ʼE Mafola Te Tauhi Moʼoni ʼi Te Eulopa ʼo Te Potu Esite
1 Ko te kau Kilisitiano ʼo te ʼuluaki sēkulō neʼe ko he kau fai faka mafola fakamalotoloto ʼo te Puleʼaga. Neʼe nātou fiafia ʼi tanatou sio ki te ʼu kokelekasio ʼaē neʼe “tupulaki o hahaiʼage i te aho fuape.” (Gaue 16:5) ʼAki tanatou fai faka mafola fakamalotoloto, neʼe mafola te tauhi moʼoni ki Asia, mo Afelika, pea mo Eulopa, ʼo tānaki ai he hahaʼi tui ʼe kaugamālie.
2 ʼI te temi ʼaenī ʼo te fakaʼosi, ʼe haga tuputupu te mafola ʼo te kau Kilisitiano moʼoni, tāfito ʼi te ʼu fenua ʼo Eulopa Esite. ʼI te ʼu fenua ʼaē neʼe tapuʼi ai e te ʼu puleʼaga tatatou gāue fai faka mafola ʼo aʼu ki te ʼu taʼu 1990, kua maʼu ai he tuputupu fakaofoofo. ʼE fakahā mai e te Annuaire 1999, ko te ʼu fenua e lua ko Lusia pea mo Ukraine, neʼe maʼu ai te toko 100 000 tupu kau fai faka mafola. ʼI te ʼu potu fenua e 15 ʼo te Union Soviétique ʼāfea, ko te toko 220 000 tupu neʼe nātou foaki tonatou maʼuli kia Sehova pea mo papitema talu mai te taʼu 1991! ʼUhi ko te tuputupu vave ʼaia, neʼe tonu ai leva ke laga he ʼu Fale foʼou ʼo te Puleʼaga pea mo he ʼu Fale Fakatahi, pea ke fakalahi te ʼu filiale.
3 Ohage ko tona fakahā mai e Te Minisitelio ʼo Te Puleʼaga ʼo Malesio 1997, ko te vahe ʼo te Falā ʼa te Sosiete ki te ʼu Fale ʼo te Puleʼaga, kua fakaʼaogaʼi moʼo tokoni ki te ʼu kokelekasio ʼi te ʼu fenua ʼaē ʼe maʼuhiga ai ke ʼi ai he ʼu fale ʼo te Puleʼaga, pea ʼe totogi kovi ai te ʼu meʼa ʼuhi ko te ʼu fihifihia faka ekonomika ʼo te fenua. Talu mai te māhina ʼo Malesio 1996 ʼo aʼu ki ʼOketopeli 1998, neʼe fakagafua e te Sosiete ki ʼihi filiale ke nātou laga te ʼu Fale ʼo te Puleʼaga e 359 ʼi te ʼu fenua e 11 ʼo Eulopa Esite ʼaē ʼe nātou takitaki. Ko te falā ʼaia ʼe fakaʼaogaʼi moʼo totogi ʼaki te moʼi kele pea mo te ʼu meʼa gāue ʼaē ʼe ʼaoga ki te laga ʼo te ʼu Fale foʼou ʼo te Puleʼaga, pea mo te fakafoʼou ʼo te ʼu fale ʼaē kua tuʼu ai. Ko te ʼu paki ʼaenī ʼe nātou fakahā mai peʼe fakaʼaogaʼi feafeaʼi e te ʼu tēhina ʼi Eulopa Esite te Falā ʼa te Sosiete ki te laga ʼo te ʼu Fale ʼo te Puleʼaga, ko te falā ʼaia neʼe tānaki ʼi Amelika pea mo te tahi ʼu fenua.
4 ʼI te taʼu 1998, neʼe maʼu te tuputupu ʼi Bulgarie ʼe ko te vahe 12 ki te teau, pea neʼe fiafia ʼaupito te ʼu tēhina ʼi te avahi ʼo tanatou fale fono foʼou ʼi ʼApelili ʼo te taʼu ʼaia. Neʼe maʼu te tuputupu ʼi Croatie ʼaē ko te vahe 4 ʼi te teau, pea ʼe kei laga nei e te ʼu tēhina he ʼu fale fono foʼou ke haʼele ki muʼa te tauhi moʼoni. ʼI Hongrie, ʼe ko fale fono e 80 ʼaē ʼe fakaʼaogaʼi e te ʼu kokelekasio e 144. Ko tona faka ʼuhiga, ko te 61 ki te teau ʼo te ʼu kokelekasio e 235 ʼo te fenua ʼaia, kua nātou maʼu tanatou fale fono ʼa nātou totonu. ʼI Macédoine, neʼe fakaʼosi te ʼu fale fono foʼou e lua ʼaki te polokalama laga fale, pea ʼe lolotoga fai te tahi ʼu fale. ʼI te fasiga taʼu māfana ʼo te 1999, neʼe laga te ʼu fale fono e lua ʼi te falefata e tahi ʼi te kolo muʼa ko Skopje. ʼE feala ke fakaʼaogaʼi te ʼu fale ʼaia e te ʼu kokelekasio kehekehe e ono.
