ʼE Tonu Koa Ke Tou Fai Fehuʼi Ki Te ʼAtua?

KI ʼIHI, ʼe mole lelei ke tou fai fehuʼi ki te ʼAtua. Ki tanatou manatu, ʼe mole ko he aga fakaʼapaʼapa ia te fehuʼi ki te ʼAtua peʼe koʼē neʼe ina fakafealagia ke hoko peʼe kailoa ia he ʼaluʼaga. ʼE kotou maʼu koa ia te manatu ʼaia?

Kapau koia, ʼe kotou punamaʼuli anai ʼi te ʼiloʼi ʼaē tokolahi te hahaʼi agatonu neʼe natou fai fehuʼi ki te ʼAtua. Kotou tokagaʼi ni fehuʼi neʼe natou fai kiā te ia:

Neʼe fehuʼi fēnei e te tagata agatonu ko Sopo: “Kotea e mauli ai te kau agahala? Kotea e sio ai kia natou e matumatua lelei, pea e asilisili lahi tonatou malohi?”—Sopo 21:7.

Neʼe fehuʼi fēnei e te polofetā agatonu ko Hapakuke: “Kotea e ke sio ai anai ki te kau agatuu, pea ke fakaheeheegu anai, kae lolotoga kai e te tagata agakovi ia ia ae e agatonu age ia ia?”—Hapakuke 1:13.

Neʼe fehuʼi fēnei e Sesu Kilisito: “Sioku Atua, sioku Atua, kotea nee ke siaki ai au?”—Mateo 27:46.

Kapau ʼe kotou lau ia te ʼu fakamatala ʼaia, ʼe kotou tokagaʼi ai anai neʼe mole tali fakaʼita ia Sehovaa ʼAtua ki te ʼu fehuʼi fakamālotoloto ʼaia. Kae ʼe mole tou punamaʼuli ʼi tana tuku ʼaē ke tou fai age he ʼu fehuʼi. Ohagē lā, ʼe mole ʼita ia te ʼAtua mokā ʼe tou kole age ki ai ke ina foaki mai ia te ʼu meʼa ʼaē ʼe ʼaoga kiā tātou ʼi te faʼahi fakasino. ʼE ina tali fakafiafia ia te ʼu kole ʼaia. (Mateo 6:11, 33) ʼO toe fēia aipē, ʼe lotolelei ke ina foaki mai he ʼu fakamahino moʼo fakafīmālieʼi tatatou fakakaukau pea mo totatou loto. (Filipe 4:6, 7) ʼI tona fakahagatonu, neʼe ʼui fēnei e Sesu ki ʼana tisipulo: “Koutou kole, pea e foaki atu anai kia koutou.” (Mateo 7:7) ʼI tana fakapapau ʼaē neʼe ina fai ʼi te akonaki ʼaia, neʼe mole talanoa pē ia Sesu ki te maʼu ʼo te ʼu koloa fakamālama kae neʼe toe talanoa ki te ʼu tali ʼaē ki te ʼu fehuʼi maʼuhiga.

Kapau neʼe fakafealagia atu ke kotou fai fehuʼi ki te ʼAtua, ko te fehuʼi fea ʼaē kā kotou fai anai kiā te ia?

● Koteā ia te ʼuhiga ʼo toku maʼuli?

● Koteā ʼaē kā hoko anai mokā ʼe au mate?

● He koʼē ʼe ke tuku ke au mamahi?

Mai tona ʼaluʼaga ʼaē “e hau te Tohi tapu katoa mai te tuku manava a te Atua,” ʼe kotou maʼu anai ia te ʼu tali mai te ʼAtua ʼi tana Folafola, te Tohi-Tapu. (2 Timoteo 3:16) Tou vakaʼi peʼe koʼē ʼe fai e ʼihi ia te ʼu fehuʼi ʼaia pea mo te ʼu tali ʼe foaki mai ʼi te Tohi-Tapu.

[Nota]