Tou Kamata He ʼu Ako Faka Tohi-Tapu ʼi Tesepeli
1 Neʼe fakatotonu e Sesu ki tana kau tisipulo ke nātou liliu ko te ʼu hahaʼi fai akonaki ʼo te logo lelei (Mat. 28:19, 20). Ko te faʼahi ʼe tou ʼuluaki fai moʼo akoʼi ʼo niʼihi, ko te fai ʼo he ʼu ako faka tohi-tapu. ʼE koutou kau koa ki te gāue ʼaia? Kapau ʼe mole koia ʼaia, e feafeaʼi koa takotou kamata he ako ke feala ai takotou maʼu he fiafia ʼi te lahi ʼo takotou kau ki te akoʼi ʼo ʼihi?
2 E lagi neʼe tou tuku ki he tahi he kiʼi pepa lotu pea neʼe tou fakapapau age ʼe tou toe liliu ʼo fai palalau mo ia ki te manatu ʼe tuʼu ʼi ai.
Kapau ʼe tou palalau mo he tahi neʼe tou tuku ki ai te kiʼi pepa lotu ʼaē “Ko te malamanei ʼo te temi ʼaenī ʼe hāo anai koa?”, ʼe feala ke tou ʼui age:
◼ “ ʼI taku haʼu ki henī kua hili kiai he ʼu ʼaho, neʼe tā palalau ki te maʼuhiga ʼo totatou temi pea neʼe fakakikite fakalelei e Sesu te ʼu aga ʼe hoko ʼi te temi ʼaenī. ʼE ʼau fia fakaʼaogaʼi he ʼu kiʼi minuta ʼo palalau fakanounou mo koe ki he manatu ʼo te kiʼi pepa lotu ʼaē neʼe ʼau tuku atu. Tā fakatokagaʼi te manatu ʼaē ʼe tuʼu ʼi lalo ʼo te kupu ‘Te fakaʼiloga.’ ” Tou fakahā age te pasina 3 ʼo te kiʼi pepa lotu, pea ke tou palalau ki te ʼu ʼuluaki palakalafe e lua peʼe tolu ʼi lalo ʼo te kupu tāfito, ʼo tou lau mo te ʼu vaega faka tohi-tapu mokā ʼe fealagia te temi. Tou fakahā peʼe feafeaʼi te hoko katoa ʼo te lea faka polofeta ʼa Sesu ia ʼaho nei. Tou fakatuʼutuʼu ke tou liliu ʼo fai palalau mo ia ki niʼihi palakalafe ʼo te kupu tāfito ʼaia. Tou fakaloto mālohiʼi ia ia ke ina lau te kiʼi pepa lotu ia muʼa ʼo tatatou liliu mai.
3 Peʼe feala ke koutou ʼui age fēnei:
◼ “ ʼI tata fai palalau talu mai, neʼe ʼau tuku atu te kiʼi pepa lotu ko tona kupu tāfito Ko te malamanei ʼo te temi ʼaenī ʼe hāo anai koa? ʼI te temi ʼaia neʼe tā palalau ai ki te gāue ʼa Sesu Kilisito ki te ʼu faʼahiga meʼa ʼo te malamanei. ʼE tā lau tana ʼu palalau ʼi te Tohi-Tapu ia Soane 17:3. [Tou lau.] Koia ʼe maʼuhiga ai ke tou ako ke tou ʼiloʼi ia te ʼAtua pea mo Sesu mokā ʼe tou fia maʼuli heʼegata, ko te faʼahi ʼaia ʼe maʼuhiga ke tou fai te meʼa ʼe tou fealagia ke tou maʼu te taʼi ʼatamai mālama ʼaia. ʼI te temi neʼe nofo ai Sesu ʼi te kele, neʼe ina fakahā te ʼu kalitate fakaofoofo ʼo te ʼAtua. ʼE mole ko he manatu fakapotopoto koa tatatou tui kapau e lahi tatatou ʼiloʼi ia Sesu pea mo tona minisitelio, pea e lahi ai tatatou ʼiloʼi tana Tāmai? [Tou tuku ke fai mai hana tali.] Koutou tokagaʼi te talanoa ʼi te tohi ʼaenī, Le plus grand homme de tous les temps (Te tagata ʼaē ʼe lahi tokotahi ʼo te ʼu temi fuli).” Tou lau te ʼuluaki pea mo te lua palakalafe ʼo te pasina hogofulu ʼo te kapite 116. Tou fakahā age ko te tohi ʼaia ʼe katoa ai te ʼu manatu ʼo te ʼu Evaselio e fā ʼo ʼuhiga mo Sesu pea ʼe tuʼu fefakahoahoa te ʼu faʼahiga meʼa neʼe hoko. Tou fakahā age te ʼu kupu tāfito ʼo te kapite, te ʼu paki, pea mo te mape ʼe tuʼu ʼi te kamataʼaga ʼo te tohi. ʼOsi ʼaia pea tou tuku age te tohi.
4 ʼI te ʼosi fakamālo ki he tahi neʼe ina toʼo te tohi “Le plus grand homme” (Te tagata ʼaē ʼe lahi tokotahi), ʼe feala hatatou ʼui age:
◼ “Ohage pe ko taku fakahā atu ʼi taku ʼuluaki ʼaʼahi mai, ko te tohi Le plus grand homme (Te tagata ʼaē ʼe lahi tokotahi) neʼe fakatuʼutuʼu moʼo fai ʼo he ako faka tohi-tapu. ʼE ʼau fia fakahā fakanounou atu peʼe feafeaʼi tona fakaʼaogaʼi fakalelei.” Tou avahi te tohi ʼi te kapite 1, “Des messages venant du ciel” (Te ʼu fagonogono mai lagi). Tou fakatokagaʼi ia ia ki te ʼu fehuʼi ʼaē ʼe tuʼu ʼi ai. Tou lau te ʼuluaki fehuʼi, ʼosi ʼaia pea tou vakaʼi te ʼu ʼuluaki palakalafe. Faka ʼalutahi mo te paki ʼo te lua pasina. Tou palalau ki te ʼu fehuʼi ʼaē kei toe, pea mo fakahā tona ʼu tali mokā ʼe fealagia te temi. ʼI muʼa ʼo te fakaʼosi ʼo te fai palalau, tou fakatuʼutuʼu ke tou toe liliu ʼo hoko atu te fai palalau.
5 Moʼo maʼu ʼo te manatu lelei, ko te teuteu lelei pea mo te fakaʼaogaʼi ʼo te ʼu fealagia fuli, ʼe tou maʼu ai anai he ʼu meʼa ʼe ʼaoga moʼo kamata ʼo he ako faka tohi-tapu ʼi te māhina ko tesepeli.