Te Ako ʼo Te Minisitelio Faka Teokalatike Ki Te Taʼu 2000
1 Neʼe lahi te ʼu tapuakina ʼaē neʼe maʼu e te hahaʼi ʼa Sehova ʼi Te Ako ʼo Te Minisitelio Faka Teokalatike. ʼI te ʼu taʼu e 50 ʼaenī kua hili, neʼe tokoni te Ako ʼaia ki te toko lauʼi miliona hahaʼi ke nātou hikihiki tanatou poto faiakonaki pea mo tanatou akoʼi ki te hahaʼi te ʼu moʼoni faka Tohi-Tapu. (Pes. 145:10-12; Mat. 28:19, 20) ʼE tokoni atu koa te ako faka teokalatike? ʼE feala ke toe feiā ʼi te taʼu 2000 mo kapau ʼe koutou lagolago lelei kiai pea mo koutou mulimuli ki te ʼu tokoni ʼaē ka fai ai.
2 Ko te ʼu fakatuʼutuʼu ʼo ʼuhiga mo te ʼu akonaki pea mo te ʼu tohi ʼaē ka fakaʼaogaʼi, ʼe fakahā ʼi te ʼuluaki pasina ʼo te polokalama ki te ako ʼi te taʼu 2000. ʼE fakahā ai te temi ʼaē kua faka tuʼakoi ki te ʼu akonaki kehekehe, mo te tohi ʼaē ʼe fakatafito kiai te akonaki, mo te faʼahiga fai ʼo te ʼu akonaki ʼaia, ʼo feiā mo te tahi ʼu kiʼi puani. Koutou toʼo he temi ke koutou lau te ʼu tokoni ʼaia pea mo koutou mulimuli kiai.
3 Te Lau ʼo Te Tohi-Tapu ʼi Te Vāhaʼa Fuli: ʼE ʼi ai te ʼu polokalama e lua ʼi te polokalama ʼo te ako, ʼo ʼuhiga mo te lau ʼo te Tohi-Tapu ʼi te vāhaʼa fuli. Ko te ʼuluaki ʼe ko te polokalama māhani ʼaē ʼe kita lau ai ʼi te vāhaʼa fuli te ʼu pasina e nima ʼo te Tohi-Tapu. Ko te ʼu puani maʼuhiga ʼe fakatafito ki te ʼu kapite ʼaia. Ko te lua polokalama ʼe ko te tahi ʼu kapite ʼo te Tohi-Tapu ʼe hilifaki ki te ʼuluaki, pea ʼe kita lau ai ʼi te vāhaʼa fuli te ʼu pasina e hogofulu. ʼAki te polokalama ʼaia, ʼe feala ai anai ke koutou lau katoa te Tohi-Tapu ia taʼu e tolu. ʼE mahino ia, ko ʼihi ʼe nātou fia laka atu anai tanatou lautohi, kae ko ʼihi ʼe mole lagi nātou lava mulimuli anai ki te polokalama ʼaia. Koutou fiafia ʼi te ʼu meʼa ʼaē ʼe koutou lavaʼi, kae ʼaua naʼa koutou fakatatau ki he tahi kehe. (Kal. 6:4) Ko te meʼa ʼaē ʼe maʼuhiga tāfito, ʼe ko te lau ʼo te Folafola ʼa te ʼAtua ʼi te ʼaho fuli.—Pes. 1:1-3.
4 Kapau ʼe koutou fia kau ʼi Te Ako ʼo Te Minisitelio Faka Teokalatike, pea ʼe tonu ke koutou fakahā ki te tēhina takitaki ʼo te ako. Koutou fai fakalelei te ʼu akonaki ʼaē ʼe tuku atu, pea ʼaua naʼa koutou tōtō ʼi te akonaki ʼaia ka mole ʼi ai hona tupuʼaga moʼoni. Koutou faka ʼuhigaʼi te ako ʼaia, ʼe ko he fakatuʼutuʼu mai ia Sehova. Koutou teuteuʼi lelei, koutou ako fakalelei te ʼu manatu ʼaē ʼe fakatafito kiai takotou akonaki, pea koutou palalau ʼaki tokotou loto, pea ʼe fua lelei anai kia koutou te ako ʼaia.