Tou Fakavikiviki Ia Sehova ʼi Te Fakatahi Lahi
1, 2. Koteā te faigamālie ʼaē ʼe tou maʼu ʼi te fakatahi faka tisitilike, pea ko te ʼu faʼahi fea ʼaē ʼe tou lava fakahoko ai ia te faʼahi ʼaia?
1 ʼI te ʼu fakatahi faka tisilike ʼaē ʼe tou fai ʼi te taʼu fuli, ʼe ko he temi faigamālie ʼaia ke tou faka kolōliaʼi ai ia Sehova. ʼI te ʼu telituale ʼo totatou filiale, ʼe fai anai te ʼuluaki fakatahi faka tisitilike ʼi Vanuatu ʼi te māhina ʼo ʼAukusitō ʼi te ʼaho 26 ki te 28, pea ʼi Niu-Kaletonia ʼi Sepetepeli ʼi te ʼaho 16 ki te ʼaho 18 mo te ʼaho 23 ki te ʼaho 25, pea fakamuli leva ʼi Uvea ʼi ʼOketopeli ʼi te ʼaho 1 mo te ʼaho 2. Koia ʼe tou manatu ohage ko Tavite, ʼaē neʼe hiva fēnei: “ ʼE au vikiʼi anai koe ʼi te fakatahi lahi; ʼi te lotolotoiga ʼo te kaugamālie ʼe au fakavikiviki anai koe.” (Pes. 35:18) ʼI te Fakatahi Faka Tisitilike ʼaē ka hoko mai, ʼaē ko tona kupu tāfito “Te Fakalogo Ki Te ʼAtua,” koteā ʼaē ʼe tonu ke tou fai moʼo fakavikiviki kiā Sehova ʼi te logo tahi?
2 ʼAki tatatou aga ʼe tou lava fakavikiviki ia Sehova. ʼI te koga meʼa neʼe fai ai te fakatahi, neʼe ʼui fēnei e te tagata pule: “ ʼO mulimuli ki takotou ʼu fakatahi lalahi, neʼe mātou ʼui age ki te tahi ʼu lotu neʼe nātou fia lue tomatou fale, ke nātou ʼōmai ʼo sioʼi te fakaʼaluʼalu lelei e te kau Fakamoʼoni ʼa Sehova tanatou ʼu fakatahi.” ʼAki tatatou faiteuteu, mo tatatou gāue fakatahi, pea mo tatatou aga, ʼe tou fakatupu ai te fakavikiviki ʼaē ʼe tuha mo totatou ʼAtua.—1 Pet. 2:12.
3, 4. ʼI te fakatahi pea mokā hili te fakatahi, koteā anai te ʼaoga ʼo te agavaivai ke feala hatatou faiteuteu ohage ko he ʼu minisi Kilisitiano?
3 Tatatou ʼu Faʼahiga Faiteuteu: ʼE tonu ke tou agavaivai, ke feala hatatou faka kolōliaʼi ia Sehova ʼaki tatatou faiteuteu pea mo te helu ʼo totatou ʼulu. (1 Tim. 2:9) ʼE ʼui fēnei ʼi te tohi École du ministère ʼi te pasina 132: “Ko te agavaivai ʼe ina uga tatou ke ʼaua naʼa tou faka tūkia niʼihi pea ke mole tou fai he meʼa ke tokagaʼi fau tatou.” ʼE lahi te ʼu fenua, kua māhani te hahaʼi ki te ʼu faiteuteu ʼaē ʼe mole aga fakapoipoi. Kae ko Sehova ʼe ina leleiʼia tatatou faiga ʼaē ke tou fakafofoga fakalelei ia ia. (Gaue 15:14) Logola ko te fakatahi ʼe fai ʼi he falegaoʼi peʼe ʼi he malaʼe faigaoʼi, kae lolotoga ʼaho e tolu ʼe liliu anai te fakatahi ʼaia ʼe ko tatatou “fakatahi lahi.” Koia, kapau ʼe tou fakatahi iā muʼa ʼo Sehova, ʼe tonu ke tou faiteuteu ke tuha mo te Māʼoluga ʼo te ʼatulaulau.—1 Fkma. 29:11.
