Tou Tokoni Ki Te Hahaʼi Ke Natou Fakalogo Ki Te ʼAtua
1. Koteā te ʼu kaupepa lalahi foʼou ʼaē neʼe maʼu ʼi te Fakatahi Fakatisitilike “Ke Haʼu Te Puleʼaga ʼo Te ʼAtua!”, pea koteā ʼaē ʼe faigafua ai ia te fakaʼaogaʼi ʼo te ʼu meʼa gāue ʼaia?
1 ʼI te Fakatahi Fakatisitilike “Ke Haʼu Te Puleʼaga ʼo Te ʼAtua!”, neʼe tala kua maʼu te ʼu kaupepa lalahi foʼou e lua, Tou Fakalogo Ki Te ʼAtua Pea Ke Tou Māʼuʼuli ʼo Heʼegata pea mo Écoutez Dieu, ko he kaupepa lahi ʼe mole lahi he ʼu fakamatala. Neʼe vave pea mo faigafua ia te fakaliliu ʼo te ʼu kaupepa lalahi ʼaia, koteʼuhi ʼe mole lahi te ʼu manatu ʼaē neʼe tohi ai. ʼI tona fakahagatonu, Tou Fakalogo Ki Te ʼAtua Pea Ke Tou Māʼuʼuli ʼo Heʼegata neʼe tali ke fakaliliu ia lea e 431 ʼi tona ʼuluaki tā.
2. Ko ai ʼaē ʼe ʼaoga anai ki ai te ʼu kaupepa lalahi ʼaia?
2 Ko ai tāfito ʼaē ʼe ʼaoga anai ki ai te ʼu kaupepa lalahi ʼaia? Kotou vakaʼi te ʼu ʼaluʼaga ʼaenī ʼaē ʼe hoko tuʼumaʼu ʼi te mālamanei kātoa:
• Ko he fai fakamafola ʼe fai palalau mo he tahi, ʼi he ʼuluaki fai palalau peʼe ko he ʼaʼahi, ʼe ina tokagaʼi ʼe mole poto peʼe kinakina tana lautohi.
• Ko he fai fakamafola ʼe fai palalau mo te hahaʼi ʼaē ʼe palalau ʼi he lea kua fakaliliu kiai ʼihi tohi peʼe mole maʼu pē lā ʼi tana lea. Peʼe ko te tokolahi ʼi te telituale, ʼe mole natou popoto ʼi te lautohi ʼi te lea ʼaē ʼe natou palalauʼi.
• ʼE fakaʼaogaʼi anai e he fai fakamafola ʼi te lea fakatuli moʼo tokoni ki he tuli ʼi tana telituale.
• Ko he tamai, peʼe ko he faʼē, ʼe ina fia ako ia te moʼoni ki hana toe ʼe mole heʼeki poto ʼi te lautohi.
3. Neʼe faʼufaʼu feafeaʼi ia te kaupepa lahi Écoutez Dieu?
3 Neʼe Feafeaʼi Tonā Faʼufaʼu: Écoutez Dieu ko he kaupepa lahi ʼe mole lahi he ʼu fakamatala, pea ʼe tuʼu ʼi te lalo pāsina ia he manatu nounou e tahi pea mo he vaega Fakatohi-tapu, ʼe ina fakamahino mai te ʼu puani tāfito. Koteā tona tupuʼaga? Kotou fakakaukauʼi age muʼa, ʼe foaki atu e he tahi ia he kaupepa lahi ʼi he lea ʼe mole feala hakotou lau, peʼe ʼi he ʼu mataʼi tohi ʼe mole mahino kiā koutou. ʼE feala anai koa ke ʼaoga kiā koutou, tatau aipē peʼe matalelei ia te ʼu pāki? ʼE mahino papau ia, kailoa. ʼE toe fēia aipē mo te hahaʼi ʼaē ʼe mole popoto ʼi te lautohi, ʼe natou lotovaivai gafua ʼuhi ko te lahi fau ʼo te ʼu fakamatala ʼaē ʼe maʼu ʼi te ʼu tohi. Koia, ʼi te ʼu pāsina fuli, neʼe teuteuʼi lelei te ʼu pāki ʼaki ni fakaʼiloga moʼo takitaki ia te fai palalau mai he pāki ki he tahi pāki.
