ʼE Mole Tou Nonofo Noa
1. ʼE tou ʼiloʼi feafeaʼi neʼe mole nonofo noa ia te kau fai fakamafola ʼo te ʼuluaki sēkulō?
1 ʼI te ʼuluaki sēkulō, “neʼe mole toe tuku” e te kau fai fakamafola faʼafai ia tanatou tala ia te logo lelei ʼi te ʼu koga meʼa ʼaē ʼe maʼu ai te hahaʼi. (Gaue 5:42) Koia, ʼi tatatou ʼolo ʼi te ʼu ʼapi, ʼe mole feala ke tou fakalaka iā muʼa ʼo te hahaʼi ʼaē ʼi te ala kae mole tou fai fakamafola age kiā nātou. ʼO toe fēia aipē foki, ʼi te hili ʼo tanatou minisitelio, ʼe natou fakaʼaogaʼi anai ia te fealagia ʼaē ke natou fagonogono faigamālie lolotoga tanatou fai fakatau. Ohagē ko Sesu, ʼe mole natou nonofo noa.—Mko. 6:31-34.
2. Koteā ia te fakaʼuhiga ʼo tatatou higoa?
2 Tou Nonofo Teuteu Tuʼumaʼu: Ko tatatou higoa, ʼaē ko te kau Fakamoʼoni ʼa Sehova, ʼe mole fakaʼuhiga pē peʼe koteā ʼaē ʼe tou fai, kae ʼe ina toe fakaʼuhiga pe ko ai ia tātou. (Esa. 43:10-12) Koia ʼe tou nonofo teuteu tuʼumaʼu moʼo tali ki tatatou ʼamanaki, tatau aipē peʼe mole tou ʼolo ʼi te ʼu ʼapi. (1 Pet. 3:15) ʼE kotou ʼiloʼi fakatomuʼa koa ia te ʼu ʼaluʼaga ʼaē ʼe feala ai ke kotou fagonogono faigamālie ai pea mo te ʼu palalau ʼaē ʼe feala ke kotou fai? ʼE kotou feʼoloʼaki koa mo he ʼu tohi ke kotou tufa kiā nātou ʼaē ʼe fia logo? (Taag. 21:5) ʼE gata ʼaki pē koa ia takotou fai fakamafola ʼi te ʼu ʼapi, peʼe kotou toe fakamafola ia te logo lelei ki te hahaʼi ʼi he tahi age ʼu koga meʼa ʼo mulimuli ki te ʼu fealagia?
3. Koteā te kupusiga palalau ʼe ʼalutahi mo te fai fakamafola ʼi te ala mo te ʼu taulaga mōtoka, mo te ʼu malaʼe ʼaē ʼe mālōlō ai te hahaʼi, mo te ʼu fale gāue pea mo ʼihi atu ʼu koga meʼa?
3 Te Fai Fakamafola “i Te u Potu Fakafenua Pea Mo Te u Loto Fale”: Neʼe ʼui e te ʼapositolo ko Paulo neʼe fai fakamafola “i te u potu fakafenua” pea mo te ʼu ʼapi. (Gaue 20:20) Koia, ko te fai fakamafola iā muʼa ʼo te kaugamālie ʼe ko te kupusiga palalau ʼe fakaʼuhiga ki te fai fakamafola ʼi te ala, ʼi te ʼu taulaga mōtoka, te ʼu malaʼe ʼaē ʼe mālōlō ai te hahaʼi, ʼi te ʼu fale gāue pea mo ʼihi atu ʼu koga meʼa. ʼE moʼoni ko te fai fakamafola ʼi te ʼu ʼapi ko te ʼuluaki faʼahi pē ʼaia ʼe fua lelei ke tou maʼu ai te hahaʼi ke natou logo ki te Puleʼaga. Kae, neʼe tōkakaga tāfito ia te kau fai fakamafola ʼo te ʼuluaki sēkulō ki te hahaʼi, kae mole ki te ʼu api. Neʼe natou toʼo ia te ʼu faigamālie fuli ke natou palalau ʼo ʼuhiga mo te moʼoni—ʼi muʼa ʼo te kaugamālie, ʼi te fagonogono faigamālie, peʼe ʼi te ʼu ʼapi. ʼE feala ke tou maʼu ia te faʼahiga manatu ʼaia ʼo ʼuhiga mo te fakatotonu ʼaē ke tou fakahoko kātoa ia tatatou ministelio.—2 Tim. 4:5.