‘Fakatahiʼi Te Hahaʼi’
1. Kotea ʼae ʼe tatau ai ʼatatou fakatahi fakatisitilike pea mo fakamalamanei pea mo te fakatahi makehe ʼae neʼe fai e te kau Iselaele ʼi tanatou mavae mai Esipito?
1 Mole faʼa fualoa ʼi tanatou mavae mai Esipito, neʼe fakatotonu e Sehova kia Moisese ke ina ‘fakatahiʼi te hahaʼi’ ʼi te Moʼuga ʼo Sinai, ke natou logo ki Tana folafola, ke tupu ai tanatou manavasiʼi kia te Ia pea mo akoʼi ai ki ʼanatou fanau ʼAna lao. (Tet. 4:10-13) Neʼe lagi ko he aluʼaga fakaofoofo pea mo fakalotomalohi. ʼO toe feia pe, ʼi te ʼu mahina ʼae ka hoa mai, ʼe fakatahitahi anai te hahaʼi ʼa Sehova ʼi te ʼu fakatahi fakatisitilike pea mo fakamalamanei, ke akoʼi natou e Sehova. Kotea ʼae ʼe tonu ke tou fai ke fua lelei kia tatou te ʼu fakatahi ʼaia?
2. Kotea ʼae ʼe tonu ke tou fai ke tou “nonofo teuteu” ki tatatou fakatahi lahi?
2 Kotou Nonofo Teuteu: Neʼe fakatotonu e Sehova ki te kau Iselaele ke natou “nonofo teuteu” ki te fakatahi makehe ʼae ka fai ʼi te Moʼuga ʼo Sinai. (Eke. 19:10, 11) ʼO toe feia pe mo tatou, ʼe tonu ke tou nonofo teuteu, kaʼe ʼe mole gata pe kia natou ʼae ka faiakonaki. Ohage la, tokolahi ia tatou ʼe tonu ke tou kole fakatomuʼa ʼotatou ʼaho malolō. ʼE tou faʼifaʼitakiʼi anai ia Neemia. Neʼe kaugana ki te Hau ko Aletasese. Kaʼe neʼe fia alu ki Selusalemi ʼo kau ki te laga ʼo te ʼu kaupa ʼo te kolo. Pea neʼe ina iloʼi ʼe lagi mole tali anai e te hau. Neʼe faikole ia Neemia pea mo fai tana kole ki te hau ʼaki he aga fakaʼapaʼapa pea mo fakaʼeteʼete. Neʼe fakagafua age e te hau ke alu pea neʼe toe tokoni age ki ai ki te fakahoko ʼo te gaue ʼaia. (Nee. 2:1-9) ʼE mole tonu pe ke tou kole he ʼu ʼaho malolō. ʼE tonu ke tou fakatuʼutuʼu lelei tatatou feʼoloʼaki pea mo fakamoʼoni totatou nofoʼaga. Kapau ʼe ʼaoga atu he tokoni, ʼe fiafia anai te kau tagata ʼafeā ke natou tokoni atu. Kotou faigaʼi ke kotou ʼomai fakatomuʼa ki te fakatahi pea mo nonofo teuteu ke feala ke kotou fakalogo fakalelei ki te ʼu akonaki.—Hep. 2:1.
3. Kotea ʼae ʼe tokoni mai anai ke tou teuteuʼi totatou loto ki te fakatahi lahi?
3 ʼE toe maʼuhiga ke tou teuteuʼi mo totatou loto ke feala ke tou fakalogo pea mo ako. (Eseta. 7:10) ʼE ʼai fakatomuʼa anai ia te polokalama ʼo te fakatahi ki te tatatou tuʼasila ʼi te Neti jw.org/wls. ʼE tou maʼu anai ʼi ai te lisi ʼo te ʼu kupu tafitō ʼo te ʼu akonaki fuli pea mo tona vaega tafitō. ʼE ko he ʼu manatu ʼaia ʼe lelei ke tou vakaʼi lolotoga tatatou Ako Fakafamili, ʼi te ʼu vahaʼa ʼi muʼa ʼo te hoko ʼo tatatou fakatahi. Ko ʼihi ʼe natou ta ia te polokalama pea mo tohi ai te ʼu manatu tafitō lolotoga te fakatahi.
4. ʼE lava akoʼi feafeaʼi e te ʼu matuʼā ʼanatou fanau ʼaki te polokalama ʼo te fakatahi?
4 ‘Kotou Ako ʼAkotou Fanau’: Ko te tahi fakatuʼutuʼu ʼo te fakatahi ʼae neʼe fai ʼi te Moʼuga ʼo Sinai, ke feala ki te ʼu matuʼā Iselaele ‘ke natou ako ʼanatou fanau.’ (Tet. 4:10) ʼE feala ki te ʼu matuʼā ke natou fai ia te faʼahi ʼaia ʼi te ʼu fakatahi lalahi. Koia ʼe lelei ke heheka fakatahi te ʼu matuʼā mo ʼanatou fanau pea mo tokakaga kia natou. ʼE feala ki te ʼu famili ke natou faipalalau fakatahi ʼo ʼuhiga mo te polokalama ʼo te fakatahi, ʼi te hili ʼo te fakatahi, pea ki muli age lolotoga tanatou ako fakafamili.
5. Kotea te ʼu lelei ʼe tou maʼu ʼi te fakatahi lahi ʼae ka fai anai?
5 Ko te fakatahi makehe ʼae neʼe fai ʼi te Moʼuga ʼo Sinai, neʼe tokoni ki te kau Iselaele ke natou fiafia ʼi tonatou ʼuhiga hahaʼi ʼa te ʼAtua. (Tet. 4:7, 8) Ko te fakatuʼutuʼu ʼaia ʼa te fakatahi lahi ʼae ka fai. Lolotoga ʼaho ʼe lua, ʼe tou fiafia anai ʼi te ʼu lelei fakalaumalie pea mo tatatou fakatahi ʼae mo ʼotatou tehina mo tuagaʼane. (Esa. 35:7-9) Mai tona aluʼaga ʼae kua ovi mai te ʼaho ʼo Sehova, ʼe tonu ke tou toʼo ia te ʼu faigamalie ʼaia ke tou fakatahi ai pea mo fefakalotomalohiʼaki.—Hep. 10:24, 25.