Tou Fakaʼaogaʼi Lelei Te Folafola ʼa Te ʼAtua
1 ʼI tana faka mafola ki te tagata ʼaliki, “nee ava ai te gutu o Filipo, [pea] nee ina kamata mai te koga aia o te Tohi-Tapu, nee ina fagonogono kia te ia te Logolelei o Sesu.” (Gaue 8:35) Ko Filipo neʼe ina “fakaʼaogaʼi lelei te folafola ʼo te moʼoni.” (2 Tim. 2:15, MN ) Kae ia ʼaho nei, kua fakatokagaʼi e te kau tagata taupau, ʼe lahi te kau fai faka mafola ʼe tahitahiga tanatou fakaʼaogaʼi ia te Tohi-Tapu mokā nātou fai faka mafola. ʼE koutou fakaʼaogaʼi koa te Tohi-Tapu ʼi te minisitelio?
2 Ko te Folafola ʼa te ʼAtua ʼe ko te matapuna ʼo te ʼu meʼa fuli ʼaē ʼe tou tui kiai pea mo akoʼi. (2 Tim. 3:16, 17) Ko te tohi ʼaia ʼe ina taki mai te hahaʼi kia Sehova, pea mo ina akoʼi nātou ʼo ʼuhiga mo te maʼuli. Ko te tupuʼaga la ʼaē, ʼe maʼuhiga ai ke tou fakaʼaogaʼi te Tohi-Tapu ʼi totatou minisitelio, kae ʼaua naʼa tou palalau pe ki te ʼu meʼa ʼe tou fia palalau kiai. (Hep. 4:12) ʼE tokolahi te hahaʼi ʼe mole nātou ʼiloʼi lelei te Tohi-Tapu, koia ʼe tonu ai ke tou lau age he ʼu vaega kia nātou, moʼo fakahā age ʼe ko he takitaki ʼaoga, pea ke nātou ʼiloʼi ai te ka haʼu ʼaē ʼe ina foaki ki te malamanei.
3 Tou Lau Fakahagatonu Age Te Tohi-Tapu: ʼE lagi mole koutou faka mafola anai mo hakotou kato. ʼE lagi koutou fafaʼo anai takotou ʼu nusipepa ʼaē ʼe koutou fia tufa ʼi he kiʼi kato mānifi pea mo koutou taki nima takotou Tohi-Tapu, peʼe koutou ʼai ki takotou tagaʼi kofu peʼe ko te tagaʼi vave. Koia ka koutou fai palalau mo he tahi, ʼe koutou lava toʼo age te Tohi-Tapu, ke mole hage kia ia ʼaē ʼe koutou palalau ki ai ʼe koutou faiakonaki. Koutou fakaōvi age ki ai ke feala hana mulimuli ki takotou lau age ʼi takotou Tohi-Tapu. ʼE feala hakotou kole age ke ina lau leʼolahi atu he vaega. ʼE malave mālohi anai kia ia, mokā ʼe feala hana sio ki te ʼu meʼa ʼaē ʼe ʼui e te Tohi-Tapu, ka mole gata ʼaki pe tana logo ki takotou lau age. ʼE mahino ia, moʼo tokoni kia ia ke mahino ki te faka ʼuhiga ʼo te vaega, koutou faka maʼuhigaʼi te ʼu kupu ʼaē ʼe nātou fakahā te manatu tāfito.
4 Ko He ʼu Palalau ʼAki He Vaega Faka Tohi-Tapu: ʼI te ʼosi ʼo takotou ʼu ʼuluaki palalau, ʼe feala hakotou ʼui: “Ko te hahaʼi ʼe nātou kumi tokoni ki te ʼu matapuna kehekehe, moʼo maʼu he takitaki ʼi tonatou maʼuli. ʼI tau manatu, koteā te matapuna ʼaē ʼe lelei tāfito moʼo takitaki ʼo tatou? [Tuku ke fai atu hana tali.] Koteā tau manatu ʼo ʼuhiga mo te ʼu palalau ʼaenī ʼa te Tohi-Tapu? [Lau age ia Tāʼaga Lea 2:6, 7, pea tuku ke fai atu hana tali.] ʼE lahi te ʼu fihifihia neʼe tupu ʼaki te poto fakatagata, pea kua maʼuli fakaʼofaʼofa te tokolahi. Kae ko te poto ʼa te ʼAtua, ʼe feala hakita falala tuʼumaʼu kiai pea mo fua lelei kia tatou.” ʼOsi ʼaia pea koutou fakahā age te tohi ʼaē ʼe koutou tufa, pea mo fakahā age ʼi te kaupepa ʼaia te ʼaoga ʼo te poto ʼa te ʼAtua.
5 Neʼe fakaʼaogaʼi e Sesu te Tohi-Tapu moʼo tokoni ki te hahaʼi ʼaē neʼe moʼoni tonatou loto. (Luka 24:32) ʼAki te Tohi-Tapu, neʼe fakamoʼoni e Paulo te ʼu meʼa ʼaē neʼe ina akoʼi ki te hahaʼi. (Gaue 17:2, 3) ʼE ʼāsili anai tatatou falala pea mo tatatou fiafia ʼi te minisitelio, mo kapau ʼe toe lahi age tatatou poto ʼi te fakaʼaogaʼi lelei ia te Folafola ʼa te ʼAtua.