ʼE Tou Tuʼu Maʼua Ki Te Hahaʼi
1 Ko te fai faka mafola ʼa te ʼapositolo ko Paulo ki te hahaʼi neʼe hage kiā ia ko hona maʼua. Neʼe mahino kiā ia, ʼaki te taʼataʼa maʼuhiga ʼo te ʼAlo ʼo Sehova kua faka fealagia e Sehova ki te hahaʼi fuape ke hāofaki ia nātou. (1 Tim. 2:3-6) Koia, neʼe ʼui fēnei ai e Paulo: “ ʼE ʼi ai toku maʼua ki te hahaʼi Keleka pea mo te hahaʼi Matāpule, ki te hahaʼi ʼatamai pea mo nātou ʼe vavale.” Neʼe gāue kinakina moʼo huʼi ʼo tona maʼua ki te hahaʼi, ʼo ina faka mafola te logo lelei kiā nātou.—Loma 1:14, 15, MN.
2 Ohage ko Paulo, ia ʼaho nei ʼi te ʼu faigamālie fuli ko te kau Kilisitiano ʼe nātou faka mafola ia te logo lelei ki tonatou ʼu tatau. ʼI te kua vave hoko mai ʼo te mamahi lahi, kua maʼuhiga ʼaupito ʼi te temi nei ke tou kumi ia te hahaʼi ʼaē ʼe agatonu. Kapau ʼe tou ʼofa moʼoni ki te hahaʼi, pea ʼe tou faiga mālohi anai ʼo fakahoko ia tatatou gāue hāofaki.—Mat. 24:21; Esk. 33:8.
3 Tou ʼĀteaina Mai Totatou Maʼua: Ko te fai faka mafola ʼi te ʼu ʼapi ʼe ko te puleʼaki tāfito ʼaia ke tou maʼu ia te hahaʼi. ʼI te ʼu telituale ʼaē ʼe kaugamālie te hahaʼi ʼe mole tou maʼu atu ki ʼonatou ʼapi, tou tohi fakalelei ia te faʼahi ʼaia ki tatatou ʼu kaupepa faitohi nota pea tou toe liliu ʼi he tahi age temi ʼe feala ai ke tou maʼu nātou. (1 Ko. 10:33) Tou toe fagonogono ʼi te ʼu telituale ʼaē ʼe gāue ai te hahaʼi, ʼi te ʼu ala, ʼi te ʼu ʼōloto, mo te ʼu taulaga motokā, pea mo toe fakaʼaogaʼi mo te telefoni heʼe feala ai ke tou maʼu te hahaʼi. Tou fai ia te fehuʼi ʼaenī: ‘ ʼE au faiga fakamalotoloto koa ke au fai faka mafola ʼi te ʼu faigamālie fuli moʼo fakahā ia te logo ʼo te hāofaki?’—Mat. 10:11.
4 Ko te tuagaʼane pionie neʼe ina fia maʼu ia te hahaʼi fuli ʼo tona telituale. Ko te tahi ʼapi neʼe māpunu tuʼumaʼu ia te ʼu matapā fakamālama, pea mo lāvaki. Kae ʼi te tahi ʼaho neʼe mole fai faka mafola ai te tuagaʼane, neʼe ina fakatokagaʼi ʼe tau ia te motokā ʼi te muʼa fale ʼo te ʼapi ʼaia ʼaē ʼe lāvaki tuʼumaʼu. ʼAki te faigamālie ʼaia kua ina maʼu, neʼe ʼalu ʼo lomi te sonete ʼo te ʼapi. Pea neʼe tali mai e te tagata, pea ʼaki te ʼuluaki fai palalau ʼaia, neʼe ʼi ai te tahi ʼu fai palalau neʼe fai ki muli age e te tuagaʼane ʼaia pea mo tona ʼohoana. ʼOsi ʼaia, neʼe tali e te tagata ke fai hana ako Tohi-Tapu, pea ʼi te temi nei kua papitema ko te tēhina. Neʼe loto fakafetaʼi te tēhina ki te tuagaʼane, ʼi tana mahino ʼaē ʼe ko tona maʼua ke faka mafola ki te hahaʼi.
5 ʼI te kua nounou ʼo te temi, tou tōkakaga ʼo tou huʼi totatou maʼua ʼaē ki totatou tatau, ʼo tou faʼa fai faka mafola kiā nātou.—2 Ko. 6:1, 2.