He ʼu Manatu ʼo ʼUhiga Mo Te ʼu Nusipepa
Te Tule Leʼo ʼaho 1 ʼo ʼOketopeli
“ ʼE ʼui e ʼihi hahaʼi, kapau ʼe ke agatonu ki te ʼAtua, pea ʼe ina fakakoloaʼia anai koe, pea ko te maʼuli masiva ʼe ko te fakaʼiloga ʼo te mole tali leleiʼi kita e te ʼAtua. Koteā lā tau manatu ki te faʼahi ʼaia? [Tuku ke fai mai hana tali.] Ko te faʼahi ʼaē ʼe lelei ke tokagaʼi, ko Sesu neʼe mole ko he tagata neʼe maʼu koloa. [Lau age ia Luka 9:58.] ʼE talanoa ʼi te nusipepa ʼaenī ia te ʼu faʼahiga tapuakina ʼe lava ʼamanaki kiai ia te ʼu kaugana ʼa te ʼAtua.”
Réveillez-vous! ʼo ʼOketopeli
“ ʼE ke fakamoʼoni koa ko te ʼu fāmili ʼi te temi nei ʼe natou tau mo te ʼu tuʼuga fihifihia? [Tuku ke fai mai hana tali.] Tokolahi ʼe mole natou ʼiloʼi ia te ʼu tokoni fakapotopoto ʼaē ʼe maʼu ʼi te Tohi-Tapu. Ohagē lā ko te faʼifaʼitaki ʼaenī. [Lau age ia he vaega Tohi-Tapu ʼe tuʼu ʼi te nusipepa.] ʼE fakahā mai ʼi te ʼalatike makehe ʼaenī ʼo te Réveillez-vous !, peʼe tokoni feafeaʼi ia te ʼu pelesepeto ʼo te Tohi-Tapu ki te ʼu fāmili ke natou tauʼi fakalelei te ʼu ʼaluʼaga kehekehe ʼaē ʼe felāveʼi mo nātou.”
Te Tule Leʼo ʼaho 1 ʼo Novepeli
“ ʼE tou felāveʼi fuli mo te ʼu faigataʼaʼia ʼi te maʼuli. [Fakahā age he fihifihia ʼe hoko tuʼumaʼu ʼi te telituale.] ʼI tau manatu lā, ʼe feala koa ki te ʼAtua ke tokoni mai ke tou lava tauʼi te ʼu fihifihia ʼaia? [Tuku ke fai mai hana tali.] ʼI te vaega ʼaenī, ʼe fakahā mai e Sesu ia te faʼahiga tokoni ʼe foaki mai e te ʼAtua. [Lau age ia Luka 11:13.] ʼE fakamahino ʼi te nusipepa ʼaenī pe koteā ia te laumālie māʼoniʼoni pea ʼe feafeaʼi hona ʼaoga kiā tātou.”
Réveillez-vous! ʼo Novepeli
“Ko te ʼu meʼa gāue ohagē ko te ʼu kiʼi telefoni feʼaveʼaki pea mo te ʼu olotinatea kua tou māhani kiai. ʼI tau manatu lā, ko te fakaʼaogaʼi ʼo te ʼu meʼa gāue foʼou ʼo te temi nei, ʼe tou fakaʼaogaʼi lelei ai koa totatou temi peʼe fakapuli temi ia? [Tuku ke fai mai hana tali.] Tokolahi anai ʼe natou fakamoʼoni ki te tokoni ʼaenī, ʼaē ke fakaʼaogaʼi lelei ia te temi. [Lau age ia Efesi 5:15, 16.] ʼE talanoa ʼi te nusipepa ʼaenī, peʼe feafeaʼi hatatou fakaʼaogaʼi fakapotopoto ia te ʼu meʼa gāue foʼou ʼo te temi.”