He ʼu Manatu ʼo ʼUhiga Mo Te ʼu Nusipepa

Te Tule Leʼo ʼaho 1 ʼo Malesio

“ ʼI tau manatu ʼe leleiʼia koa e te ʼAtua ia te ʼu lotu fuli? [Tuku ke fai mai hana tali.] Kotou fakatokagaʼi ia te faʼahi ʼaē neʼe tuʼania kiai Sesu ʼi henī. [Kotou lau age ia Mateo 15:8, 9.] ʼI te nusipepa ʼaenī ʼe fakahā ai peʼe tali koa e te ʼAtua ia te ʼu lotu fuli.” Fakahā age ia te ʼalatike ʼaē ʼe tuʼu ʼi te pāsina 9.

Réveillez-vous! ʼo Malesio

“Ko tātou fuli ʼe tou fia maʼu he ʼu kaumeʼa lelei. Koteā ia te ʼu kalitātē ʼaē ʼe maʼuhiga kiā koutou ʼi hokotou kaumeʼa? [Tuku ke fai mai hana tali.] Kotou fakatokagaʼi te fakamatala ʼaenī ʼi te Tohi-Tapu. [Kotou lau age ia Tāʼaga Lea 17:17.] ʼI te nusipepa ʼaenī, ʼe maʼu ai ia te ʼu manatu ʼo ʼuhiga mo te filifili ʼo hotatou ʼu kaumeʼa lelei pea mo tou liliu ko he kaumeʼa lelei ki ʼihi.” Fakahā age ia te ʼalatike ʼaē ʼe kamata ʼi te pāsina 18.

Te Tule Leʼo ʼaho 1 ʼo ʼApelili

“ ʼI tau manatu ko te ʼu meʼa fuli ʼaē ʼe hoko ʼi totatou maʼuli neʼe kua fakatuʼutuʼu fakatomuʼa koa? [Tuku ke fai mai hana tali.] Kotou fakatokagaʼi peʼe koteā ʼaē ʼe ʼui ʼi te Tohi-Tapu ʼo ʼuhiga mo te faʼahi ʼaia. [Kotou lau age ia Tagata Tānaki 9:11.] ʼI te nusipepa ʼaenī ʼe fakamahino ai, logopē lā neʼe kua fakatuʼutuʼu fakatomuʼa e te ʼAtua ia te kā haʼu taulekaleka ʼo te kele, kae ʼe ina tuku kiā tātou takitokotahi ke tou filifili ia te ʼaluʼaga ʼo totatou maʼuli.”

Réveillez-vous! ʼo ʼApelili

“Tokolahi te kau tamaliki ako ʼe natou lotohoha. ʼI tau manatu kua fetogi koa ia te ʼu ʼaluʼaga talu mai te temi ʼo tanatou ʼu mātuʼa? [Tuku ke fai mai hana tali.] Ko te mālohi ʼo te lotohoha ʼe feala ke ina fakatupu he ʼu meʼa ʼe kovi. [Kotou lau age ia Tagata Tānaki 7:7a.] ʼI te nusipepa ʼaenī, ʼe talanoa ai peʼe feafeaʼi ki te hahaʼi lalahi hanatou tokoni ki te kau tūpulaga ke natou tauʼi ia te faʼahi ʼaia.”