He ʼu Manatu ʼo ʼUhiga Mo Te ʼu Nusipepa

Te Tule Leʼo ʼaho 15 ʼo Sep.

“ ʼI te temi ʼaenī, ʼe hage maʼa ʼihi hahaʼi ʼe nātou pilisoni ʼi he maʼuli faka taumatuʼa ʼe mole kei maʼu ai te ʼofa. Ko te hahaʼi ʼaē ʼe nātou nonofo ʼi te ʼaluʼaga ʼaia, ʼe nātou lava kumi tokoni kifea? [Tuku ke fai mai hana tali.] ʼE fakamoʼoni mai e te Tohi-Tapu ʼe lava tokoni mai te ʼu pelesepeto ʼa te ʼAtua. [Lau age ia Isaia 48:17, 18.] ʼE fakahā e Te Tule Leʼo ʼaenī ia te ʼu pelesepeto faka Tohi-Tapu ʼe feala ke fakamālohiʼi ai te nofo faka taumatuʼa.”

Réveillez-vous ! ʼaho 22 ʼo Sep.

“ ʼE tou punamaʼuli ki te fealagia ʼaē ʼe maʼu e te ʼu manu ke nātou felogoi. Kae ʼe ke ʼiloʼi koa ʼe ʼi ai te ʼu faʼahi ʼe makehe ai te tagata? [Tuku ke fai mai hana tali. Lau age ia Pesalemo 65:2.] ʼE mole tou hage ko te ʼu manu, koteʼuhi ko tatou ʼe tou fia felogoi mo te ʼAtua. ʼE fakamatala e te nusipepa ʼaenī peʼe feafeaʼi hatatou lava felogoi lelei mo te hahaʼi pea mo te ʼAtua.”

Te Tule Leʼo ʼaho 1 ʼo ʼOke.

“Kua ke fai koa te fehuʼi ʼaenī, ‘Kapau ʼe maʼuli moʼoni he ʼAtua ʼofa pea mo mālohi, he koʼe koa ʼe mole ina fai he puleʼaki maʼa te hahaʼi ʼaē ʼe maʼuli mamahi?’ [Tuku ke fai mai hana tali.] Kua vave pe anai tana fakagata te ʼu fihifihia fuli. [Lau age ia Isaia 65:17.] Kae ohage ko tona fakahā e te nusipepa ʼaenī, ʼe mole feala ke tou ʼui ko te ʼAtua ʼe mole ina tokagaʼi totatou ʼu mamahi.”

Réveillez-vous ! ʼaho 8 ʼo ʼOke.

“Kua ke logo koa ki te kua faigataʼa maʼa te hahaʼi ʼaē ʼe gāue kele hanatou hoko atu tanatou gāue ʼaia moʼo taupau tonatou maʼuli? [Tuku ke fai mai hana tali.] ʼE fakamatala e te Réveillez-vous ! ʼaenī ia te fihifihia ʼaia, ʼo feiā mo te fakapapau ʼaē ʼe fai mai e te Tohi-Tapu ʼo ʼuhiga mo he ʼu temi ʼe lelei age ki te temi ka haʼu. [Lau age ia Pesalemo 72:16.] Ka ʼau liliu mai anai, ʼe ʼau fakaʼamu ke ʼau fakamahino atu peʼe fakahoko feafeaʼi anai e te ʼAtua ia te fakapapau ʼaia.”