2 Tokoni

ʼAua Naʼa Kotou Fakatatau Ia Koutou Ki Niʼihi

KOTEĀ ʼAĒ ʼE AKOʼI MAI ʼI TE TOHI-TAPU? “Ke tahi vakai e te tagata tana gaue, e ina mau ai anai he mea ke fiameamea ai, kae mole ko he gaue a he tahi kehe.”—Kalate 6:4, Tauhi Foou.

HE KO’Ē ʼE FAIGATAʼA? ʼE lagi tou fia fakatatau ki ʼihi—ʼi ʼihi temi kiā nātou ʼaē ʼe mole maʼu koloa age iā tātou, kae ʼi te agamāhani ʼe tou fia fakatatau kiā nātou ʼaē ʼe mālolohi age pea mo maʼu koloa age iā tātou, peʼe kiā nātou ʼaē ʼe faiva age iā tātou. ʼI te ʼu ʼaluʼaga ʼaia, ʼe mole lelei te fakatatau ʼaē ʼo kita ki he tahi kehe. ʼE hala tatatou manatu ʼaē ʼe ʼiloʼi te maʼuhiga ʼo he tahi ʼaki te ʼu koloa ʼaē ʼe ina maʼu peʼe ko tana lava fai ʼaē ʼo he ʼu gāue. ʼE toe feala aipē foki ke tou fakatupu he ʼu manatu fakaʼamuʼamu pea mo he ʼu manatu fakataupiepie.—Tagata Tānaki 4:4.

KOTEĀ ʼAĒ ʼE FEALA KE KOTOU FAI? Kotou sivi ia koutou totonu ʼaki te faʼahiga sio ʼaē ʼa te ʼAtua kiā koutou. Kotou tuku tana manatu ke ina takitaki takotou manatu ʼaē ʼo ʼuhiga mo koutou totonu. “[ʼE] sio te tagata ki te meʼa ʼaē ʼe hā ki te ʼu mata; kae ko Sehovaa ia, ʼe sio ki te loto.” (1 Samuele 16:7) Ko Sehova ʼe ina sivi tokotou ʼu kalitātē, ʼo mole ina fakatatau koutou ki he tahi, kae ʼe ina ʼiloʼi tokotou loto, ʼe ina sivi takotou ʼu manatu, te ʼu meʼa ʼaē ʼe kotou logoʼi pea mo takotou ʼu fakatuʼutuʼu. (Hepeleo 4:12, 13) ʼE mahino ia Sehova ki tokotou ʼu tuʼakoi pea ʼe ina fakalotomālohiʼi koutou ke kotou mahino kiai. Kapau ʼe kotou fakatatau ia koutou ki ʼihi, ʼe feala pē anai ke kotou liliu ʼo fiatuʼu peʼe ʼi te temi fuli pē ʼe mole kotou fiafia anai. Koia, ʼaki he agavaivai kotou tali ʼe mole feala anai ʼi te ʼu ʼaluʼaga fuli pē ke kotou faiva ai.—Tāʼaga Lea 11:2.

Koteā koa ʼaē ʼe tonu ke kotou fai ke kotou maʼuhiga ai ki te ʼAtua? Neʼe ina uga ia te polofetā ko Mikea ke ina tohi fēnei: “Neʼe ina fakahā atu kiā te koe, Ê tagata kelekele, te meʼa ʼaē ʼe lelei. Pea koteā ʼaē ʼe kole atu e Sehova kiā te koe, ʼe mole koa lā ko te maʼuliʼi ʼo te faitotonu, mo te manako ki te finegaloʼofa, pea mo te haʼele mo tou ʼAtua ʼaki he fia mālalo?” (Mikea 6:8) Kapau ʼe kotou muliʼi te tokoni ʼaenī, ʼe tokaga anai te ʼAtua kiā koutou. (1 Petelo 5:6, 7) Koteā lā he tupuʼaga ʼe lahi age ʼe feala ai ke kotou maʼu he maʼuli fakafeʼauga?

[Nota]

[Paki ʼo te pasina 5]

ʼE sivi e Sehova tokotou ʼu kalitātē ʼaki te ʼu meʼa ʼaē ʼi tokotou loto