Te Polokalama ʼo Te Fakatahi Fakasilikō ʼAē Kā Hoko Mai
ʼE feafeaʼi hatatou tutuʼu mālohi iā muʼa ʼo nātou ʼaē ʼe fakafeagai mālohi ki te tauhi moʼoni? ʼE feafeaʼi hatatou tauʼi ia te ʼu faiga tuʼumaʼu ʼaē ʼa Satana ke ina ʼahiʼahiʼi tātou ke tou toe liliu ki te mālama aga heʼe lotu ʼaenī? ʼI te polokalama ʼo te fakatahi fakasilikō ʼo te taʼu gāue 2009, ʼe tali anai ki te ʼu fehuʼi maʼuhiga ʼaia. Ko tona kupu tāfito “Haga Mālo Aipē ʼi Te Agakovi ʼAki Te Agalelei.” (Loma 12:21) Tou vakaʼi age muʼa ia te ʼu akonaki ʼaē kā tou logo anai kiai ʼi te fakatahi ʼaia.
ʼE fai anai e te taupau ʼo te tisitilike ia te ʼu akonaki ʼaenī: “Neʼe Fakamālohiʼi Ke Mālo ʼi Te Agakovi ʼAki Te Agalelei,” “Kotou Tōkakaga Naʼa Kotou Falala Fau Kiā Koutou Totonu!” “Kua Vave Fakagata Ia Te ʼu Agakovi Fuli!” pea mo te akonaki “Tou Fakamālohiʼi Ia Tatatou Tui Ke Tou Mālo ʼi Te Mālamanei.” ʼE talanoa anai ia te taupau ʼo te silikō ki te ʼu kupu tāfito ʼaenī: “Ko Te Temi ʼAenī Ke Tou Nonofo ʼAʼala Ai!” pea ʼe fakatafito ki te koga tohi ʼo Loma 13:11-13, pea mo te kupu tāfito ʼaenī: “ ʼAua Naʼa Kotou Lotovaivai ʼi Te ʼAho ʼo Te Mamahi,” pea ʼe fakatafito ki te koga tohi ʼo Tāʼaga Lea 24:10. ʼE tou toe fakaʼatalitali fakafiafia anai ki te akonaki ʼaē kā fai anai e te taupau ʼo te silikō, ʼaē ko tona kupu tāfito ʼaenī: “Tou Vakaʼi Ia Te ʼu Faʼahi ʼAē ʼe ʼAoga Ki Te Silikō.” Ko te tahi akonaki fakalotomālohi, “ ʼE Feala Koa Ke Kotou Tokaga ‘Ki Te Minisitelio ʼAia’—ʼo Kotou Pioniē?” Ko te kupu tāfito ʼo te ʼuluaki akonaki ʼaē ʼe koga fā, “Kotou Tutuʼu Mālohi ʼo Fakafeagai Ki Te ʼu Kākā ʼa Te Tēvolo.” ʼE tokoni mai anai kiā tātou ke tou ʼiloʼi pea mo tou liʼaki ia te ʼu kākā ʼa te Tēvolo ʼi te ʼu ʼaluʼaga fakatekenolosia, ʼi te ʼu fakafiafia pea mo te ako. ʼI te lua akonaki ʼaē ʼe koga fā “Kotou Maʼu Ia Te Mālohi Moʼo Tekeʼi Ia Te ʼAho ʼo Te Agakovi ʼAia” ʼe ina fakahā mai anai kiā tātou, peʼe feafeaʼi ia hatatou maʼuliʼi ke lelei age ia te ʼu tokoni fuli ʼaē ʼe tuʼu iā Efesi 6:10-18.
ʼE ʼi ai te pikipikiga tāfito ʼo te mālo ʼi te agakovi pea mo te fakamafola ia te logo lelei ʼo te Puleʼaga. (Fakh. 12:17) ʼE mole tou punamaʼuli ki te faiga tuʼumaʼu ʼaē ʼa Satana ke ina ʼohofi ia te kau Fakamoʼoni ʼa Sehova! (Isa. 43:10, 12) Kae ʼe mole mālo anai ia te Tēvolo koteʼuhi neʼe tou fakatotonu ke tou “haga mālo aipē ʼi te agakovi ʼaki te agalelei.” Kotou fai hakotou ʼu fakatuʼutuʼu ke kotou maʼu kātoa ia te ʼu fua lelei ʼo te ʼu koga e fā ʼo te fakatahi fakasilikō ʼaia.