Ko Tātou Ko Te ʼu Fakamoʼoni ʼi Te Temi Fuli Pē
1. Koteā ʼaē ʼe feala ke tou ako mai te fakamatala ʼo te fai fakamafola ʼaē ʼa Sesu ki te fafine ʼi te vai keli?
1 Neʼe kua fualoa ia te haʼele ʼaē ʼa Sesu, pea neʼe kua gaʼegaʼe pea mo fia ʼinu. Pea neʼe ʼolo tana ʼu tisipulo ʼo toʼo mai hanatou meʼa kai, kae neʼe hekaheka ia ʼi te vai keli ʼi tuʼa ʼo te kolo ʼo Samalia, ʼo ʼai hana kiʼi mālōlō. Neʼe mole fakatuʼutuʼu e Sesu ke fai fakamafola ʼi Samalia; neʼe tau mai pē ia ki te kolo heʼe ʼalu ki Kalilea, ʼo hoko atu tana minisitelio ʼi ai. Kae neʼe ina fakaʼaogaʼi te faigamālie ʼaia moʼo fakamafola ki te fafine neʼe haʼu ʼo ʼohu vai. (Soa. 4:5-14) Koteā tona tupuʼaga? Ko Sesu ʼi te temi fuli pē neʼe ko “te fakamoʼoni agatonu pea mo moʼoni” ʼa Sehova. (Fakh. 3:14) ʼE tou faʼifaʼitakiʼi ia Sesu ʼo tou liliu ko he ʼu Fakamoʼoni ʼa Sehova ʼi te temi fuli pē.—1 Pet. 2:21.
2. ʼE feafeaʼi hatatou nonofo teuteu ke tou fai fagonogono faigamālie?
2 Tou Teuteu: ʼE feala ke tou teuteu ke tou fai fagonogono faigamālie ʼaki hatatou ʼave e tātou he ʼu tohi. Tokolahi te kau fai fakamafola ʼe natou toʼo he ʼu kiʼi pepa lotu pea ʼe natou tufa ʼi te ʼu fale koloa, ʼi te ʼu ʼutuʼaga penisini, pea mo te hahaʼi ʼaē ʼe natou felāveʼi mo nātou. (Tnk. 11:6) Ko te tuagaʼane ʼe māhani ʼi te fai folau, ʼe tokaga ke ina ʼai tuʼumaʼu ki tana kato tana kiʼi Tohi-Tapu veliveli pea mo te tohi Te Ako Mai Te Tohi-Tapu, pea ʼe faiga ke ina kamata he fai palalau mo nātou ʼaē ʼe heheka ʼi ʼona tafa.
3. ʼE tou lava kamata feafeaʼi ia he fai palalau?
3 Tou Kamata He Fai Palalau: Kā tou fai fagonogono faigamālie, ʼe mole maʼua ke tou foimo kamata atu aipē ʼaki he manatu Fakatohi-tapu. Neʼe mole kamata e Sesu ia tana fai palalau mo te fafine ʼi te vai keli, ʼo ina fakahā age ko ia te Mēsia. Neʼe ina kole age pē hona moʼi vai ke ʼinu, ʼo ina fakatupu ai ia te fia ʼiloʼi e te fafine. (Soa. 4:7-9) Neʼe tokagaʼi e te tuagaʼane ko te taʼi faʼahiga fai fagonogono ʼaia ʼe ina fakafealagia kiā ia ke kamata ai he fai palalau mokā ʼe fehuʼi age kiā ia, peʼe kau ki te ʼu ʼaho lalahi, ohagē ko te Pō Tapu. ʼE mole ina foimo tali age ʼe mole ina fai te ʼaho lahi ʼaia heʼe ko ia ko te Fakamoʼoni ʼa Sehova, kae ʼe ina ʼui fēnei: “Neʼe au fakatotonu ke mole au fai ia te ʼaho lahi ʼaia.” Pea ʼi te agamāhani, ko ia ʼaē neʼe faifehuʼi, ʼe ina fehuʼi age pe koteā tona tupuʼaga, ʼo feala ai ki te tuagaʼane ke fai fakamafola.
4. He koʼē ʼe uga kotou e te ʼu palalau ʼaē ʼe tuʼu iā Mateo 28:18-20?
4 Logolā kua ʼosi ia te minisitelio faʼafai ʼaē ʼa Sesu ʼi te kele, kae kei hoko atu pē ia tana tokaga ʼaē ki te gāue fai fakamafola ke fakahoko ohagē ko tana fai. (Mat. 28:18-20) Koia, ohagē ko totatou Faʼifaʼitakiʼaga ko Sesu, ko tātou ko he ʼu Fakamoʼoni ʼe tou teuteu ke tou tala iā muʼa ʼo te hahaʼi tatatou tui ʼi te temi fuli pē.—Hep. 10:23.