Ko Koe Pe Koa ʼi Tou Famili Katoa ʼe Nofo ʼi Te Moʼoni?
1 Ko he manuʼia mokā ʼe gāue fakatahi he famili katoa kia Sehova! Kae, ko te hahaʼi fuli ʼe mole nātou maʼu te fiafia ʼaia. Tokolahi ʼi totatou ʼu tēhina pea mo tuagaʼane ʼe nātou tauhi tokotahi kia Sehova. ʼE ʼaoga ke fakamālo moʼoni kia nātou ʼi te faʼifaʼitaki lelei ʼo ʼuhiga mo te agatonu pea mo te faʼa kātaki ʼe nātou fakahā. — 2 Tes. 1:4.
2 Te ʼu mātuʼa ʼE ʼi ai koa ʼi tokotou kokelekasio he ʼu tuagaʼane, he ʼu faʼe, ko tonatou ʼu ʼohoana ʼe mole ʼi te moʼoni, peʼe fakafeagai kia nātou? Neʼe fēnei te tohi ʼa he faʼe: “ ʼE tonu ke ʼau gāue ʼo ʼuhiga mo te ʼu meʼa ʼe ʼaoga ki toku famili. ʼE ʼau toe ʼalu ʼo totogi meʼa kai, fakamaʼa, kuka, tui pea mo fakalogo ki taku ʼu fānau mokā ʼe nātou fakahā mai honatou ʼu faigataʼaʼia.” ʼE toe ʼalu ia mo tana famili ki te ʼu fono pea mo te gāue faka mafola. ʼIo, ko he ʼu faʼifaʼitaki feiā ʼe ʼaoga ke palalau ki ai, kae kau ai mo te tokoni ʼaē ʼe feala ke tou fai ki te ʼu fafine kilisitiano ʼaia.
3 ʼE feafeaʼi hatatou tokoni kia nātou? Ko ʼihi kau tūpulaga ʼi te kau faka mafola neʼe nātou kaumeʼa mo te ʼu tamaliki ʼo he ʼu famili ʼe mavetevete, ke feala kia nātou ʼaia ke ʼi ai honatou fakatahi lelei. Ko te kau faka mafola faiva ʼe nātou fai te ʼu ako faka tohi-tapu mo te ʼu fānau ʼaia pea ʼe nātou tokoniʼi nātou ke nātou kau tuʼumaʼu ki te gāue faka mafola. Neʼe faiga te famili moʼo tokoniʼi he tuagaʼane ko tona ʼohoana ʼe mole ʼi te moʼoni. Ki muli mai, neʼe fakaafe e te famili ʼaia te tagata ke haʼu mo tona ʼohoana ki he ʼu kiʼi fakafiafia faka teokalatike. Ki muli mai, neʼe tali e te tagata ʼaia he ako faka tohi-tapu, pea ʼi te temi nei ko he tagata fai faka mafola kua foaki tona maʼuli kia Sehova pea kua papitema.
4 Te kau tūpulaga fai faka mafola Tokolahi ʼi te ʼu tamaliki pea mo te kau tūpulaga ko nātou pe ʼaē ʼi te moʼoni. Ko he tēhina tūpulaga neʼe tuʼumaʼu tona loto ʼaē ke pionie, logope la te mālohi ʼo te talatisio faka famili pea mo te ʼu faiga ʼa tana famili ke ina līaki te fahaʼi ʼaia kae hoko atu tana ako. ʼAki tana faʼifaʼitaki lelei, neʼe tali ʼe tona kiʼi tokolua veliveli te moʼoni pea ʼe nā pionie tokolua nei.
5 Ko te kau faka mafola kei tūpulaga ʼaē ʼe mole kau tanatou ʼu mātuʼa ʼi te moʼoni ʼe ʼaoga kia nātou he tokoni pea mo he takitaki, tatau aipe ʼi te fahaʼi fakalaumālie mo te fahaʼi fakasino. Tokolahi te kau faka mafola kua matutuʼa neʼe nātou tokoniʼi nātou ʼaki hanatou tokaga takitokotahi kia nātou, ʼo liliu ohage ko hanatou ʼu tāmai pea mo hanatou ʼu faʼe fakalaumālie. Koʼeni te meʼa neʼe tohi ʼe he famili ʼo ʼuhiga mo he finemui neʼe ina ako te Tohi-Tapu: “Neʼe fakaloto mālohiʼi ke faikole, mo muliʼi te ʼu fakatuʼutuʼu faka tohi-tapu ʼi tona maʼuli pea ke lahi tana aga fakaʼapaʼapa pea mo faʼa kātaki ki tana ʼu mātuʼa.” Neʼe tokoniʼi e te famili ʼaia te taʼahine ʼo ʼalu ki te fakatahi faka malamanei, pea ʼi te temi nei ʼe haʼele lelei ia ki muʼa ʼo aʼu ki te papitema.
6 Ko nātou kua matutuʼa peʼe māʼimoa Ko nātou ʼaē kua matutuʼa peʼe māʼimoa ʼe ʼofaina ʼi te kokelekasio, tatau aipe pe ʼe ko tanatou gāue faka mafola ʼe mole faʼa lahi. Ko koutou fuli kua matutuʼa peʼe māʼimoa, koutou ʼiloʼi papau ko takotou faiga pea mo takotou gāue agatonu ʼe fakamālohi ki tamatou tui. — Taag. 16:31.
7 Tokolahi ʼi te ʼu hahaʼi matutuʼa peʼe māʼimoa neʼe nātou foaki tonatou temi tūpulaga pea mo tonatou mālohi ki te gāue ʼa Sehova, pea ʼe lagi ʼi te temi nei kua nātou tokotahi. ʼE mole tou loto anai ke tou situʼa kia nātou. Ko he foaki pe ʼaē kia nātou ʼo he kiʼi temi ʼe ko he meʼa fakatupu fiafia ia kia nātou. ʼE toe feala pe tatatou tokoniʼi nātou ʼo fai ʼanatou ʼu fekau pea mo fakamaʼa ʼo tonatou ʼapi, peʼe ʼolo mo nātou ki te ʼu fono pea mo te gāue faka mafola. Neʼe tokoniʼi ʼe he famili te fafine vitua neʼe kua puli tona foha ulu tokotahi. ʼAki tanatou tokoni ki ai, ko nātou fuli ʼi te famili ʼaia neʼe nātou faiga ke tokalelei tana ʼu faʼahiga meʼa.
8 Ia koutou ʼaē ʼe tokotahi ʼi te moʼoni, ke koutou ʼiloʼi papau ʼe mātou tokaga fakalelei ki tokotou ʼu lelei fakalaumālie. ʼI tatatou gāue fakatahi pea mo tatatou fefakatahiʼaki ʼe tou fefakaloto mālohiʼaki pe anai. Ke fakavikiviki kia Sehova ʼo ʼuhiga mo te gāue taulekaleka ʼaē ʼe koutou fai! — 1 Tes. 1:2, 3.