Te Laga ʼo Te ʼu Fale ʼo Te Puleʼaga ʼi Te Malamanei Katoa
1 ʼE ʼaoga ʼaupito ke laga he ʼu Fale ʼo te Puleʼaga ʼi te malamanei katoa. Lolotoga te taʼu pe ʼaenī kua hili, neʼe fakatuʼu te ʼu kokelekasio foʼou e 3 288. ʼI te ʼu kokelekasio ʼaia ʼe lahi te ʼu kokelekasio neʼe fakatuʼu ʼi Afelika, mo Asia, mo te Lotomalie pea mo te Potu Toga ʼo Amelika, pea mo te Potu Hahake ʼo Eulopa.
2 Neʼe fakahā e te ʼu Minisitelio ʼo Te Puleʼaga e tolu te ʼu paki ʼo te ʼu Fale ʼo te Puleʼaga ʼaē neʼe kua laga ʼi Afelika, mo te Potu Hahake ʼo Eulopa, pea mo Amelika Latina. Kae ʼe fakahā e te ʼu tānaki, ʼi te fenua e tahi, ʼe fakaʼaogaʼi e te ʼu kokelekasio e 568 te Fale ʼo te Puleʼaga pe e tahi. ʼI te tahi fenua, ko te Fale ʼo te Puleʼaga e tahi ʼe fakaʼaogaʼi e te ʼu kokelekasio e 129. ʼI te tahi fenua, ʼe fakafuafua ko te Fale ʼo te Puleʼaga e tahi ʼe fakaʼaogaʼi e kokelekasio e 41. ʼI te tahi ʼu fenua, ʼaē ko kokelekasio e 1 000 tupu, neʼe mole heʼeki feala ke nātou fakatuʼu he Fale ʼo te Puleʼaga e tahi. ʼE tupu te faʼahi ʼaia ʼuhi ko te ʼu fihifihia faka ekonomike. Logope la kua lahi te gāue ʼaē kua fai, kae ʼe kei ʼaoga pe ke hoko atu te gāue. ʼE tou ʼiloʼi papau ko te ʼu kokelekasio ʼi Niu-Kaletonia ʼe nātou fia tokoni anai ki te ʼatu ʼu kokelekasio ʼaia ʼi te tahi ʼu fenua ke nātou maʼu he ʼu Fale ʼo te Puleʼaga ʼe lelei.
3 ʼE ʼalutahi te faʼahi ʼaia mo te vaega ʼo 2 Kolonito 8:14, ʼaē ʼe ʼui fēnei: “ ʼAki he fakatatau, ke fakakatoa e takotou ʼu koloā ʼaē ʼe mole ʼaoga tāfito kia koutou, te ʼu meʼa ʼaē ʼe mole nātou maʼu.” ʼE lahi te ʼu fenua ʼe ʼi ai te Kesi ʼo tanatou Fale ʼo te Puleʼaga, kae ʼe mole feala ʼuhi ko te ʼaluʼaga faka ekonomike, ke fakatuʼutuʼu e te ʼu tēhina ke nātou laga te ʼu Fale ʼo te Puleʼaga ʼaē ʼe ʼaoga. Kae ʼaki te lagolago ʼo te ʼu tēhina ʼo te tahi ʼu fenua, neʼe lava tokoni te Sosiete ki te laga ʼo he ʼu Fale foʼou ʼo te Puleʼaga e 413, pea mo fakafoʼou te tahi ʼu Fale ʼo te Puleʼaga e 727 ia māhina pe e fā, ʼi te ʼu fenua e 75. ʼI te kei ʼaoga ʼaē ke laga he ʼu Fale ʼo te Puleʼaga, ʼe tonu ke toʼo he paʼaga ʼi te ʼu Kesi ʼo te Fale ʼo te Puleʼaga ʼi te fenua ʼaia moʼo lagolago ki te laga fale ʼi te tahi ʼu fenua. ʼE hoko atu te foaki e te ʼu kesi ʼo te Fale ʼo te Puleʼaga ʼi Niu-Kaletonia he paʼaga ki te laga ʼo te ʼu Fale ʼo te Puleʼaga ʼaē ʼe ʼaoga, ʼo aʼu ki te katoa ʼa te ʼu meʼa ʼaia ʼaē ʼe ʼaoga pea mo mulimuli ki te paʼaga ʼaē ʼe maʼu, pea ʼe nātou toe fakaʼaogaʼi anai moʼo lagolago ki te tahi ʼu kokelekasio. ʼE tou fiafia ʼi tatatou sio ki te laga ʼo te tahi ʼu Fale ʼo te Puleʼaga ʼi te malamanei katoa moʼo fakavikiviki kia Sehova.—Pes. 102:16; Asea 1:7, 8.