5 ʼI te taʼu ʼaenī kua ʼosi ʼi Lusia, neʼe fakafuafua neʼe papitema te toko 260 tupu ʼi te vāhaʼa fuli! ʼI tana faʼifaʼitaki ki te tahi ʼu fenua, kua fakatuʼutuʼu e te filiale ʼi Lusia te ʼu Komite Fakafenua e 12 ki te Laga Fale ʼi te fenua katoa, ke nātou takitaki te ʼu laga fale ʼaē ka fai ai. ʼI te potu noleto ʼo St. Pétersbourg, ʼe lolotoga fai te ʼuluaki Fale Fakatahi ʼo te fenua ʼaia, pea ʼe feala anai ke tali ai te toko 1 600. ʼE toe maʼu ai anai te ʼu Fale e nima ʼo te Puleʼaga, mo ʼonatou hekaʼaga e 200 takitahi. Moʼo tali ki te ʼu meʼa fakalaumālie ʼaē ʼe ʼaoga ki totatou ʼu tēhina pea mo te hahaʼi ʼaē ʼe fia logo ʼi Ukraine, neʼe laga ai te ʼu Fale ʼo te Puleʼaga e 84 pea ʼe lolotoga fai te tahi ʼu fale e 80.
6 ʼE mole fiafia koa la tokotou loto ʼi takotou sio ki te tuputupu ʼaia ʼi te Eulopa Esite? Tatau aipe pe kofea ʼaē ʼe tou nonofo ai, kae ʼe hā mai ʼi te tuputupu ʼaia ʼo te tauhi moʼoni, ko te ʼAtua ʼe mole fakapulepule, pea ʼaki tana faʼa kātaki ʼe hāofaki anai “te hahai kaugamalie.” (Apk. 7:9; 2 Pet. 3:9) ʼI pilivilesio leva ʼaē ʼe tou maʼu ʼi tatatou kau ki te tuputupu ʼa te hahaʼi ʼi te faʼahi fakalaumālie, māʼia mo nātou ʼaē ʼe nonofo ʼi te ʼu fenua mamaʼo! ʼE fakapapauʼi mai ia Tāʼaga Lea 28:27, “ko ia ʼaē ʼe ina foaki ki te tagata masiva ʼe mole hoge anai ia.” ʼAki tatatou fia lagolago ki te totogi ʼo te ʼu laga fale ʼaia, ʼe ‘vaevae tatau’ anai totatou ʼu koloā, ke feala ke tou fiafia fuli ʼi te fai ʼo he ʼu meʼa ʼofa, pea mo tatatou sio ʼaē ki te tuputupu ʼo te tauhi moʼoni ʼi te malamanei katoa.—2 Ko. 8:14, 15; Gaue 20:35.
[Paki ʼo te pasina 3]
Săcele, Roumanie
[Paki ʼo te pasina 3]
Maardu, Estonie
[Paki ʼo te pasina 3]
Sevnica, Slovénie
[Paki ʼo te pasina 3]
Tiszavasvári, Hongrie
[Paki ʼo te pasina 4]
Jūrmala, Lettonie
[Paki ʼo te pasina 4]
Taurage, Lithuanie
[Paki ʼo te pasina 4]
Tallinn, Estonie
[Paki ʼo te pasina 5]
Prievidza, Slovaquie
[Paki ʼo te pasina 5]
Mátészalka, Hongrie
[Paki ʼo te pasina 5]
Belgrade, Yougoslavie
[Paki ʼo te pasina 6]
Ruma, Yougoslavie
[Paki ʼo te pasina 6]
Vranov nad Toplʼou, Slovaquie
[Paki ʼo te pasina 6]
Tornakalns, Lettonie