Koutou Tufa Ki Te Mālama Te ʼu Nusipepa ʼAē ʼe Lelei ʼAupito
1 Ko te fakatuʼutuʼu ʼa Te Tule Leʼo ko “te fakavikiviki kia Sehova ʼAtua te Tuʼi ʼo te mālama katoa.” Ko te Réveillez-vous! ʼe “fai ki te famili takitokotahi. . . . Ko te nusipepa ʼaenī ʼe ina foaki mai te ʼu tupuʼaga ʼo tatatou falala ki te fakapapau ʼa te Tupuʼaga ʼaē ka ina fakatuʼu ia te tokalelei pea mo te maʼuli fīmālie ʼi te mālama foʼou.” Ko te ʼu talanoa ʼaenī ʼe tuʼu ʼi te ʼu nusipepa. Ko te muliʼi ʼo te ʼu fakatuʼutuʼu ʼaia ʼe ina fakaliliu te ʼu nusipepa ʼaia ko he matapuna moʼo fakaloto mālohi ʼo te toko miliona hahaʼi ʼaē ʼe nātou lau te ʼu nusipepa.
2 ʼE tou fakahāhā anai te ʼu faʼahi kehekehe ʼo te ʼu nusipepa ʼaia ʼi totatou minisitelio ʼi ʼApelili pea mo Maio. Ke tou faiva ʼi te faʼahi ʼaia, ʼe ʼaoga ke tou ʼiloʼi lelei te ʼu manatu ʼo te ʼu nusipepa. Koutou lau te ʼu alatike fuli, ʼo koutou tohi te ʼu puani ʼe lagi ʼe feala takotou fakaʼaogaʼi mokā ʼe koutou tufa te ʼu nusipepa. Koutou fakakaukauʼi te ʼu meʼa ʼe ʼaoga ki te hahaʼi. Koteā koa te ʼu meʼa faka sosiale, te ʼu meʼa faka famili, peʼe ko te ʼu meʼa ʼi te loto ʼe uga ai te fakakaukau ʼa te tokolahi ʼi tokotou vāhaʼa fale? Koutou manatuʼi he puani ʼe feala ke koutou talanoa ki ai ke lave ʼi tonatou loto pea ke uga ai nātou ke lahi tanatou fia lau te ʼu nusipepa.
3 Koutou Fakahā Te Nusipepa ʼo Te ʼAho 1 ʼo ʼApelili: Tokolahi te hahaʼi ʼe holi ki he mālama ʼe lelei age, ʼe mole ʼi ai he ʼu faigataʼaʼia ʼe pulihi ai foki tonatou fiafia ʼi te temi nei.
ʼI te hili ʼo tatatou fakahā totatou higoa, ʼe feala ke tou ʼui age:
◼ “ ʼE ʼau fia fakahā atu te talanoa ʼaoga ʼe tuʼu ʼi te alatike ʼaenī ko tona kupu tāfito ‘Ko He Mālama ʼe Lelei Age—Ko He Misi Pe Koa Ia?’ ʼE ina ʼui fēnei: ‘Ko te mālama ʼaenī, totatou mālama, ʼe mahino papau ʼe mole ko te koga meʼa lelei ʼaupito ia. . . . Ko te lisi ʼo te ʼu malaʼia ʼaenī ʼe hage ʼe mole ʼi ai hona gataʼaga.’ Ko te taʼi ʼamanaki ʼaia ʼe faigataʼa ai te tui ki te temi ka haʼu, kaeā koa la? Kae, tuku muʼa ke ʼau fakahā atu te manatu ʼe tuʼu ia Pesalemo 37:11 ʼo ʼuhiga mo te temi ka haʼu.” ʼI te ʼosi lau ʼo te vaega, koutou fehuʼi age ki ai pe koteā tana manatu ki te fakapapau ʼaia. Kapau ʼe lelei tana tali, koutou fakahā age te alatike “Kua Ōvi Mai—Te Mālama ʼe Lelei Age!,” ʼi te pasina 4, pea koutou ʼui age: “ ʼE lahi te ʼu vaega ʼo te Tohi-Tapu ʼe tuʼu ʼi ai, ʼo kau ai mo te vaega ʼaenī neʼe ta lau ia Pesalemo 37:11. ʼE ʼau ʼiloʼi papau ʼe ke fiafia anai ʼi te lau ʼo te ʼu alatike ʼaia pea mo kumi te ʼu vaega ʼi tau Tohi-Tapu. ʼE ʼau fiafia ʼi tona tuku atu ʼaki tona totogi fakaʼofa.”
4 Koutou Fakahā Te Nusipepa ʼo Te ʼAho 15 ʼo ʼApelili: Ko te alatike ʼo te pasina 4 ʼe ina fai te fehuʼi ʼaenī: “Kofea ʼAē ʼe Feala Ai Hakotou Maʼu He Takitaki ʼe Tau Mo Te Falala?”
ʼI te ʼosi ʼo takotou fakamālo, ʼe feala ke koutou ʼui age:
◼ “ ʼE lahi foki te ʼu faigataʼaʼia ʼi te mālama ia ʼaho nei, ohage la [koutou talanoa ki he meʼa neʼe hoki hoko ʼi te kolo peʼe ko he ʼu logo ʼo te mālama]. Ko te faʼahi ʼaia ʼe tou punamaʼuli ai mokā ʼe mole maʼu e he tahi te ala ʼaē ke hāo ai mai te ʼu faigataʼaʼia. Meʼa lelei foki, ko te tohi ʼo 2 Timoteo 3:16, 17 ʼe ina fakahā mai ko te Tohi-Tapu ko he taki ʼo ʼuhiga mo te maʼuli fiafia pea mo fīmālie.” ʼI te hili ʼo te lau ʼo te ʼu vaega ʼaia, koutou fakahā peʼe feafeaʼi te tokoni ʼa Te Tule Leʼo kia tatou ke tou mahino pe koʼe ko te Tohi-Tapu ʼe ko te taki moʼoni.
5 Kapau ʼe koutou fia fakahā te Réveillez-vous!, ʼe tonu ke koutou fakaʼaogaʼi te nusipepa ʼo te ʼaho 8 ʼo Maio pea mo te alatike “Un espoir sûr pour les enfants” (Ko he falala moʼoni ki te kau tamaliki) E lagi ʼe koutou sio anai ʼe lave ʼi te ʼu mātuʼa te ʼu meʼa ʼaē ʼe ʼaoga ki tanatou fānau pea ʼe nātou fia ʼiloʼi anai te meʼa ʼaē ʼe tonu ke fai moʼo tokoniʼi ʼo nātou.
6 Kapau ʼe tou fiafia ʼo ʼuhiga mo ʼatatou ʼu nusipepa, ʼaē ʼe lelei ʼaupito ʼi te mālama, ʼe tou holi anai ke tou tufa ki niʼihi ke feala ai foki hanatou maʼu te ʼamanaki ki te Puleʼaga pea mo kau ki te fakavikiviki ʼo Sehova te Tuʼi ʼAliki ʼo te ʼatulaulau.—Pes. 83:18.