Tou Uga Te Fia Logo ʼa Te Hahaʼi ʼAē ʼe Tou ʼAve Tuʼumaʼu Tanatou ʼu Nusipepa
1. E feafeaʼi hatatou uga he tahi ke fia logo mokā tou ʼave tuʼumaʼu tana ʼu nusipepa?
1 Tokolahi te hahaʼi ʼe tou maʼu ʼi te minisitelio ʼe nātou tali lelei ke tou ʼaʼahi ia nātou, pea mo nātou tali tatatou ʼu tohi, kae ʼe kei nātou lotolotolua ke fai hanatou ako Tohi-Tapu. Moʼo taupau tanatou fia logo, koutou ʼave tuʼumaʼu tanatou ʼu nusipepa. Ka koutou tuku he ʼu nusipepa, koutou tohi te higoa pea mo te tuʼasila ʼo te hahaʼi ʼaia, mo te ʼaho ʼo te ʼaʼahi, mo te ʼu nusipepa ʼaē neʼe nātou toʼo, pea mo te vaega Tohi-Tapu ʼaē neʼe koutou fai palalau kiai, pea mo te ʼu meʼa fuli ʼaē neʼe koutou fakatokagaʼi ai tanatou fia logo. Ka tau atu takotou ʼu nusipepa foʼou, koutou kumi he ʼu puani ʼe ina fia lau anai, pea mo koutou talanoa kiai mokā koutou fai ia te ʼaʼahi. (1 Ko. 9:19-23) ʼAki te temi, ʼe ina lau anai he puani ʼe ina leleiʼia ʼi tatatou ʼu nusipepa, pea mo tupu ai anai hana fia mahino lelei age.
2. Ohage ko tona ʼui ʼi te Tohi-Tapu, he koʼe ʼe tonu ʼi te temi nei ke foimo kumi ia Sehova e te hahaʼi, pea koteā he tahi meʼa ʼe feala ke tou fai moʼo tokoni kiā nātou?
2 ʼE mahino kiā tatou ko te tokolahi ʼo te hahaʼi ʼe mole nātou liliu anai ko he ʼu kaugana ʼa Sehova ʼaki pe tanatou lau ia te ʼu nusipepa. Kapau ʼi te temi nei ʼe tonu ke foimo kumi e te hahaʼi ia Sehova, pea koteā he tahi meʼa ʼe feala ke tou fai moʼo tokoni kiā nātou? (Sofo. 2:2, 3; Apk. 14:6, 7) ʼE feala ke tou taupau te fia logo ʼa te hahaʼi mokā tou filifili lelei he vaega faka Tohi-Tapu ke tou talanoa kiai mokā tou ʼave tanatou ʼu nusipepa foʼou.
3. (a) E feafeaʼi hatatou teuteuʼi he fai palalau ʼe fakatafito ki he vaega Tohi-Tapu? (b) Ko te ʼu faʼahi fea ʼaē ʼe fia palalau tāfito kiai te hahaʼi ʼo tokotou telituale?
3 Ko He Fai Palalau ʼe Fakatafito Ki He Vaega Tohi-Tapu e Tahi: Koutou manatuʼi ia nātou ʼaē ʼe koutou ʼave tuʼumaʼu ki ai tanatou ʼu nusipepa, pea koutou teuteuʼi fakalelei he fai palalau ʼe fakatafito ki he vaega Tohi-Tapu, ʼo mulimuli ki te ʼu meʼa ʼaē ʼe ʼaoga kiā nātou takitokotahi. (Filp. 2:4) Ohage la, kapau ko he tahi neʼe hoki mate age pe hona kāiga neʼe ʼofa ki ai, ʼe lagi koutou ʼaʼahi liuliuga anai ia ia moʼo fakahā age te manatu ʼa te Tohi-Tapu ʼo ʼuhiga mo te kau mate pea mo te ʼamanaki ʼo ʼuhiga mo te fakatuʼuake. Moʼo teuteuʼi te ʼu fai palalau ʼaia, ʼe feala ke koutou fakaʼaogaʼi te kapite 9 ʼo te tohi Te ʼAtamai Mālama ʼaē ko tona kupu tāfito ʼaenī “Koteā Te Meʼa ʼe Hoko Ki Te ʼu Mate ʼAē ʼe Tou ʼOʼofa Mamahi Ai?” ʼO oloi ʼaki kiai te ʼu fai palalau ʼo ʼuhiga mo te mahaki, te mātutuʼa, pea mo te pulihi kātoa ʼo te mate. Ko te meʼa ʼaē ʼe maʼuhiga, ko tata ʼiloʼi te meʼa ʼaē ʼe fia palalau kiai te hahaʼi, pea ke kita fakahā māmālie age kiā nātou ia te manatu ʼi te Tohi-Tapu ʼo ʼuhiga mo te faʼahi ʼaia.
4. He koʼe ʼe maʼuhiga ke koutou fakamahino mokā koutou lau he vaega faka Tohi-Tapu, pea ʼe tou lava fai feafeaʼi ia te faʼahi ʼaia?
4 Koutou Fakamahino: Logola ʼi te agamāhani ʼe lelei age hata faka faigafua pea mo fakanounou ia te ʼu fai palalau ʼaia, kae ʼe toe maʼuhiga foki ke kita lau age he vaega faka Tohi-Tapu neʼe kita filifili. Ko Satana ʼe ina fakahēʼi te fakakaukau ʼo te hahaʼi ʼo ʼuhiga mo te logo lelei. (2 Ko. 4:3, 4) Māʼiape la mo nātou ʼaē ʼe nātou ʼiloʼi ia te Tohi-Tapu ʼe ʼaoga kiā nātou he tokoni ke nātou mahino kiai. (Gaue 8:30, 31) Koia, tou toʼo he temi moʼo fakamahino lelei te ʼu vaega, ohage ko te ʼu kiʼi fai palalau ʼaē ʼe koutou fai ʼi te Ako Faka Teokalatike. (Gaue 17:3) Koutou faiga ke mahino lelei ki ai ʼe ʼaoga te Folafola ʼa te ʼAtua ki tona maʼuli.
5. ʼE lava feafeaʼi ki he tahi ʼe koutou ʼave tuʼumaʼu ki ai hana ʼu nusipepa ke liliu ko he ako Tohi-Tapu?
5 Kapau ʼe ina leleiʼia te ʼu meʼa ʼaē ʼe ina ako, pea ʼe feala māmālie pe ke koutou lau age he ʼu vaega e lua peʼe tolu mokā koutou ʼaʼahi nātou. Koutou faigaʼi ke koutou tuku age te kaupepa Fakamaʼua peʼe ko te tohi Te ʼAtamai Mālama. ʼE feala anai ʼaki te temi ke liliu ia ia ʼaē ʼe koutou ʼave tuʼumaʼu ki ai hana ʼu nusipepa, ke fai hana ako Tohi-Tapu.