Kotou Ako Mai Te Kau Faifakamafola Faiva

ʼE ko he tapuakina ia tatatou maʼu ia he kau faifakamafola faiva ʼi te kokelekasio. Ko ʼihi ʼe natou tauhi kia Sehova talu mai fualoa. Pea ko ʼihi neʼe lagi natou maʼu ia he ʼu faʼahiga fai ʼe lelei ʼi te minisitelio ʼe mole heʼeki faʼa fualoa ki ai. Neʼe mahino ki te kau faifakamafola ʼaia pe ʼe takitaki feafeaʼi e Sesu ia te kokelekasio Fakakilisitiano ʼi te ʼu ʼaho fakamuli ʼaeni ʼaki tana fakalahi ia te gaue faifakamafola pea mo te fai ʼo ni tisipulo. (Mat. 28:19, 20) ʼAki tanatou kau ki te minisitelio ʼaia, neʼe natou maʼu ai ia te “malohi ʼae ʼe fakalaka ʼi te malohi mahani” moka natou tau mo he ʼu faigataʼaia pea mo he ʼu ʼahiʼahi. (2 Ko. 4:7, MN) ʼE lahi te ʼu faʼahi ʼe tou ako mai te kau faifakamafola faiva ʼaia. ʼE natou fiafia ʼi te akoʼi ki ni ʼihi ia te ʼu meʼa fuli ʼae neʼe natou ako moka natou maʼu he faigamalie. (Pes. 71:18) Koia ʼae ʼe tonu ai ke tou toʼo ia te ʼu faigamalie ʼae ke tou ako mai ia natou. ʼO feafeaʼi?

ʼI Te Minisitelio. ʼE ʼaoga ke akoako ia te kau faifakamafola ʼae ʼe kei foʼofoʼou ke natou faiva ʼi te minisitelio. ʼE feala ke lahi age tanatou ako ʼaki tanatou sisio ki te faʼahiga fakahoko e te kau faifakamafola ʼae kua fotufotuʼa ʼi te faʼahi fakalaumalie ia tanatou minisitelio. (Vakaʼi te alatike ʼo Te Tule Leʼo ʼaho 15 ʼo Fepualio, 2015 “Taupau Ia Tau Faʼafai ʼi Te Minisitelio,” ʼi te palakalafe tolu ʼo te kupu taki “Tokoni Ki Te Kau Faifakamafola Foʼou.”) ʼE kotou maʼu feafeaʼi ia he ʼu fua lelei ʼi takotou gaue mo he kau faifakamafola feia ʼi te minisitelio?

ʼE kotou lava kole koa ki he tehina peʼe ko he tuagaʼane faiva ke gaue fakatahi mo koutou ʼi te minisitelio? Kapau ʼe mahaki ia te tehina peʼe ko te tuagaʼane faiva ʼaia, ʼe lagi feala ʼi ʼihi temi ke kotou fai mo ia te ako Tohi-Tapu ʼa he tahi ʼi ʼakotou kau ako ʼi tona ʼapi. Hili te ako, kotou kole age ki te tehina peʼe ko te tuagaʼane ʼaia pe ʼe kotea ʼae neʼe ina tokagaʼi pea ke ina fai atu he ʼu tokoni ʼe ʼaoga.

Kotou Toʼo He Temi Ke Kotou Fakatahi Mo Natou: ʼI takotou fakatahi mo te kau faifakamafola faiva, ʼe kotou ako ai ʼo ʼuhiga mo natou. Kotou fakaafe he tahi ia natou ki takotou ako fakafamili pea mo fai he ʼu fehuʼi kia ia. Kapau ʼe mahaki, ʼe feala koa ke kotou fakatuʼutuʼu ke kotou fai te ako fakafamili ʼi tona ʼapi? Kotou kumi pe neʼe ina iloʼi feafeaʼi ia te moʼoni. Kotea ia te ʼu tapuakina neʼe ina maʼu? Neʼe tuputupu feafeaʼi te gaue faifakamafola ʼi tona telituale? Kotea ia te fiafia neʼe ina maʼu ʼi tana tauhi ʼae kia Sehova?

Ko te kau faifakamafola faiva ʼe ʼi ai ʼonatou tuʼakoi, koia ʼae ʼe ʼaoga ai ke kotou lotomahino pea mo aga fakapotopoto ki te tokoni ʼae ʼe feala ke natou foaki atu. Ohage pe ko tatou fuli, ko te ʼu tehina mo tuagaʼane ʼae kua fualoa tanatou faifakamafola ʼe natou maʼu te ʼu fealagia kehekehe ʼi te minisitelio. (Loma 12:6-8) Ko ʼihi ʼe kua natou matutuʼa pea ʼe mole feala ke lahi te temi ʼae ke natou nonofo fakatahi ai mo tatou. Koia, ʼe feala ke lahi tatatou ako mai ia natou ʼaia ʼuhi ko tonatou faiva ʼi tanatou tauhi agatonu ʼae kia Sehova.