“ ʼE Au Toʼo ʼAu Tohi Mo Kapau ʼe Ke Toʼo ʼa ʼAku”

ʼE feala ke fai atu e he tahi te ʼu palalau ʼaia moka kotou olo ʼi te ʼu ʼapi. Mai tona aluʼaga ʼae ʼe mole tou fetogi ʼatatou tohi Fakatohi-tapu ʼaki he ʼu tohi lotu ʼe tuʼu ai ni manatu hala, ʼe feafeaʼi hatatou lava tali fakaʼeteʼete age? (Loma 1:25) ʼE tou lava ui fenei age: “ ʼE au fakamalō atu. Kotea la ʼae ʼe ui ʼi tau tohi ʼo ʼuhiga mo te puleʼaki ki te ʼu faigataʼaia ʼo te malamanei? [Tuku ke fai mai hana tali. Kapau ʼe ina ui atu ke kotou lau tana tohi ke kotou maʼu ai tona tali, ʼe feala hakotou ui age ʼe mole kotou tuku age he tohi kaʼe neʼe mole heʼeki kotou fakamahino age pe kotea ʼae ʼe tuʼu ai. Pea kotou toʼo peʼe kotou lau fakaʼatamai age ia Mateo 6:9, 10.] Neʼe fakaha e Sesu ʼe fai anai e te Puleʼaga ʼo te ʼAtua ia te finegalo ʼo te ʼAtua ʼi te kele. Koia, ko te ʼu tohi ʼae ʼe au lau ʼe ko ʼae pe ʼe talanoa ki te Puleʼaga ʼo te ʼAtua. ʼE feala la haku fakaha atu ʼi te Tohi-Tapu he ʼu gaue ka fakahoko anai e te Puleʼaga ʼo te ʼAtua?”