ʼE Feala Ke Tou Foaki Kiā Sehova
1 ʼE kotou ʼiloʼi koa ʼe feala ki te tagata ke ina foaki he ʼu meʼa ki te ʼAtua? Ko Apele, neʼe ina sākilifisioʼi te ʼu manu ʼaē neʼe lelei ʼaupitō ʼi tana faga manu kiā Sehova, ʼo toe fēia mo te ʼu sākilifisio ʼaē neʼe fai e Noe pea mo Sopo. (Sen. 4:4; 8:20; Sopo 1:5) ʼE mahino ia, ko te ʼu mōlaga ʼaia neʼe mole natou fakakoloaʼia ia te Tupuʼaga, he kua ina maʼu ia meʼa fuli pē. Kae neʼe fakahā e te ʼu sākilifisio ʼaia ia te ʼofa lahi ʼo te ʼu tagata agatonu ʼaia ki te ʼAtua. Iā ʼaho nei, ʼe feala ke tou fakaʼaogaʼi totatou temi, mo totatou mālohi pea mo totatou ʼu koloa moʼo foaki kiā Sehova “he sākilifisio fakavikiviki.”—Hep. 13:15.
2 Totatou Temi: ʼE vikiʼi takotou ‘totogi’ ia te temi ʼaē ʼe kotou fakaʼaogaʼi ki he ʼu meʼa ʼe mole faʼa maʼuhiga, ke lahi age takotou kau ki te minisitelio! (Efe. 5:15, 16) ʼE lagi feala ke tou fetogi tatatou polokalama ke tou pioniē vaeluaʼi temi ʼi he māhina e tahi peʼe laka atu ʼi te taʼu. Peʼe lagi feala ke fualoa age tatatou kau ki te minisitelio ʼi te agamāhani. Ko te hilifaki ʼo he vaeluaʼi hola ʼi te vāhaʼa fuli ʼi te fai fakamafola, ʼe tuputupu ai anai tatatou minisitelio ia hola e lua ʼi te māhina!
3 Totatou Mālohi: Ke tou maʼu he mālohi moʼo fakahoko tatatou minisitelio, ʼe fakamaʼua ke tou tekeʼi ia te ʼu fakafiafia peʼe ko he gāue ʼe tou liliu ai ʼo gaʼegaʼe fau leva, ʼo mole tou lava foaki ai kiā Sehova te meʼa lelei ʼaē ʼe tou maʼu. ʼE toe ʼaoga foki ke ʼaua naʼa tou hoha fau heʼe feala ke “fakamamahiʼi” ai totatou loto, ʼo mole kei tou maʼu ai te mālohi moʼo tauhi ki te ʼAtua. (Taag. 12:25) Tatau aipē pe tou hoha ki he meʼa ʼe totonu, ʼe lelei age ia te ‘tuku tatatou kavega kiā Sehova!’—Pes. 55:22; Filp. 4:6, 7.
4 Totatou ʼu Koloa: ʼE toe feala foki ke tou foaki totatou ʼu koloa moʼo lagolago ki te gāue fai fakamafola. Neʼe fakalotomālohiʼi e Paulo tona ʼu tehina Kilisitiano ke natou fakamāmāhani te “tuku keheʼi he meʼa” ke feala ai hanatou foaki kiā nātou ʼaē ʼi te faigataʼaʼia. (1 Ko. 16:1, 2) ʼO toe fēia pē, ʼe lagi feala ke tou tuku keheʼi he meʼa ʼofa moʼo tokoni ki te ʼu meʼa ʼaē ʼe ʼaoga ki te kōkelekāsio pea mo te gāue fakamālamanei. ʼE leleiʼia e Sehova te meʼa ʼaē ʼe tou foaki ʼaki totatou loto kātoa, tatau aipē peʼe veliveli.—Luka 21:1-4.
5 ʼE lahi te ʼu meʼa ʼaē ʼe foaki mai e Sehova kiā tātou. (Sake 1:17) ʼE tou fakahā totatou loto fakafetaʼi ʼo tou foaki lahi totatou temi, totatou mālohi pea mo ʼihi atu ʼu koloa moʼo tauhi kiā te ia. ʼE fiafia ai ia Sehova, “heʼe ko te ʼAtua ʼe ʼofa kiā ia ʼaē ʼe ina foaki ʼaki te loto fiafia.”—2 Ko. 9:7.