Te Polokalama ʼo Te Fakatahi Faka Silikō ʼAē Kā Hoko Mai
ʼE tāu mo feʼauga ke faka kolōliaʼi ia Sehova. ʼE lava feafeaʼi hatatou faka kolōliaʼi ia Sehova? Koteā ʼaē ʼe faigataʼa ai ki niʼihi ke natou faka kolōliaʼi ai ia Sehova? Koteā te ʼu tapuakina ʼe maʼu e nātou ʼaē ʼe natou faka kolōliaʼi te ʼAtua ʼi te temi nei? ʼI te polokalama ʼo te fakatahi faka silikō ʼo te taʼu 2008 ʼe tali anai ki te ʼu fehuʼi ʼaia. Ko tona kupu tāfito “Kotou Fai Ia Meʼa Fuli Moʼo Faka Kolōliaʼi Te ʼAtua.” (1 Ko. 10:31) Tou vakaʼi pē koteā ʼaē kā tou logo anai kiai ʼi te ʼu ʼaho ʼaia e lua kā hoko mai, ʼaē ʼe lahi ai anai tatatou ako ʼi te faʼahi fakalaumālie.
ʼE talanoa anai te taupau faka tisitilike ki te ʼu kupu tāfito ʼaenī “He Koʼē ʼe Tonu Ke Faka Kolōliaʼi Te ʼAtua?” pea “Tou Liliu Ko He ʼu Faʼifaʼitaki ʼo Tou Fakahoko Te ʼu Fakamaʼua ʼa Te ʼAtua.” ʼE ina fai anai te akonaki ki te hahaʼi fuli, ʼaē ko tona kupu tāfito “Ko Ai Te Hahaʼi ʼAē ʼe Natou Faka Kolōliaʼi Te ʼAtua?” pea mo te akonaki fakaʼosi, “Tou Faka Kolōliaʼi Te ʼAtua ʼi Te Logo Tahi ʼi Te Mālamanei Kātoa.” ʼE ina toe takitaki anai mo te Ako Faka Teokalatike. Ko te taupau faka silikō ʼe talanoa anai ki te ʼu kupu tāfito ʼaenī: “Tou Fiafia ʼi Te Fakatapa ʼo Te Kolōlia ʼa Te ʼAtua,” mo te akonaki “Te ʼu Meʼa ʼAē ʼe ʼAoga Ki Te Silikō,” pea mo te akonaki “Tou Haga ‘Nonofo Mālohi ʼi Te Moʼoni,’ ” ʼaē ʼe fakatafito kiā 2 Petelo 1:12. Tahi ʼaē meʼa, ʼe tou ako anai “Ko Te Gāue Pioniē ʼe Ina Faka Kolōliaʼi Te ʼAtua.” Ko te ʼuluaki akonaki kā fai ʼe vaevae anai tona ʼu koga tāfito, ko te kupu tāfito ʼaenī “Tou Faka Kolōliaʼi Te ʼAtua ʼi Te ʼu Faʼahi Fuli ʼo Totatou Maʼuli” ʼe sivisivi ai anai te loloto ʼo te ʼu palalau ʼaē ʼe tou maʼu iā 1 Kolonito 10:31. Ko te tahi akonaki ʼaē kā vaevae anai tona koga tāfito ko tona kupu tāfito “Tou Foaki He Tauhi Taputapu Moʼo Fakavikiviki Kiā Sehova” ʼe fakahā ai anai he ʼu faʼahi kehekehe ʼo tatatou tauhi. ʼE fai anai te fakamatala fakanounou ʼo Te Tule Leʼo pea mo te fai palalau ki te koga tohi ʼi te ʼAhotapu. ʼE ʼi ai anai mo te ʼu papitema.
Tokolahi te hahaʼi ʼi te mālamanei ʼe mole natou fia tui ʼe maʼuli moʼoni te ʼAtua. Pea tokolahi te hahaʼi ʼe natou tōkakaga fau ki te ʼu fakatuʼutuʼu fakatagata, ʼo mole natou fakakaukauʼi ai ki te kolōlia ʼo Sehova. (Soa. 5:44) Kae ʼe tou tui papau tātou ki te maʼuhiga ʼo te fakaʼaogaʼi ʼo totatou temi moʼo vakavakaʼi peʼe feafeaʼi hatatou lava ‘fai ia meʼa fuli moʼo faka kolōliaʼi ia te ʼAtua.’ Kotou fakatuʼutuʼu ke kotou kau ki te polokalama kātoa pea mo kotou maʼu ai he ʼu tapuakina.