4 ʼE toe ʼaoga ke tou tōkakaga ki tatatou aga mokā hili te fakatahi. ʼI he ʼu kiʼi fakafiafia peʼe ko he ʼolo ʼo kakai ʼi he falekai, ʼe tou tui anai he ʼu mutuʼi meʼa ʼe ʼalutahi mo te ʼu lakaga ʼaia, kae māʼia pe la mo te ʼu lakaga ʼaia, ʼe tonu kiā tatou ʼaē ʼe “lau ʼe [tou] fakaʼapaʼapa ki te ʼAtua,” ke lelei ʼi te temi fuli totatou ʼu teu pea mo te helu ʼo totatou ʼulu. (1 Tim. 2:10, MN ) ʼE mole tonu ke mulimuli tatatou faʼahiga teuteu ki te faʼahiga teuteu ʼaē ʼe leleiʼia e te hahaʼi ʼo te mālama. (1 Soa. 2:16, 17) ʼE maʼu ʼi tatatou ʼu tohi ia te ʼu pāki ʼe hā ʼai te ʼu tagata pea mo te ʼu fafine ʼe nātou teuteu ʼaki he agavaivai ʼi te ʼu ʼaluʼaga kehekehe. Ko te ʼu kiʼi kate ʼaē ʼe tou fakapipiki ʼi ʼotatou teu lolotoga te fakatahi, ʼe ina fakamanatuʼi mai ʼi te temi fuli ko tatou ko te ʼu minisi Kilisitiano.—2 Ko. 6:3, 4.
5, 6. E feafeaʼi hatatou fakaʼapaʼapa ki te kaitahi fakalaumālie ʼaē neʼe teuteuʼi e Sehova maʼa tatou?
5 Tou Fakaʼapaʼapa Ki Te Kaitahi Fakalaumālie ʼAē Neʼe Teuteuʼi e Sehova: Neʼe teuteuʼi e te Tuʼi ʼAliki ʼo te ʼatulaulau ia te kaitahi maʼa tatou. (Isa. 25:6; 1 Ko. 10:21) Kapau ʼe maʼuhiga kiā tatou hatatou kau ki te polokalama fakalaumālie ʼaē neʼe teuteuʼi e Sehova maʼa tatou, pea ʼe tou fia kau anai ki te ʼu ʼaho e tolu ʼaē ʼe fai ai te fakatahi. Kua koutou fai koa he ʼu fakatuʼutuʼu ki hokotou nofoʼaga, mo hokotou meʼa feʼaveʼaki ki te fakatahi, pea mo kole hokotou ʼu ʼaho mālōlō? Kua koutou fai koa he ʼu fakatuʼutuʼu ke feala hakotou ʼolo fakatomuʼa ki te fakatahi, moʼo kumi ʼo hokotou ʼu hekaʼaga, mo koutou fai palalau mo tokotou ʼu tēhina mo tuagaʼane, pea mo hiva fakatahi mo nātou moʼo faka kolōliaʼi ia Sehova ʼi te ʼuluaki kātiko pea mo te faikole?—Pes. 147:1.
6 Kapau ʼe tou fakaʼapaʼapa ki te kaitahi ʼaia neʼe teuteuʼi e Sehova, pea ʼe tou tōkakaga anai ki te polokalama pea ʼe mole tou fai palalau anai lolotoga te ʼu akonaki, pea mole tou kakai anai, peʼe tou feʼoloʼaki ʼi tuʼa. Ko Sehova ʼaki te tagata kaugana agatonu mo poto, ʼe ina foaki mai te meʼa kai fakalaumālie ʼaē ʼe ʼaoga kiā tatou ʼi te temi nei. (Mat. 24:45) ʼE tonu kiā tatou fuli ke tou kau ki te polokalama kātoa. ʼE tonu ki te ʼu mātuʼa ke nātou heheka fakatahi mo tanatou ʼu fānau, pea mo tokoni kiā nātou ke nātou fakalogo fakalelei.—Teu. 31:12.
