Neʼe Kua Koutou ʼAhiʼahi Koa Te Fai Faka Mafola ʼi Te Afiafi?
1 Ko tatou fuli ʼe tou fiafia mokā fua lelei tatatou gāue. ʼI te tahi faʼahi, kapau ʼe mole hona ʼu fua lelei, pea ʼe tou lotovaivai mo lotomamahi. ʼI hatatou gāue mālohi ʼe tou maʼu ai te fakapale, pea ʼe ko he tapuakina. (Vakaʼi ia Tagata Tānaki 3:10-13.) ʼE feala ke tou fakaʼaogaʼi te pelesepeto ʼaenī ki tatatou gāue fai faka mafola. Kua tou ʼiloʼi papau, mokā tou fai faka mafola ʼi te ʼu ʼapi, pea mo tou fai palalau mo te hahaʼi ʼo ʼuhiga mo te Tohi-Tapu, ʼe tou liliu ki totatou ʼapi kua tou lotomālohi ʼi te faʼahi fakalaumālie. ʼE tou logoʼi ʼi totatou loto, neʼe tou fakahoko te meʼa maʼuhiga.
2 ʼI te tahi ʼu fenua ʼe ʼi ai te ʼu hola kua faigataʼa ai te maʼu ʼo te hahaʼi ʼi tonatou ʼapi. ʼE fakahā e te ʼu tānaki, ʼe lahi te ʼu fenua ʼe ko te toko 50 tupu ki te teau, ia te hahaʼi ʼaē ʼe mole maʼu atu ki tonatou ʼu ʼapi mokā tou ʼolo ʼo fai faka mafola ʼi te uhu. Moʼo tauʼi ʼo te fihifihia ʼaia, ʼe lahi te ʼu kokelekasio ʼe nātou fai te ʼu fakatuʼutuʼu moʼo fai faka mafola ʼi te afiafi, pea neʼe nātou maʼu te ʼu fua lelei. ʼE fakamatala e te ʼu kaugā fai faka mafola, mokā nātou faka mafola ʼi te ʼu afiafi, ʼi te agamāhani, ʼe tali leleiʼi e te hahaʼi te logo ʼo te Puleʼaga. Neʼe kua koutou ʼahiʼahi koa la te fai faka mafola ʼi te afiafi ʼi tokotou telituale?—Vakaʼi ia Maleko 1:32-34.
3 ʼE Fai e Te ʼu Tagata ʼĀfea Te ʼu Fakatuʼutuʼu ʼo ʼUhiga Mo Te Fai Faka mafola ʼi Te Afiafi: ʼI te tahi ʼu koga meʼa ʼe lagolago lelei te ʼu tēhina mo te ʼu tuagaʼane ki te ʼu fono ʼo te fai faka mafola, ʼaē ʼe fai ʼi te ʼu hili hoʼatā, peʼe ko te ʼu afiafi. ʼE feala ke fai he ʼu fakatuʼutuʼu ʼo ʼuhiga mo te kau tūpulaga ʼaē ʼe ʼosi mai tanatou ako ʼi te hoʼatā, pea mo te hahaʼi lalahi ʼaē ʼe ʼosi afiafi tanatou gāue fakamālama. Ko ʼihi kaugā fai faka mafola ʼaē ʼe mole feala tanatou kau ki te gāue fai faka mafola ʼi te ʼu fakaʼosi vāhaʼa, ʼe nātou leleiʼia te fai faka mafola ʼi te afiafi ʼi te lolotoga vāhaʼa, ke feala ai hanatou kau tuʼumaʼu ki te fai faka mafola.
4 ʼE feala ke koutou fai te ʼu koga kehekehe ʼo te fai faka mafola ʼi te afiafi. ʼE feala ke koutou fagonogono ʼi te ʼu ʼapi ʼaki te ʼu nusipepa peʼe koutou fakaʼaogaʼi te tufa ʼo te māhina. ʼI te ʼu afiafi ʼe ko te temi lelei ʼaia moʼo palalau ki te hahaʼi ʼaē ʼe mole maʼu atu ki tonatou ʼu ʼapi e te ʼu kaugā fai faka mafola, mokā nātou ʼolo ʼi te uhu ʼo te lolotoga vāhaʼa peʼe ko te ʼu fakaʼosi vāhaʼa. ʼE toe lelei foki la te fai faka mafola ʼi te ʼu ala, heʼe koutou felāveʼi ai mo te hahaʼi ʼaē ʼe ʼōmai mai tanatou gāue. Ko te tokolahi ʼe nātou tokagaʼi ko te afiafi ʼe ko te temi lelei ʼaia moʼo ʼaʼahi ʼo nātou ʼaē ʼe fia logo.
5 Ke Tou Tokakaga Pea Ke Tou Agapoto: ʼI te tahi ʼu fenua, ʼe feala ke hoko kia kita he tuʼutāmaki mokā kita ʼalu ki tuʼa ʼi te ʼu afiafi. ʼE ko he aga fakapotopoto anai te feʼoloʼaki taki toko lua peʼe faka kūtuga ʼi te ʼu ala, pea mo ʼaʼahi te hahaʼi ʼi tonatou ʼu ʼapi peʼe ko te ʼu fale fata mokā ʼe koutou ʼiloʼi papau ʼe koutou hāo anai mai ai. Ka koutou fisifisi te matapā, koutou tutuʼu ʼi te faʼahi ʼaē ʼe feala ke sio mai ai kia koutou, pea koutou fakahā lelei pe ko ai ia koutou. Koutou maʼu he fakasiosio poto ʼo ʼuhiga mo te faʼahi ʼaia. Kapau ʼe koutou fakatokagaʼi ʼe maʼumaʼua te loto fale, ohage la ʼe nātou kakai, pea koutou ʼui age ʼe feala ke koutou toe liliu mai ʼi he tahi temi. ʼI te agamāhani ʼe lelei age ke koutou fakatuʼutuʼu ke kamata tautonu takotou fagonogono ʼi te afiafi, ʼi takotou fai ʼaē ka kua tauhala, ʼi te temi ʼaē kua teuteu ai te hahaʼi ke nātou ʼolo ʼo mālōlō.
6 Tou foaki ki te ʼAtua he “tauhi taputapu ʼi te ʼaho mo te po,” pea ʼe mahino ia ʼe tapuakina anai e Sehova tatatou ʼu faiga.—Fkhā. 7:15.