Te Meʼa Kai Fakalaumālie ʼi Tona Temi Totonu
1. ʼE hoko feafeaʼi ia Esekiele 36:29 ia ʼaho nei?
1 Neʼe ʼui fēnei e te Tuʼi ʼAliki ko Sehova: “ ʼE ʼau pauʼi anai ki te fulumeto pea mo ʼau faka mahu, pea ʼe mole ʼau tuku atu anai he hoge.” (Esk. 36:29) Ko te ʼu folafola faka polofeta ʼaia ʼe hoko ki te hahaʼi ʼa te ʼAtua ia ʼaho nei. ʼI hona ʼaluʼaga fakatātā, neʼe fakatupu e Sehova te fulumeto ʼo ina foaki lahi ki tana hahaʼi. ʼE tou sio lelei ki te faʼahi ʼaia ʼi tatatou ʼu fakatahi faka tisitilike ʼaē ʼe foaki mai ai te meʼa kai fakalaumālie ʼi tona temi totonu.
2. Neʼe fakaʼaogaʼi feafeaʼi e Sehova te ʼu fakatahi faka tisitilike moʼo tufa ai te meʼa kai fakalaumālie ʼi tona temi totonu?
2 ʼI te fakatahi ʼaē neʼe fai ʼi Columbus, ʼi Ohio ʼi te taʼu 1931, neʼe takitaki e Sehova tana kau ʼatolasio ke nātou toʼo te higoa foʼou—te kau Fakamoʼoni ʼa Sehova. (Isa. 43:10-12) ʼI te taʼu 1935, neʼe ʼiloʼi lelei ai peʼe ko ai te toe hahaʼi tokolahi ʼaē ʼe talanoa ki ai ia Apokalipesi 7:9-17. ʼI te taʼu 1942, neʼe fai e te Tēhina ko Knorr te akonaki ʼaē ko tona kupu tāfito “ ʼE Tologa Anai Koa Te Tokalelei?” Neʼe foaki e te akonaki ʼaia he lotomālohi ki te nofoʼaki ke nātou fai te gāue fai faka mafola pea neʼe iku ai ki te fakatuʼu ʼo te Faleako Faka Tohi-Tapu ʼo Kalaate ʼo Watchtower. Logola neʼe ʼi ai te tahi ʼu fakatahi neʼe makehe, kae ko te ʼu fakatahi fuli ʼaia neʼe hage ko he laupapa neʼe mahu ai te meʼa kai fakalaumālie neʼe foaki ʼi tona temi totonu.—Pes. 23:5; Mat. 24:45.
3. Koteā ʼaē ʼe tonu ke tou fai ke feala hatatou kai te meʼa kai fakalaumālie ʼi tatatou fakatahi faka tisitilike?
3 ʼE Koutou Kai Lelei Koa? ʼE feala ke mahu te meʼa kai kae mole lelei tatatou kai, mo kapau ʼe mole tou faiga ke tou kakai. (Taag. 26:15) ʼE toe moʼoni ʼi te faʼahi fakalaumālie. ʼI ʼihi fakatahi, neʼe tou sio ki te tokolahi ʼe nātou haʼele ʼi tuʼa peʼe nātou fai palalau mo ʼihi lolotoga te polokalama. Logola ko tatatou fakakaugā lelei ʼe ko he faʼahi maʼuhiga ʼo te fakatahi, kae ʼe tou fai anai te meʼa ʼaia ʼi muʼa pea ʼi te hili ʼo te polokalama. (Tnk. 3:1, 7) Kapau ʼe mole tou heheka ʼo fakalogo lelei, pea ʼe mole tou logo anai ki he manatu maʼuhiga. ʼE tonu ke heheka fakatahi te ʼu famili kae mole nātou tuku tanatou fānau, ʼo feiā mo nātou ʼaē kua tūpulaga, ke nātou heheka mo he tahi kau tūpulaga. ʼI ʼihi temi ko te ʼu tagata taupau ʼo te fakatahi pea mo te ʼu tēhina ʼaē ʼe ʼi ai tonatou ʼu maʼua, ʼe lagi tonu ke nātou palalau ki te ʼu faʼahi ʼo te fakatahi lolotoga te fai ʼo te polokalama. Kae kapau ʼe mole nātou fai ni ʼu faʼahi feiā, pea ʼe tonu ke nātou tuku he faʼifaʼitaki ʼo nātou fakalogo lelei te polokalama. Tou matehi tatatou ʼu telefoni feʼaveʼaki ke mole tagi lolotoga te polokalama. ʼE tonu ke tou kai fuli te meʼa kai fakalaumālie ʼaē ka foaki mai.—1 Ko. 10:12; Filp. 2:12.
4. ʼE tou lava fakahā feafeaʼi tatatou fakafetaʼi ki te meʼa kai fakalaumālie lahi ʼaē ʼe foaki mai e Sehova?
4 ʼE tou fiafia ʼi te ʼu tuʼuga moʼoni fakalaumālie ʼaē ʼe foaki mai e Sehova, ʼaē ʼe mole hage ko te ʼu akonaki hala ʼo te Keletiate, ʼaē ʼe mole maʼu ai he fua lelei! (Isa. 65:13, 14) ʼE feala ke tou ‘fakahā tatatou fakafetaʼi’ mo kapau ʼe tou manatu ko te fakatahi ʼe ko he faigamālie ʼaia ke akoʼi tatou e Sehova. (Kol. 3:15) Koutou manatuʼi ko te akonaki ʼa te tēhina ʼe ko te ʼu manatu ʼe haʼu mai tatatou “Faiako Lahi.” (Isa. 30:20, 21; 54:13) Koia, koutou fakalogo fakalelei, pea mo koutou toʼo fakanounou te ʼu manatu tāfito. Koutou toe vakaʼi te ʼu manatu tāfito ʼo te polokalama ʼi te afiafi fuli. Koutou maʼuliʼi te ʼu meʼa neʼe koutou ako.
5. He koʼe ʼe tou fiafia ʼi te ʼu fakatahi faka tisitilike?
5 ʼE tou mālo ia Satana, ʼi te ʼu fakatahi fuli ʼaē ʼe fai ʼi muʼa ʼo Halamaketone, peʼe fai ʼi he fale pilisoni, peʼe ʼi he fenua ʼe lolotoga tau, peʼe ʼi he koga meʼa lahi mo tokalelei! ʼUhi ko tatou ko he fale tautēhina logo tahi, ʼe maʼuhiga kia tatou te faigamālie ʼaē ʼe tou maʼu ke tou fakatahitahi ʼi te ʼu fakatahi faka tisitilike. (Esk. 36:38) ʼE tou falala ʼe toe foaki ʼofa mai anai e Sehova te “meʼa kai ʼi tona temi totonu.”—Luka 12:42, MN.
[Talanoa ʼo te pasina 4]
Koutou Fakafetaʼi Ki Te Meʼa Kai ʼAē ʼe Foaki Mai e Sehova
◼ Koutou fakalogo lelei
◼ Koutou tohi te ʼu manatu tāfito
◼ Koutou toe vakaʼi te ʼu manatu tāfito ʼo te polokalama ʼi te ʼafiafi fuli
◼ Koutou maʼuliʼi te ʼu meʼa ʼaē neʼe koutou ako