7. Koteā ʼaē ʼe kole mai kiā tatou ke tou fai ʼi te temi kakai, pea he koʼe ʼe ko he fakatuʼutuʼu lelei?
7 ʼE kole mai kiā tatou ke tou toʼo te ʼu meʼa kai ʼaē ʼe fakatau ʼi te fakatahi peʼe tou ʼaumai hatatou meʼa kai, kae ke ʼaua naʼa tou mavae ʼo ʼolo ʼo toʼo meʼa kai mai tuʼa lolotoga te temi kakai. ʼI te fakatahi ʼo te taʼu kua ʼosi, neʼe fai te fakamālo kiā nātou neʼe kau ki te fakatahi he neʼe nātou mulimuli fakalelei ki te fakatotonu ʼaia. ʼE toe fakaʼamu pe ke toe feiā mo te taʼu ʼaenī! (Hep. 13:17) Ko he fakatuʼutuʼu lelei ʼaia moʼo hikihiki tatatou ʼu felogoi faka tautēhina pea mo faka tautuagaʼane, pea ʼe lagolago ki te logo tahi pea mo te tokalelei ʼaē moʼo fakavikiviki ia Sehova.—Pes. 133:1.
8, 9. Koteā te tahi faigamālie ʼe tou maʼu ʼi te fakatahi moʼo fakavikiviki ia Sehova?
8 Tou Fagonogono ʼi Te ʼu Temi Faigamālie: ʼI tatatou ʼolo pea mo tatatou liliu mai te fakatahi, ʼe lahi te ʼu faigamālie ke tou fakavikiviki ai ia Sehova ʼaki totatou gutu. (Hep. 13:15) ʼI te ʼu potu fuli ʼaē ʼe tou nonofo ai, tou fai fagonogono ʼi te ʼu temi faigamālie. ʼE fonu totatou ʼatamai pea mo totatou loto ʼaki te ʼu koloā fakalaumālie ʼaē neʼe tou logo kiai ʼi te fakatahi. Tou vaevae te ʼu logo lelei ʼaia mo te hahaʼi ʼaē ʼe tou felāveʼi mo nātou.—1 Pet. 3:15.
9 ʼE tou fakatalitali fakafiafia ki te taʼi ʼu fakatahi ʼaia moʼo fakavikiviki ia Sehova “ ʼi te lotolotoiga ʼo te kaugamālie ʼaē ʼe fakatahitahi.” (Pes. 26:12) ʼOfa pe ke tou fakavikiviki ia Sehova ʼi te Fakatahi Faka Tisitilike ʼaē ko tona kupu tāfito “Te Fakalogo Ki Te ʼAtua.”
[Talanoa ʼo te pasina 4]
Te ʼu Fakamanatu ʼo ʼUhiga Mo Te Fakatahi Faka Tisitilike
◼ Te ʼu Hola ʼo Te Polokalama: ʼI te ʼu ʼaho ʼaia e tolu ʼe kamata anai ia te polokalama ʼo te uhu ʼi te hola hiva vaelua. ʼE ʼavahi anai ia te ʼu matapā ʼi te hola valu. ʼI he kiʼi temi siʼi ʼi muʼa ʼo te kamata ʼo te polokalama, ʼe heka anai te pelesita mai muʼa lolotoga te musika ʼo te kātiko. ʼI te temi ʼaia, ʼe tonu anai kiā tatou fuli ke tou tahi ʼolo ʼo heka ki tona hekaʼaga ʼi muʼa ʼo te kamata ʼo te polokalama. ʼI te Feliaono pea mo te Moeaki, ʼe ʼosi anai te polokalama ʼi te hola nima ʼosi nima, pea ʼi te ʼAhotapu ʼe ʼosi anai ʼi te hola fā ʼosi hogofulu.
