Ke Faka Mafola Te Moʼoni ʼi Te ʼAho Fuli ʼo Faʼifaʼitaki Kia Sesu
1 Neʼe ʼi ai te gāue makehe ʼa Sesu neʼe tonu ke ina fakahoko ʼi tana haʼu ki te kele. Ko te gāue ʼaia: ‘Ko te fakamoʼoni ki te moʼoni.’ (Soane 18:37) Neʼe ina kalagaʼi te moʼoni ʼo ʼuhiga mo te ʼu kalitate fakaofoofo ʼo tana Tāmai pea mo tana ʼu fakatuʼutuʼu. Ko te gāue ʼaia neʼe hage ia ko hana meʼa kai; ko tona maʼuli katoa neʼe fakatafito ki te gāue ʼaia. (Soane 4:34) Neʼe ʼui e Luka ʼo ʼuhiga mo Sesu neʼe “fai akonaki ia ʼi te ʼaho fuli pe ʼi te fale lotu.” (Luka 19:47) Neʼe fakaʼaogaʼi katoa e Sesu te temi ʼaē neʼe ina maʼu. (Soane 9:4) ʼI muʼa ʼo tona mate, neʼe feala ke ina ʼui age ki tana Tāmai: “Neʼe ʼau faka kolōliaʼi koe ʼi te kele, neʼe ʼau fakaʼosi te gāue ʼaē neʼe ke tuku mai ke ʼau fai.”—Soane 17:4.
2 Ka fonu totatou ʼu loto ʼi te loto fakafetaʼi ki te ʼu meʼa fuli ʼaē neʼe fai e Sehova, ʼe toe feiā aipe te uga ʼo tatou ke tou palalau ʼo ʼuhiga mo ia ʼi te ʼaho fuli pe. ʼO tou liliu ai leva ohage ko te ʼu tisipulo ʼa Sesu ʼaē neʼe nātou ʼui ʼaki he lototoʼa: “ ʼE mole feala ke tuku tamatou palalau ki te ʼu meʼa ʼaē neʼe mātou sisio kiai pea mo fagono kiai.” (Gāue 4:20) Ko tanatou palalau ʼo ʼuhiga mo Sehova neʼe fai hoholo, heʼe ʼui fēnei e te fakamatala “ ʼi te ʼaho fuli pe . . . neʼe nātou haga fai aipe.” (Gāue 5:42) ʼE tonu ke tou fai te fehuʼi ʼaenī kia tatou, ‘ ʼE ʼau faʼifaʼitaki koa kia Sesu, ʼaē ko toku Tagata Faiako?’
3 Ke Fai Fakavilivili Te Fai Faka Mafola: Neʼe fakakikite e Sesu ka ʼosi anai te faka mafola ʼo te logo ʼo te Puleʼaga ʼi te kele katoa, ʼe “hoko mai ai leva te fakaʼosi.” (Mat. 24:14) ʼAki te meʼa ʼaia ʼe tonu ke tou ʼiloʼi ai te maʼuhiga pea mo ʼaoga ke tou fai fakavilivili tatatou gāue. ʼI tatatou ʼiloʼi ʼaē ʼe pipiki ki ai te ʼu maʼuli ʼe lauʼi miliona, ʼe mole ʼi ai he tahi age meʼa ʼe maʼuhiga age peʼe lelei age kia tatou ʼi te fai faka mafola. ʼUhi ʼaē kua fakaōvi mai te fakaʼosi ʼo te ʼu faʼahiga meʼa ʼaenī, ko te temi ʼaē kei toe moʼo fakahoko ʼo te gāue ʼaia kua nounou ia!
4 ʼE hā ʼi te ʼu tānaki ko Sehova ʼe ina fakavaveʼi te fakatahiʼi ʼo te hahaʼi ʼaē ʼe hage ko he ʼu ōvi. (Is. 60:22) ʼE lahi ʼi te ʼu potu ʼo te kele, ko te hahaʼi ʼe ʼōmai ki te moʼoni, ʼo nātou ʼui fakafiafia: “ ʼE mātou ʼolo anai mo koutou, koteʼuhi neʼe mātou logo ko te ʼAtua ʼe nofo mo koutou”! (Sakl. 8:23) Koia, ko te ʼu palalau ʼa Sesu ʼe moʼoni age ia ʼi te temi nei: “Ko te taʼukai ʼe lahi, kaʼe tokosiʼi te kaugāue. Koutou faikole ki te ʼAliki ʼo te taʼukai ke ina fekauʼi mai he kaugāue ki tana taʼukai.” (Mat. 9:37, 38) ʼE mole uga koa la tatou e te faʼahi ʼaia ke tou liliu ohage ko te ʼu tisipulo ʼa Sesu ʼaē “ ʼi te temi fuli pe, neʼe nātou ʼi te fale lotu ʼo nātou tapuaki ki te ʼAtua”?—Luka 24:53.
5 Ke Tou Fakahā Te Moʼoni ʼi Te ʼAho Fuli: ʼI te ʼaho fuli, ʼe tonu ke tou kumi he ʼu faʼahiga fai moʼo vaevae te moʼoni ki niʼihi. ʼE lahi te ʼu faigamālie. ʼE feala koa hatatou toʼo he ʼu kiʼi minuta ʼo telefoni ki hotatou kaumeʼa peʼe ko he tahi ʼe tou ʼiloʼi ʼe fia logo anai? Peʼe feala koa ke faitohi ki he tahi ʼe tou ʼiloʼi mole tou maʼu ki tona ʼapi? Neʼe tou manatuʼi koa ʼo tuku he kiʼi pepa lotu ki te tagata faifakatau mokā tou ʼolo ʼo fai fakatau. ʼE mahino ia, ʼe feala ke tou fakakaukauʼi te tahi ʼu faigamālie ʼe tou maʼu ʼi te ʼaho fuli moʼo vaevae tatatou ʼamanaki mo ʼihi. Kapau ʼe tou faiga pea mo fakahā he lototoʼa, ʼe tokoni anai ia Sehova kia tatou.—1 Tes. 2:2.
6 Koia, ka tou kamata tatatou ʼu gāue ʼi te ʼaho fuli, ʼe tonu ke tou fai te fehuʼi ʼaenī kia tatou, ‘ ʼE ʼau fai anai koa he meʼa moʼo vaevae ʼo taku ʼamanaki mo he tahi mo kapau ʼe ʼi ai he faigamālie ia ʼaho nei?’ Ke tou faʼifaʼitakiʼi te aga ʼa Sesu, ʼaē neʼe ina fakamahino te tupuʼaga ʼo tona fekauʼi mai ki te kele: “ ʼE tonu ke ʼau toe faka mafola te logo lelei ʼo te puleʼaga ʼo te ʼAtua.” (Luka 4:43) Kapau ʼe tou loto ke tou hage ko totatou Tagata Faiako, ʼe tou faʼifaʼitaki anai kia ia.—Luka 6:40.