Neʼe ‘Ako e Sesu Te Fakalogo’

Neʼe fakalogo tuʼumaʼu pe ia Sesu kia Sehova. (Soa. 8:​29) Kae, he koʼe ʼe ui fenei ʼi te Tohi-Tapu: “Neʼe ina ako te fakalogo ʼaki te ʼu meʼa ʼae neʼe ina ʼutakiʼi”?​—Hep. 5:8.

ʼI te maʼuli ʼa Sesu ʼi te kele, neʼe tau mo he ʼu aluʼaga neʼe mole ina iloʼi ʼi tana maʼuli ʼi selo. Neʼe pusiaki ia ia e he ʼu matuʼā neʼe ʼoʼofa ia Sehova, kae neʼe mole haohaoa. (Luka 2:​51) Neʼe gaohi koviʼi ia ia e te kau takitaki lotu kaka, pea mo te ʼu pule taki politike heʼe faitotonu. (Mat. 26:59; Mko. 15:15) Pea tahi, “neʼe ina fakamalaloʼi ia ia totonu pea neʼe liliu ai ʼo fakalogo ʼo kaku ki tona mate.” Neʼe ko he mate fakamataku ia.​—Flp. 2:8.

Koia, neʼe ako e Sesu mai te ʼu aluʼaga ʼaia te fakalogo. Ko he aluʼaga ia neʼe mole tatau mo tana fakalogo ʼae ʼi selo. Neʼe feala ai ke liliu ko he Hau mo he Pelepitelo Lahi haohaoa, ʼe lotomahino anai kia tatou. (Hep. 4:​15; 5:9) Neʼe toe maʼuhiga ʼaupito age ia Sesu kia Sehova ʼi tana ako te fakalogo ʼi te ʼu mamahi ʼae neʼe tau mo ia. ʼO toe feia pe mo tatou, ʼe tou toe maʼuhiga ʼaupito age kia Sehova moka tou fai ia gaue fuli pe ʼe ina tuku mai, pea mo fakalogo, maʼia pe ʼe tou tau mo ni ʼahiʼahi.​—Sakp. 1:4.