Tou Tokoni Ki Te Kau Ako Tohi-Tapu Ke Nātou Teuteuʼi Tanatou Ako
1 Ko te kau ako Tohi-Tapu ʼaē ʼe nātou teuteuʼi tanatou ako ʼi te vāhaʼa fuli ʼe nātou fakahā tanatou fia fai moʼoni ki tanatou ako pea ʼe vave tanatou tuputupu fakalaumālie ʼo vave age ia ia nātou ʼaē ʼe mole nātou teuteuʼi. ʼI ʼihi temi ʼe mole teuteuʼi ʼe ia ʼaē ʼe ako koteʼuhi ʼe mole ina ʼiloʼi peʼe feafeaʼi tona fai. E lagi ʼaoga ke fakahā age peʼe feafeaʼi tona teuteuʼi. E feafeaʼi te fai ʼo te faʼahi ʼaia?
2 ʼI te kamataʼaga, ʼe ʼaoga ke toʼo he kiʼi temi moʼo fakasiosio peʼe kua mahino lelei ia ia ʼaē ʼe ako ko te teuteu ʼe ʼaoga ki ai te ako takitokotahi. Logope la te lautohi ʼa te tokolahi, kae ʼe mole nātou ʼiloʼi peʼe feafeaʼi te ako. ʼI te ʼu pasina 32 ki te 42 ʼo te tohi Manuel pour l’École du ministère théocratique ʼe lahi ai te ʼu manatu ʼaoga ʼe feala ke koutou fakahā kia ia ʼaē ʼe ako mokā ʼe ʼaoga.
3 Fakahā ki ai te maʼuhiga ʼo te ako: ʼE feala ke koutou fakahā age kia ia ʼaē ʼe ako Tohi-Tapu takotou tohi ʼaē neʼe koutou tohi peʼe neʼe koutou fakaʼiloga ai te ʼu kupu pea mo te ʼu talanoa tāfito. Koutou fakahā age ki ai ko te fakasiosioʼi ʼo te ʼu manatu ʼaē neʼe ina tohi ʼe feala ai tana manatuʼi te ʼu puani ʼe feala tana tali ʼaki tana ʼu palalau māhani. Koia ʼe mole faiga anai ʼo lau te ʼu manatu katoa ʼo te tohi mokā ʼe ina tali te ʼu fehuʼi. Ko takotou teuteu ki te faʼahi ʼaia ʼe tokoni anai ki ai ke ina fai he ʼu tali ʼe ʼaoga ki ʼamuli ʼi te ʼu fono ʼo te kokelekasio. Ko tana ʼu tali ʼe hā ai anai tana leleiʼia te tohi ʼaē neʼe ina ako pea ʼe hā mai ai te loloto ʼo tana mahino.
4 Koutou akoʼi ia ia ke ina fakaʼaogaʼi te Tohi-Tapu: ʼE ʼaoga ke akoʼi age kia ia ʼaē ʼe ako peʼe feafeaʼi te maʼu ʼo te ʼu vaega faka tohi-tapu ʼaē ʼe tuʼu ʼi te tohi ʼaē ʼe ina akoʼi. Ka feala tana fai fakalelei te faʼahi ʼaia, ʼe lahi anai tana leleiʼia, ʼo mahino ai ki ai ʼe ina ako te Tohi-Tapu. Logope la ʼi te kamataʼaga ʼe ʼaoga ke ina fakaʼaogaʼi te lisi ʼo te ʼu tohi ʼo te Tohi-Tapu ʼi te kamataʼaga ʼo te Tohi-Tapu, ʼe tonu anai ke fakaloto mālohiʼi ia ia ke fakamāmāhani mo te ʼu tohi e 66 ʼo te Tohi-Tapu. Mokā ʼe ina kumi pea mo lau he vaega faka tohi-tapu, ʼe ʼaoga ke koutou tokoni ki ai ke ina fakahā mai te manatu ʼe ʼalutahi mo te puani ʼaē ʼe tuʼu ʼi te palakalafe pea ʼaua naʼa talanoa ki te ʼu manatu ʼe mole ʼalutahi mo te faʼahi ʼaē ʼe akoʼi.
5 ʼI tona tuputupu ʼi te faʼahi fakalaumālie, ʼe koutou fakaloto mālohiʼi ia ia ke ina lau te Tohi-Tapu mai te kamataʼaga ʼo aʼu ki te fakaʼosi. Fakahā age ki ai ko te Tohi-Tapu katoa ko te Folafola ʼe haʼu mai te ʼAtua pea ko te kau kilisitiano moʼoni ʼe tonu ke nātou fakaʼaogaʼi te meʼa kai fakalaumālie ʼe haʼu mai ai. — Mat. 4:4; 2 Tim. 3:16, 17.
6 Koutou fakaʼaogaʼi niʼihi ʼu tohi faka teokalatike: Kapau kua tuputupu ia ia ʼaē ʼe ako, ʼe feala tana kamata fakaʼaogaʼi niʼihi ʼu tohi faka teokalatike. Fakaloto mālohiʼi ia ia ʼaki he fakasiosio poto, ke ina kumi he ʼu manatu ʼi te ʼu tohi ʼa te Sosiete ke mahino anai ki ai mokā ʼe ʼalu ki te ʼu fono ʼo te kokelekasio. Akoʼi age ki ai peʼe feafeaʼi te fakaʼaogaʼi ʼo te ʼu faʼahi makehe ʼo te Tohi-Tapu Traduction du monde nouveau, ohage la ko te “Index des mots bibliques les plus importants” (Kumiʼaga ʼo te ʼu kupu faka tohi-tapu ʼaē ʼe maʼuhiga). ʼI tana kamata fakatuʼutuʼu ʼo tana tānakiʼaga tohi faka teokalatike, fakahā age ki ai peʼe feafeaʼi te fakaʼaogaʼi ʼo te tohi Comment raisonner à partir des Ecritures, mo te Index, pea mo te Auxiliaire pour une meilleure intelligence de la Bible.
7 Kapau ʼe tou ako kia nātou ʼaē ʼe ako Tohi-Tapu peʼe feafeaʼi te teuteuʼi ʼo tanatou ako, ʼe tou tokoni anai kia nātou ke nātou tuputupu ʼi te moʼoni ohage ko he kau ako Tohi-Tapu faiva tatau aipe ʼi te ʼosi ʼo tanatou ako te Tohi-Tapu.