He ʼu Manatu ʼo ʼUhiga Mo Te ʼu Nusipepa

Te Tule Leʼo ʼaho 1 ʼo ʼOke.

“Moʼo ʼutakiʼi ʼo te ʼu ʼahiʼahi ʼaē ʼe hoko kiā tātou takitokotahi, ʼe ʼaoga ke tou lototoʼa. Kae ʼe tou lava maʼu feafeaʼi he lototoʼa? [Tuku ke fai mai hana tali.] ʼI tau manatu, ʼe mole tou maʼu anai koa he lototoʼa mo kapau ʼe tou tui ki te ʼAtua? [Pea kotou lau age ia Pesalemo 27:14 pea mo fuli age ia te pāsina 26 ʼo te nusipepa.] ʼE fakamahino mai ʼi te nusipepa ʼaenī, peʼe koteā ʼaē ʼe tonu ke tou fai ke tou falala kiā Sehova pea mo tou lototoʼa.”

Réveillez-vous! ʼo ʼOke.

“Tokolahi iā tātou, kua mate he tahi neʼe tou ʼoʼofa mamahi ai. ʼI tau manatu, ʼe tou lava fai koa he ʼu meʼa moʼo tokoni kiā nātou ʼi tanatou ʼosi mate? [Tuku ke fai mai hana tali.] ʼE ke maʼu anai ʼi te alatike ʼaenī te tali ʼa te Tohi-Tapu ʼo ʼuhiga mo te fehuʼi ʼaia, pea mo te fakapapau fakaloto fīmālie ʼaenī.” Lau age ia Soane 5:​28, 29. Pea fakahāhā age ia te alatike ʼaē ʼe kamata ʼi te pāsina 10.

Te Tule Leʼo ʼaho 1 ʼo Nov.

“ ʼE mole māu ia te ʼu manatu kehekehe iā ʼaho nei, ʼo ʼuhiga mo te taupau fānau. ʼI tau manatu, ʼe lava maʼu koa e te ʼu mātuʼa he ʼu tokoni ʼe natou lava falala kiai? [Tuku ke fai mai hana tali. Pea kotou lau age ia Pesalemo 32:8.] ʼE ke maʼu anai ʼi te nusipepa ʼaenī ia te ʼu tokoni faka Tohi-Tapu ʼe ʼaoga ki te taupau fānau.”

Réveillez-vous! ʼo Nov.

“Neʼe kua ke feʼekeʼaki koa peʼe he koʼe ʼe lahi ia te ʼu mamahi, kae ʼe ʼi ai te ʼAtua ʼofa, mo faitotonu, pea mo māfimāfi? [Tuku ke fai mai hana tali.] Koʼenī te manatu ʼaē ʼe fakahā mai ʼi te Tohi-Tapu ʼo ʼuhiga mo te ʼu tupuʼaga ʼo te maʼuli mamahi ʼa te hahaʼi. [Lau age ia 1 Soane 5:19.] ʼE ke maʼu anai ʼi te nusipepa ʼaenī, ia te ʼu fakamahino faka Tohi-Tapu ki te ʼu gāue ʼaē kā fai anai e te ʼAtua moʼo molehi ia te ʼu mamahi.”