◼ Te Taulaga Motokā: Ko te ʼu koga meʼa fuli ʼaē ʼe fai ai te ʼu fakatahi lalahi, ʼe ʼi ai te ʼu tēhina moʼo fakahoahoa lelei te tau motokā, ko nātou ʼaē ʼe ʼuluaki ʼōmai ʼe nātou tau anai tanatou ʼu motokā ʼi te ʼu faʼahi ʼaē ʼe tuʼu ava. ʼE gata pe anai ki te ʼu motokā ʼo nātou māʼimoa ʼe fakagafua anai ke nātou tau ʼi te taulaga motokā maʼa te kau māʼimoa. Mai tona ʼaluʼaga ʼaē ʼe mole feʼauga te taulaga motokā maʼa te ʼu motokā fuli, koia ʼe tonu anai ke fakafonufonu te ʼu motokā ke ʼaua naʼa ʼōmai ʼi he motokā ko he tokotahi peʼe ko he toko lua.
◼ Te Tāʼofi ʼo Te ʼu Hekaʼaga: ʼE feala ke tou tāʼofi he ʼu hekaʼaga maʼa nātou pe ʼaē ʼe ʼōmai fakatahi mo tatou ʼi te motokā peʼe ko nātou ʼo totatou loto fale pea mo nātou ʼaē ʼe tou fakaʼapi.
◼ Te ʼu Meʼa ʼOfa: ʼE lahi te ʼu meʼa ʼe totogi ki te ʼu fakatahi faka tisitilike. ʼAki te ʼu meʼa ʼofa ʼaē ʼe tou foaki ʼi tatatou ʼu Fale ʼo Te Puleʼaga peʼe ʼi te fakatahi, ʼe tou fakahā ai totatou loto fakafetaʼi pea mo tatatou lagolago ki te gāue faka malamanei. Ko te ʼu seki ʼaē ʼe fai ʼi te fakatahi, ʼe tonu ke tohi ki te higoa “A.S.T.J.”
◼ Te Temi Kai: ʼE kole atu ke koutou toʼo takotou meʼa kai ʼi te selevisi meʼa kai peʼe koutou ʼaumai hakotou meʼa kai, kae ke ʼaua naʼa koutou mavae ʼi te fakatahi ʼo ʼolo ʼo toʼo meʼa kai mai tuʼa lolotoga te temi kai. ʼE feala hakotou ʼōmai mo hakotou kiʼi glacière veliveli. ʼE mole tonu ke koutou ʼaumai ki te ʼu fakatahi he ʼu foʼi glacières ʼe lalahi fau, pea mo he ʼu kava.
◼ Te ʼu Kamela Pea Mo Te ʼu Meʼa Puke Leʼo: ʼE mole tonu anai ke hunuki te ʼu meʼa ʼaia ki te ʼu meʼa hunuki hila peʼe ko te fakatagi ʼo te fale fakatahi moʼo puke ʼo te ʼu akonaki, kae ʼe feala pe hona fakaʼaogaʼi mo kapau ʼe mole gaohaʼa ki te nofoʼaki.
◼ Te ʼu Bippers Pea Mo Te ʼu Telefoni Fēʼaveʼaki: ʼE mole tonu anai ki te ʼu meʼa ʼaia ke nātou fakalelu ki te nofoʼaki.
◼ Te Selevisi ʼAē ʼe Tokaga Fakavilivili Ki Te Kau Mahaki: Neʼe fakatokagaʼi e te Selevisi ʼaia ia tona pāuiʼi noa ʼaē ʼo ʼuhiga mo he ʼu kihiʼi meʼa noa. Kapau ʼe ʼaoga fakavilivili he faitoʼo kiā koutou, koutou kole age ki he tēhina ʼe ōvi atu kiā koutou, ke foimo pāui ki te selevisi ʼaē ʼe tokaga ki te kau mahaki, ke haʼu he tahi ʼo te selevisi ʼaia ʼo vakaʼi peʼe kovi te mahaki, peʼe ʼaoga ki ai he faitoʼo. Kapau leva ʼe ʼaoga ki ai he faitoʼo, ʼe fai anai e te selevisi ʼaia tana gāue.
◼ Te Nofoʼaki: ʼU mātuʼa, ʼaua naʼa koutou tuku ʼakotou fānau ke nātou feleleʼaki, kae koutou leʼoleʼo nātou ke feala hanatou fai he ʼu aga ʼe hā ai ʼe nātou fakalogo ki te ʼAtua.—Taag. 29:15.