Ke Lelei Age Tatatou Faifakamafola​—ʼI Te Fakaʼaogaʼi ʼo Te Telefoni

HE KOʼE ʼE MAʼUHIGA: Ko te faifakamafola ʼi te telefoni ʼe ko he faʼahiga fai maʼuhiga ʼaia moʼo “fakamoʼoni katoa ki te logo lelei.” (Gau 20:24)a ʼE feala ai ke tou faifakamafola ki he tahi moka ʼe mole feala ke tou olo kio ia.

TE ʼU MEʼA ʼAE ʼE TONU KE KOTOU FAI:

• 

  Ke ke teuteu lelei. Filifili he manatu ʼe fia palalau ki ai he tokolahi. Pea tohi te ʼu puani ʼae ʼe ke fia palalau ki ai. ʼE toe feala ke ke teuteuʼi he ʼu palalau nounou ʼe ke fakamahino ai te tupuʼaga ʼo tau pauʼi, mo kapau ʼe ke to anai ki te puke leʼo. Pea ʼe lelei age anai ke ke heka ʼi he laupapa mo ʼau manatu ʼae neʼe ke tohi, mo te ʼu meʼa fuli ʼae ʼe ʼaoga atu, ohage la ko tau masini toʼotoʼo ʼe maʼu ai te JW Library^® peʼe ko te tuʼasila jw.org^®

• 

  ʼAua naʼa ke hoha. Palalau ohage ko te mahani. Malimali pea mo fai ni haka ohage pe ʼe sio atu. Moka ke palalau, ʼaua naʼa ke hoko tuʼu. ʼE fua lelei anai hau fai te gaue ʼaia mo he tahi ʼu faifakamafola ke kotou fetokoniʼaki. Ka fai atu he fehuʼi e ia ʼae ʼe kolua faitelefoni, toe fai leʼo lahi te fehuʼi ke logo ki ai te kauga fagona, pea mo tokoni atu ke maʼu te tali

• 

  Te ʼu faʼahiga fai ke ke toe liliu ʼo ʼaʼahi. Kapau ʼe fia hoko atu tana fia palalau, ʼe feala ke ke lagaʼi he fehuʼi ʼe ke tali anai ki ai moka ke toe pauʼi age. ʼE toe feala ke ke ui age, ʼe feala hau alu kio ia ʼo ʼavage hana nusipepa, peʼe ke ke momoli age ʼi te Neti peʼe ʼi te meli. Peʼe toe feala hau momoli age he ʼata viteo, peʼe ko he alatike ki tana telefoni toʼotoʼo peʼe ʼi te Neti. Peʼe feala ke ke palalau age ki he manatu ʼe maʼu ʼi tatatou tuʼasila ʼi te Neti, pea ʼe feala ke alu ki ai ʼo lau