Tou Fakahā ʼe Tou Fia ʼIloʼi Te Manatu ʼa Te Hahaʼi—ʼO Tou Fai Fehuʼi Pea Mo Fakalogo
1 Tokolahi ʼe nātou leleiʼia te fakahā ʼo tanatou ʼu manatu, kae mole nātou leleiʼia mokā valokiʼi nātou peʼe ka fakafehufehuʼi age nātou. Koia ʼe tonu kiā tatou ʼu minisi Kilisitiano, ke tou akoako ke tou popoto ʼi te fai ʼo ni ʼu fehuʼi moʼo ʼiloʼi te manatu ʼa te hahaʼi.—Taag. 20:5.
2 Ko te ʼu fehuʼi ʼaē ʼe tou fai ʼe tonu ke nātou uga te hahaʼi ke nātou fakakaukauʼi, kae ke ʼaua naʼa nātou ʼiʼita ai. Ka fai faka mafola te tēhina ʼi te ʼu ʼapi, ʼe ina fai te fehuʼi ʼaenī: “ ʼI tau manatu, ʼe ʼi ai anai koa he temi ʼe maʼuli ai te hahaʼi ʼi te aga fakaʼapaʼapa?” ʼO mulimuli ki te tali, ʼe ina hoko atu fēnei: “ ʼI tau manatu, koteā ʼaē ʼe tonu ke fai ke hoko ia te faʼahi ʼaia?” peʼe “He koʼe ʼe ke manatu feiā?” Ko te tahi tēhina, ka fai fagonogono faigamālie peʼe ka fai faka mafola ʼi te ʼu koga meʼa ʼaē ʼe hahaʼi ai, ʼe ina fehuʼi fēnei kiā nātou ʼaē ʼe maʼu fānau: “Koteā ʼaē ʼe ke leleiʼia tāfito ʼi tou ʼuhiga tāmai (peʼe ʼuhiga faʼē)?” Pea ʼe ina fehuʼi fēnei leva: “Koteā ʼaē ʼe ke tuʼania lahi kiai?” Koutou tokagaʼi, ʼaki te ʼu fehuʼi ʼaia ʼe feala ke fakahā e te hahaʼi tanatou manatu, kae mole nātou ʼiʼita ai. Mai tona ʼaluʼaga ʼaē ʼe kehekehe te ʼu ʼaluʼaga ʼo te hahaʼi ʼi totatou telituale, ʼe lagi tonu ke tou tōkakaga ki te puani ʼaē ʼe tou lagaʼi pea mo tōkakaga ki te faʼahiga fai ʼa te ʼu fehuʼi.
3 Ke Fakahā e Te Hahaʼi Tanatou Manatu: Kapau ʼe fia fakahā atu e te hahaʼi tanatou manatu, pea koutou fakalogo lelei kae ʼaua naʼa koutou hoko tuʼusi tanatou palalau. (Skp. 1:19) ʼAki he agalelei, koutou ʼio ki te ʼu manatu ʼaē ʼe nātou fakahā atu. (Kol. 4:6) ʼE feala pe hakotou ʼui fēnei: “ ʼE lelei tau manatu, pea ʼe au fakamālo atu ʼi tau fakahā mai.” Koutou vikiʼi moʼoni nātou mo kapau ʼe feala. ʼAki he agalelei, koutou lagaʼi he tahi ʼu fehuʼi ke koutou ʼiloʼi lelei tanatou manatu pea he koʼe ʼe nātou manatu feiā. Koutou kumi he ʼu faʼahi ʼe koutou felogoi tahi kiai. Ka koutou fia fakahā age kiā nātou he vaega Tohi-Tapu, ʼe feala hakotou fehuʼi fēnei age: “Neʼe kua ke maʼu koa ia te taʼi manatu ʼaē ʼe tuʼu ʼi henī?” ʼAua naʼa koutou fakamālohiʼi fau pea mo fakafihiʼi tanatou ʼu manatu.—2 Tim. 2:24, 25.
4 Ko te faʼahiga tali ʼa te hahaʼi ki tatatou ʼu fehuʼi ʼe fakalogo tāfito anai ki tatatou faʼahiga fakalogo. ʼE feala anai ki te hahaʼi ke nātou tali mo kapau ʼe tou fakalogo moʼoni kiā nātou. Neʼe ʼui fēnei e te taupau feʼaluʼaki: “Ka ʼiloga ʼe koutou fakalogo lelei ki te ʼu manatu ʼaē ʼe fakahā atu e te hahaʼi, pea ʼe nātou fia palalau atu anai pea ʼe ko te fakahā lahi ʼaia ʼo takotou fia ʼiloʼi te manatu ʼa te hahaʼi.” Ko te fakalogo ki te hahaʼi ʼe ko he aga fakaʼapaʼapa ʼaia kiā nātou, pea ʼe uga ai tanatou fia fakalogo ki te logo lelei ʼaē ʼe tou fia vaevae mo nātou.—Loma 12:10.