Kotou Tuku Ke Akoʼi Koutou e Te Fakatonutonu ʼa Sehova

1, 2. (1) Kotea ʼae ʼe tonu ke tou fai ke tou maʼu ai he ʼu felogoʼi lelei mo Sehova? (2) He ko ʼe ʼe lelei ke tou vakaʼi ia ni faʼifaʼitaki ʼi te Tohi-Tapu ʼo ʼihi neʼe fakatonutonuʼi e te ʼAtua?

“KIA au, ko taku fakaovi ki te Atua, koena toku koloa: E au fakatuu toku nonoaga i te Aliki, [ia Sehova].” (Pes. 73:28) Kotea ʼae neʼe ina uga te tagata faipesalemo ke falala ki te ʼAtua? Ki muʼa atu, neʼe lotovaivai ia te tagata faipesalemo he neʼe hage kia ia ʼe maʼuli fimalie ia te kau agakovi. Neʼe ina ui fenei: “Nee mole hona aoga ke au fakamaa toku loto, pea ke au fufulu oku nima i te maonioni.” (Pes. 73:2, 3, 13, 21) Kaʼe ʼi te temi ʼae neʼe hu ai ki “te sagatualio o te Atua,” neʼe fetogi ai tana manatu pea mo fakaovi tuʼumaʼu ai ki te ʼAtua. (Pes. 73:16-18) Neʼe taʼofi e te tagata faipesalemo ia te ako maʼuhiga: Kapau ʼe fia taupau e he tahi ʼana felogoʼi mo Sehova, ʼe tonu ke kau ki tana hahaʼi pea mo tali ke ina maʼuliʼi ʼana tokoni.—Pes. 73:24.

² ʼE tou fia maʼu he ʼu felogoʼi lelei mo te ʼAtua moʼoni. Koia, ʼe ʼaoga ai ke tou tali ʼana tokoni pea mo tana fakatonutonu. ʼI tatatou fai ia te faʼahi ʼaia, ʼe akoʼi ai tatou e Sehova, ke tou liliu ai ko te hahaʼi ʼae ʼe fakaʼamu ki ai. ʼI te temi muʼa, neʼe fakaha e te ʼAtua ia tona ʼofa ki ʼihi hahaʼi, pea ʼi ʼihi temi ki te ʼu puleʼaga, ʼo ina fakafealagia kia natou ke natou tali ia tana fakatonutonu. ʼE tohi ia te ʼu faʼifaʼitaki ʼaia ʼi te Tohi-Tapu “ki totatou akoi” pea “ko ni fakatokaga mai kia tatou” ʼi te ʼu ʼaho fakamuli ʼaeni. (Loma 15:4; 1 Ko. 10:11) ʼI te alatike ʼaeni, ʼe tou vakaʼi anai ni faʼifaʼitaki ʼo ʼuhiga mo te faʼahi ʼaia. ʼE tou vakaʼi anai peʼe feafeaʼi ia te faʼahiga manatu ʼa Sehova pea he ko ʼe ʼe lelei ke ina akoʼi tatou.

ʼE FAKAʼAOGAʼI E SEHOVA IA TANA TAKITAKI OHAGE KO TE TUFUGA FAʼU IPU KELE

3. Ia Esaia 64:7 pea mo Selemia 18:1-6, ʼe fakaha feafeaʼi te takitaki ʼa Sehova ki te hahaʼi? (Vakaʼi ia te ʼuluaki pakī.)

³ ʼE fakatatau ia Sehova ʼi te Tohi-Tapu ki te tufuga faʼu ipu kele, koteʼuhi ʼe pule ki te hahaʼi pea mo te ʼu puleʼaga. ʼE ui fenei ia Esaia 64:7: “Kae, [Sehova], ko koe ko tamatou tamai; ko matou ko te kele kula, pea ko koe ae nee ina fau matou, ko matou fuli ko te gaueaga o ou nima.” ʼE fakaʼaogaʼi e te tufuga faʼu ipu ia te kele moʼo fai ʼaki te meʼa ʼae ʼe loto ki ai. ʼE mole feala ki te kele ke ina fakatotonu te tufuga faʼu ipu. ʼE toe feia pe mo te tagata, ʼe mole feala ke ina fakatotonu te ʼAtua. ʼE mole tonu ke tou fakaha age ki te ʼAtua ia te faʼahiga ako ʼae ʼe tonu ke ina fai kia tatou, ohage pe ko te kele ʼe mole feala ke ina ui age ki te tufuga faʼu ipu pe ʼe ko te faʼahiga ipu fea ʼae ʼe tonu ke ina fai.—Lau ia Selemia 18:1-6.

