Te Polokalama ʼo Te Fakatahi Makehe ʼAho Tahi ʼAē Kā Hoko Mai
Ko te kupu tāfito ʼo te polokalama ʼo te fakatahi makehe ʼaho tahi ʼo te taʼu 2008: “Ko Tātou Ko Te Kele—Ko Sehova Totatou Tufuga Faʼu ʼIpu,” ʼe fakatafito kiā Isaia 64:8. Ko te ʼu tokoni faka Tohi-Tapu ʼaē kā tou maʼu ʼi te polokalama ʼaia, ʼe ina fakatuputupu anai tatatou leleiʼia ia te poto ʼo Sehova, mo tona faitotonu, mo tona mālohi, pea mo tona ʼofa ʼi tona ʼuhiga Tufuga Faʼu ʼIpu Lahi.
Ko te akonaki ʼo te taupau faka silikō, ʼaē ko tona kupu tāfito “Tou Tauhi ʼi Te Minisitelio ʼi Totatou ʼUhiga ʼIpu Fakaʼapaʼapaʼia,” ʼe fakahā ai ia te kaugamālie ʼo nātou ʼaē ʼe natou maʼu te ʼu tapuakina lahi ʼi tanatou ʼiloʼi te moʼoni pea mo tanatou vaevae mo te hahaʼi. Ko te akonaki ʼaē ko tona kupu tāfito “Ko Te Metitāsio ʼe Ina Haofaki Anai Ia Koutou,” ʼe fakahā anai peʼe lava puipui feafeaʼi tātou e te metitāsioʼi ʼo te ʼu pelesepeto ʼa Sehova. Ko te tehina ʼaē ʼe ina ʼaʼahi te fakatahi ʼe talanoa anai ki te nofoʼaki ʼi te ʼu kupu tāfito ʼaenī: “ ʼAua Naʼa Tou ‘Mulimuli Ki Te Tuʼu ʼAenī’ ” pea “Ke Faʼufaʼu Tātou e Te Tufuga Faʼu ʼIpu Lahi.” Ko te ʼu mātuʼa pea mo te kau tūpulaga ʼe fakaloto mālohiʼi anai nātou ʼaki te ʼu akonaki ʼaenī: “Ko He Kau Tūpulaga ʼe Natou ʼAoga Kiā Sehova” pea “Te Gāue Maʼuhiga ʼa Te ʼu Mātuʼa ʼi Te Faʼufaʼu ʼo Te ʼIpu.” ʼAki te ʼu faʼifaʼitaki pea mo te ʼu fakafehufehuʼi, ʼe tou fiafia anai ʼi te fakalogo pea mo te sio ki te ʼu meʼa ʼaē neʼe fakahoko e totatou ʼu tehina mo tuagaʼane ʼi tonatou minisitelio. Ko nātou ʼaē ʼe fia papitema moʼo fakahā kua natou foaki tonatou maʼuli ki te ʼAtua, ʼe tonu ke natou foimo fakahā ki te taupau pelesitā. Kotou ʼaumai takotou Tule Leʼo ʼaē ʼe fai ʼi te vāhaʼa ʼo te fakatahi makehe ʼaho e tahi.
Ko te ʼu fakatuʼutuʼu fuli pē ʼa te Tufuga Faʼu ʼIpu Lahi ʼe ina fakahoko. Kae ʼe fakalogo kiā tātou takitokotahi ke tou tali peʼe kailoa ke ina faʼufaʼu tātou. Ko nātou ʼaē ʼe natou fia fakalogo ki te ʼu lēkula ʼa Sehova pea mo fai he ʼu fetogi, ʼe feala ke faʼufaʼu nātou, mo fakamaʼa, pea mo fetogi nātou ke natou liliu ko he ʼu ʼipu ʼe ʼaoga, ohagē pē ko te moʼi kele ʼi te masini gāue ʼo te tufuga faʼu ʼipu. Kā tou fakalogo kiā Sehova, ʼe tou fakavikiviki ai tana pule faʼitaliha pea mo maʼu ai he ʼu tapuakina lahi.