te logo lelei ki te tagata neʼe lahi tana ʼu fehuʼi, pea neʼe tali ki ai ʼaki te Tohi-Tapu. ʼI tana leleiʼia te ʼu meʼa ʼaē neʼe logo kiai, neʼe ina tali ke fai tana ako tuʼa lua ʼi te vāhaʼa, pea mo kau ki te ʼu fono. Neʼe punamaʼuli ʼi tona tali fakalelei ʼi te Fale ʼo Te Puleʼaga, koteʼuhi ko te tokolahi neʼe ko te hahaʼi ʼo te ʼu lanu kehekehe. Mole fualoa, pea ko ia mo tona ʼohoana neʼe nā fai te ʼu fetogi ʼi tonā maʼuli, pea nā papitema. Talu mai ai, neʼe tokoni te tagata ʼaia ki te toko 40 hahaʼi ke nātou tauhi kia Sehova, pea ʼe kau ai te tokolahi ʼo tona famili. Logola ʼe mahamahaki, kae mole heʼeki faʼa fualoa neʼe ina toʼo te selevisi pionie.
5 Tou Akoʼi Te Hahaʼi: ʼAki te ʼu meʼa fakamataku ʼaē ʼe hoko ʼi te malamanei, tokolahi te hahaʼi ʼaē ʼe maʼuli fakahagatonu, neʼe nātou toe vakavakaʼi tonatou ʼu faʼahiga fakakaukau, pea mo tonatou maʼuli. Ohage ko Sesu, ʼe tonu ke tou fia tokoni kia nātou ʼaia. Ko he ʼu ʼaʼahi pea mo he ʼu ako Tohi-Tapu ʼe fai fakalelei, ʼe ko te ʼu puleʼaki lelei ʼaia moʼo tokoni ki te hahaʼi fakamalotoloto ke nātou ako te lea maʼa.
6 Kapau ʼe maʼumaʼua te hahaʼi, pea ʼe lelei ke tou fai hanatou ako Tohi-Tapu nounou ʼi tonatou gutu matapā. (Te Minisitelio ʼo Te Puleʼaga ʼo Maio 2002 pasina 1) Kua koutou ʼahiʼahi koa te faʼahi ʼaia? Ka koutou teuteuʼi hakotou ʼaʼahi, koutou filifili ʼi te pepa ʼaē ʼe ʼalutahi mo Te Minisitelio ʼo Sanualio 2002, he faʼifaʼitaki ʼe tō lelei mo takotou ʼaʼahi. ʼE lahi te ʼu faʼifaʼitaki ʼi te pepa ʼaia, ʼe ina faka faigafua anai ke tou palalau fakahagatonu ki te kaupepa Fakamaʼua, peʼe ko te tohi ʼAtamai Mālama. Koutou akoako lelei te faʼifaʼitaki ʼaia, ke faigafua ai hakotou hoko atu takotou fai palalau ki he palakalafe e tahi ʼo te kaupepa peʼe ko te tohi. Koutou filifili he vaega e tahi peʼe lua ʼi te palakalafe ʼaē ka koutou lau pea mo fai palalau kiai, pea mo teuteuʼi he fehuʼi moʼo fakaʼosi ʼaki te fai palalau ʼaia. ʼAki te faʼahiga fai ʼaia, ʼe feala anai ʼi takotou tahi ʼaʼahi, ke koutou tali kiai ʼi te palakalafe ʼaē ka koutou fakatuʼutuʼu ke koutou vakaʼi fakatahi.
7 ʼE lahi te ʼu tapuaki ʼe maʼu e te hahaʼi ʼa Sehova, ʼuhi ko tanatou ako te lea maʼa. ʼOfa pe ke tou faʼafai moʼo tokoni ki te hahaʼi ke nātou fakatahi mai kia tatou moʼo “pāui fuli ki te huafa ʼo Sehova” pea mo tou “tauhi fakatahi kia te ia.”—Sofo. 3:9.