4. Neʼe faʼufaʼu feafeaʼi ia te kaupepa lahi Tou Fakalogo Ki Te ʼAtua Pea Ke Tou Māʼuʼuli ʼo Heʼegata?
4 ʼE toe maʼu pē te ʼu pāki ʼaē ʼi te kaupepa lahi Écoutez Dieu ʼi te kaupepa lahi Tou Fakalogo Ki Te ʼAtua Pea Ke Tou Māʼuʼuli ʼo Heʼegata. Neʼe fai tāfito moʼo akoʼi ʼo nātou ʼaē ʼe mole lelei tonatou lautohi peʼe mo natou ʼaē ʼe akoako te lautohi. ʼE ʼaoga te kaupepa lahi ʼaia mokā tou takitaki te ako ʼo he tahi ʼi te kaupepa lahi Écoutez Dieu. ʼI ʼoluga ʼo te faʼahi hema ʼi te ʼu lua pāsina ʼo te ako, ʼe maʼu ai te fehuʼi pea ʼe tali pē anai kiai te ʼu lua pāsina ʼaia. ʼE toe kau kiai mo te ʼu pāki ʼe fakamahino ʼaki he ʼu vaega Fakatohi-tapu. ʼI te ʼu lalo pāsina, ʼe kotou maʼu ai he tahi ʼu puani mo he ʼu vaega Fakatohi-tapu ʼe ʼātakai, ʼe feala anai ke kotou palalau kiai, ʼo fakalogo pē ki te fealagia ʼo ia ʼaē ʼe ako.
5. Ko te temi fea ʼaē ʼe feala ai ke tou tufa te ʼu kaupepa lalahi ʼaia, pea mo feafeaʼi?
5 ʼE Feafeaʼi Te Fakaʼaogaʼi ʼo Te ʼu Kaupepa Lalahi ʼAia: ʼE feala ke tou tufa he kaupepa lahi ʼi te fai fakamafola ʼi te ʼu ʼapi ʼo fakalogo pē ki tona ʼaoga, māʼiapē lā mo kapau ʼe mole ko te tufa ʼo te māhina. (Vakaʼi te fakamatala ʼaē ʼe ʼātakai “ ʼE Feafeaʼi Anai Hona Tufa.”) ʼE feala anai hakotou kamata te ʼaʼahi ʼaki takotou ʼui age kiā ia ʼaē neʼe fia logo, ʼe ʼi ai te meʼa ʼe kotou fia fakahā age pea mo fakatoʼo age hana kaupepa.
6. ʼE feafeaʼi anai hakotou takitaki he ako Tohi-Tapu ʼaki te ʼu kaupepa lalahi ʼaia?
6 ʼE mole maʼu he ʼu fehuʼi ʼi te kaupepa lahi Écoutez Dieu, koia ʼe mole fai anai te fai palalau ʼaki he ʼu fehuʼi pea mo he ʼu tali ohagē ko tona fai māhani ʼaki te tohi Te Ako Mai Te Tohi-Tapu. ʼI te ʼu fenua fuli, ʼe fia logo te hahaʼi ki te ʼu fakamatala. Koia, kotou fakaʼaogaʼi te ʼu pāki moʼo fakamahino kiā ia te ʼu fakamatala ʼaē ʼe haʼu mai te Tohi-Tapu. Kotou fakamahino age te ʼu pāki. Kotou fai ʼaki te fiafia. Kotou fakaafe te ako ke ina fakamatala te meʼa ʼaē ʼe sio kiai pea mo tana manatu. Kotou lau te ʼu vaega ʼaē ʼi te lalo pāsina, pea kotou fakakaukauʼi mo ia te ʼu manatu ʼo te ʼu vaega ʼaia. Kotou fai he ʼu fehuʼi ke kau mo ia ʼi te fai palalau pea mo vakaʼi peʼe kua mahino lelei kiai. Kapau ʼe ina fakaʼaogaʼi te kaupepa lahi Tou Fakalogo Ki Te ʼAtua Pea Ke Tou Māʼuʼuli ʼo Heʼegata, kolua lau fakatahi te ʼu manatu mo te ʼu vaega pea mo vakaʼi te ʼu pāki ʼaē ʼe kolua palalau kiai.
