ʼE Feala Koa Ke Fakaʼaogaʼi Tokotou ʼApi?
1 ʼI te ʼuluaki sēkulō, tokolahi te kau Kilisitiano neʼe nātou fakaʼaogaʼi tonatou loto fale ke fai ai te ʼu fono. (1 Ko. 16:19; Kol. 4:15, Film. 1, 2) ʼI ʼihi kokelekasio ia ʼaho nei, ʼe mole feʼauga te ʼu potu ʼaē ʼe feala ke fai ai te Ako Tohi pea mo te ʼu fono ki te fai faka mafola. ʼE lagi tupu ai te ʼu Ako Tohi e toko 30 peʼe laka atu tona kaugamālie, ʼo fakalaka fau ʼi te toko 15 ʼaē neʼe fakatuʼutuʼu ki te ʼu Ako Tohi.
2 Ko He Pilivilesio Maʼuhiga: Neʼe koutou fakakaukauʼi koa ke fakaʼaogaʼi tokotou ʼapi ki te Ako Tohi? Ke lava fai ai te Ako Tohi, ʼe lelei mo kapau ʼe ʼi ai he faʼahi ʼi tokotou ʼapi ʼe lahi mo maʼa, mo mālama lelei, pea mo feʼauga te ʼaele. Mai tona ʼaluʼaga ʼaē ko te ako tohi ʼe ko he fono ʼo te kokelekasio pea ʼe kau ki te fakatuʼutuʼu ʼa Sehova moʼo akoʼi tana hahaʼi, ko te fai ʼo he ako tohi ʼi tokotou ʼapi ʼe ko he pilivilesio maʼuhiga. Tokolahi neʼe nātou ʼui neʼe nātou maʼu te ʼu tapuakina fakalaumālie ʼi te fakaʼaogaʼi ʼo tonatou ʼapi ki te faʼahi ʼaia.
3 Kapau ʼe koutou manatu ʼe feala ke fakaʼaogaʼi tokotou ʼapi, pea koutou fakahā ki te kau tagata ʼāfea. ʼE lagi nātou kumi he ʼu ʼapi moʼo fai ai te ako tohi. Kapau ʼe mole feala ke fai he ako tohi ʼi tokotou ʼapi, pea ʼe feala koa ke fai ai te ʼu fono ki te fai faka mafola? Tatau aipe peʼe mole ʼaoga ʼi te temi nei kiai, kae ʼe fakafetaʼi anai te kau tagata ʼāfea ʼi tanatou ʼiloʼi ʼaē ʼe feala ke fakaʼaogaʼi tokotou ʼapi. ʼE feala ke koutou maʼu te pilivilesio ʼaia ʼi te ka haʼu.
4 Tou Fakaʼapaʼapa: Ka tou fakatahi ʼi te loto fale ʼa he tēhina peʼe ko he tuagaʼane, ʼe tonu kia tatou fuli ke tou fakaʼapaʼapa ʼo ʼuhiga mo te ʼu meʼa ʼo tona ʼapi. ʼE tonu ke tokaga te ʼu mātuʼa ke nonofo te ʼu tamaliki ʼi te faʼahi ʼaē ʼe fai ai te ako tohi, ke mole nātou hū ki te ʼu kogafale ʼo te ʼapi. ʼE toe tonu foki ke tou fakaʼapaʼapa ki te ʼu vāhaʼa fale, ke tou tokaga ke ʼaua naʼa tou fakahohaʼa fau kia nātou.—2 Ko. 6:3, 4; 1 Pet. 2:12.
5 ʼE fakaloto mālohiʼi tatou ia Hepeleo 13:16 ke ʼaua naʼa galo kia tatou ke tou “fai . . . te mea e lelei pea mo te mauli vaevae, koteuhi ko te u faahiga sakilifisio aia e leleiʼia e te Atua.” Ko te foaki ʼo tokotou loto fale ke fakaʼaogaʼi ki te fono ʼo te kokelekasio ʼe ko he ʼaluʼaga ʼe lelei moʼo vaevae te ʼu meʼa lelei mo te hahaʼi pea mo “faka maʼuhiga ia Sehova ʼaki [tokotou] ʼu koloā.”—Taag. 3:9.