Te ʼu Fua Lelei ʼe Tou Maʼu ʼi Tatatou Gāue Mo Niʼihi
1 ʼI takotou manatu ʼe ʼi ai koa he ʼu fua lelei ʼe tou maʼu ʼi tatatou kaugā gāue mo niʼihi ʼi te minisitelio? Neʼe ʼiloʼi e Sesu te faʼahi ʼaia. Logope la te lahi ʼo te taʼukai pea mo te tokosiʼi ʼo te kau gāue, neʼe ina fekauʼi te toko 70 tisipulo ki te gāue faka mafola ʼo nātou ʼolo “taki toko lua.” ʼE ko he fakapale ʼaē neʼe nātou maʼu ʼi tanatou ʼolo ʼo fai faka mafola ʼi te “ ʼu kolo pea mo te ʼu koga meʼa fuli pe ʼaē neʼe ʼamanaki ke ʼalu tonu kiai”!—Luka 10:1, 17; Mat. 9:37.
2 ʼE fakaloto mālohi te gāue mo niʼihi. Ko ʼihi ia tatou ʼe umiuminoa pea ʼe faigataʼa kia nātou te palalau ki te kau matāpule. Ko te kaugā gāue mo he tahi ʼe feala ke tou maʼu ai he falala ke tou palalau ki te Folafola ʼa te ʼAtua ʼaki he lototoʼa. Mokā ʼe ʼi ai he tahi mo tatou, e lagi ʼe faigafua age te fai ʼo tatatou gāue ʼo mulimuli ki te ako ʼaē neʼe fakahā mai. (Taag. 27:17) Neʼe ʼui fēnei e te tagata poto: “Ko he toko lua ʼe lelei age ʼi he tokotahi.”—Tnk. 4:9.
3 ʼE lelei tatatou gāue mo te ʼu kaugā faka mafola pea mo te ʼu pionie kehekehe. Ko te ʼu kaugā fagona gāue ʼa te ʼapositolo ko Paulo, ko Palanapasi, Silasi, Timoteo, pea mo Soane Maleko, pea neʼe nātou maʼu te ʼu tapuakina lahi ʼi tanatou fai faka mafola fakatahi. Ko te meʼa pe la ʼaia ʼe feala ke hoko moʼoni ia ʼaho nei. Neʼe kua koutou gāue koa mo he tahi kua fualoa tana nofo ʼi te moʼoni? ʼI te ʼosi ʼo takotou fakatokagaʼi tana faʼahiga fai faka mafola, neʼe lagi koutou fakamaʼumaʼu he ʼu manatu ʼe lelei moʼo tokoni kia koutou ke koutou tuputupu ʼi takotou gāue. Neʼe kua koutou kaugā gāue koa mo he kau fai faka mafola ʼe foʼofoʼou ʼi te gāue? ʼOsi ʼaia e lagi feala ke koutou vaevae mo nātou te meʼa ʼaē neʼe koutou ako, ke tokoni kia nātou ke lahi tanatou faiva pea mo nātou maʼu te fiafia ʼo lahi age ʼi tonatou minisitelio.
4 ʼE koutou fai koa ʼi te temi nei he ako faka Tohi-Tapu? Kapau ʼe koutou fai te faʼahi ʼaia, he koʼe ʼe mole koutou fakaafe he tahi ʼi te ʼu tagata ʼāfea peʼe ko te taupau fakakolo ke kaugā gāue mo koutou? ʼE ko he meʼa lelei ki ʼatatou ʼu ako faka Tohi-Tapu ke nātou ʼiloʼi te ʼu tagata taupau. Kapau ʼe koutou lotolotolua ʼi te fai ʼo te ako faka Tohi-Tapu mokā ʼe koutou ʼolo mo he tagata ʼāfea, ʼe lagi ʼe lotolelei anai ia ke ina fai te ako, kae koutou mulimuli kiai. Ki muli age, ʼe feala hakotou fehuʼi ki ai he ʼu tokoni ke feala hakotou tokoni kia ia ʼaē ʼe ako faka Tohi-Tapu ke tuputupu fakavilivili.
5 Ke ia koutou he ʼu palalau fakaloto mālohi mokā koutou gāue mo niʼihi. Ke ia koutou he ʼu manatu ʼe tau mokā koutou palalau ki te telituale. Ke ʼaua naʼa koutou palalau ki niʼihi peʼe koutou fatufatuʼi te ʼu fakatuʼutuʼu ʼo te kokelekasio. Ke koutou manatuʼi tokotou minisitelio, pea mo te ʼu tapuakina ʼaē ʼe foaki mai e Sehova. Kapau ʼe koutou fai te faʼahi ʼaia, ʼe koutou liliu anai ki tokotou ʼapi mo tokotou ʼu kaugā gāue, kua koutou lotomālohi ʼi te faʼahi fakalaumālie.
6 E lagi ʼe faigataʼa takotou gāue tuʼumaʼu mo ʼihi tēhina pea mo tuagaʼane ʼuhi ko tokotou ʼu ʼaluʼaga. Kae, kapau ʼe feala takotou fai te faʼahi ʼaia, he koʼe ʼe mole koutou fakatuʼutuʼu ke koutou gāue ʼi he kiʼi temi mo he kaugā faka mafola? ʼE koulua maʼu anai he ʼu tapuakina!—Lom. 1:11, 12.