7. ʼE feafeaʼi hakotou tokoni kiā ia ʼaē ʼe ako ke tuputupu ʼi te faʼahi fakalaumālie?
7 Tou Tokoni Ke Haʼele Ki Muʼa Te Ako: ʼE tou fakaʼamu ke fakatupu ʼi tatatou ako, ʼaki tatatou fai palalau, hana fia ako te lautohi ke feala hana mahino ki te ʼatamai mālama ʼo ʼuhiga mo Sehova. (Mat. 5:3; Soa. 17:3) Koia, kapau neʼe kolua kamata fai palalau ki te kaupepa lahi Écoutez Dieu, pea ʼe kotou manatu kua fealagia, pea ʼe lagi feala anai ke kotou ako age te lautohi, pea hoki feala leva ke hiki te ako ki te kaupepa lahi Tou Fakalogo Ki Te ʼAtua Pea Ke Tou Māʼuʼuli ʼo Heʼegata. ʼE mole heʼeki feala ke papitema ia ia ʼaē ʼe ako, tatau aipē peʼe kua ʼosi te ʼu kaupepa lalahi ʼaia ʼi takolua ako. ʼE tonu ke hoko atu tana ako ki te tohi Te Ako Mai Te Tohi-Tapu peʼe ko he tahi age tohi ke feala ai tana mahino kātoa ki te Tohi-Tapu.
8. Koteā te tupuʼaga ʼo totatou loto fakafetaʼi ki te ʼu meʼa gāue foʼou ʼaia ʼi te minisitelio?
8 Ko te hahaʼi ʼe tonu ke natou fakalogo ki te Tuʼi ʼAliki ʼo te ʼatulaulau mo kapau ʼe natou fia māʼuʼuli ʼo heʼegata. (Esa. 55:3) Pea ko te finegalo ʼaē ʼo Sehova ki “te tagata fuli,” ʼo kau ki ai natou ʼaē ʼe mole popoto ʼi te lautohi, ke natou ako te fakalogo ʼaē kiā te ia. (1 Tim. 2:3, 4) ʼE tou loto fakafetaʼi ʼaupitō ki te ʼu meʼa gāue foʼou ʼaia ʼaē ʼe feala ke tou fakaʼaogaʼi moʼo akoʼi te hahaʼi ke natou fakalogo ki te ʼAtua!
[Talanoa ʼo te pāsina 3]
ʼE Feafeaʼi Anai Hona Tufa
ʼAvahi age te kaupepa ʼi te ʼu pāsina 2-3, pea mo ʼui age: “ ʼE ke fia maʼuli anai ʼi he mālama fēnei? [Tuku ke fai mai hana tali.] ʼE fakapapau mai e te ʼAtua ʼi te Tohi-Tapu, kua vave pē anai ia tana fakatuʼu ia he mālama taulekaleka ʼe tokalelei, ʼe mole ʼi ai anai he tahi ʼe masiva peʼe mahaki. Pea ke fakatokagaʼi peʼe koteā ʼaē ʼe tonu ke tou fai ke tou māʼuʼuli ai. [Lau ia Esaia 55:3, ko te vaega ʼaē ʼe tuʼu ʼi ʼoluga ʼi te pāsina 3.] ʼE tou lau ʼi te vaega ʼaenī, ʼe tonu ke tou ʼomai ki te ʼAtua pea ke tou fakalogo kiā ia. Kae ʼe feafeaʼi hatatou fakalogo ki te ʼAtua?” Fuli age te ʼu pāsina 4-5, pea palalau mo ia ki tona tali. Kapau ʼe maʼumaʼua, tuku age ki ai te kaupepa lahi pea mo fai he fakatuʼutuʼu ke kita liliu age ʼo palalau mo ia ki tona tali.