4. ʼE fakamalohiʼi koa e Sehova ia te hahaʼi pea mo te ʼu puleʼaga ke ina akoʼi natou? Kotea tona tupuʼaga?

⁴ Neʼe fakaha e Sehova ki te kau Iselaele ʼe feala ke ina gaueʼi natou ohage pe ko te gaueʼi e te tufuga faʼu ipu ia te kele. Kaʼe he ko ʼe ʼe kehekehe ia Sehova pea mo te tagata tufuga faʼu ipu kele? Neʼe foaki e Sehova ki te hahaʼi pea mo te ʼu puleʼaga ia te meʼa ʼofa makehe ʼae ko te loto faʼitaliha, ʼae ʼe feala ai ke natou tahi toʼo ʼanatou tonu. Neʼe mole ina fakatupu ʼihi ke agakovi pea mo ʼihi ke agalelei. ʼE mole ina fakamalohiʼi te hahaʼi ke natou fakalogo age kia te ia. ʼE ina tuku ia te tagata ke ina filifili pe ʼe akoʼi ia ia tona Tupuʼaga, ʼae ko Sehova peʼe kailoa.—Lau ia Selemia 18:7-10.

5. Kotea ʼae ʼe fai e Sehova moka mole loto e te hahaʼi ke ina akoʼi natou?

⁵ Kotea ʼae ʼe feala ke hoko mo kapau ʼe logo gataʼa he tahi pea ʼe mole ina loto ke akoʼi ia ia e Sehova, te Tufuga Faʼu Ipu Kele? Kotea ʼae ka fai anai e Sehova ʼi tona ʼuhiga tufuga faʼu ipu kele? Kapau ʼe faigataʼa ki he tagata tufuga faʼu ipu hana gaueʼi ia te moʼi kele moʼo fai ʼaki ia te meʼa neʼe loto ki ai, ʼe feala ke ina fai he tahi age meʼa, peʼe ina liʼaki ia te moʼi kele ʼaia. ʼE tautau hoko ia te faʼahi ʼaia he neʼe mole gaueʼi fakalelei e te tufuga faʼu ipu ia te moʼi kele ʼaia. Kaʼe ʼe akoʼi fakalelei e Sehova ia te hahaʼi. (Tet. 32:4) Kapau ʼe mole loto he tahi ke akoʼi ia ia e Sehova, ʼe ko tana pe ia hala. ʼE akoʼi e Sehova ia te hahaʼi ʼo mulimuli pe ki tanatou faʼahiga tali ia tana ako. Kapau ʼe fakalogo ia te hahaʼi kia Sehova, ʼe feala anai ke ina fakaʼaogaʼi natou. Ohage la, ʼe fakata te kau Kilisitiano fakanofo ki he ʼu ipu ki hona fakaʼaoga ʼe fakaʼapaʼapaʼia. Kaʼe ki te hahaʼi ʼae ʼe natou fakafisi ki te ʼu tokoni ʼa te ʼAtua, ʼe natou liliu anai ko ni ipu ʼo te hauhau, ʼe mole hona ʼaoga.—Loma 9:19-23.

6, 7. Neʼe tali feafeaʼi e te Hau ko Tavite pea mo te Hau ko Saulo ia te tokoni ʼa Sehova?

⁶ Ko te faʼahiga akoʼi e Sehova ia te hahaʼi, ʼe ko tana foaki age kia natou he ʼu tokoni peʼe ina fakatonutonuʼi natou. Ohage la, kotou fakakaukauʼi age ia te faʼahiga ako ʼae neʼe foaki e Sehova ki te ʼu ʼuluaki hau ʼe lua ʼo Iselaele, ia Saulo pea mo Tavite. Neʼe fua kovi ki te Hau ko Tavite pea mo ʼihi atu ʼuhi ko tana tono pea mo Pate-Sepa. Logope la neʼe hau ia Tavite, kaʼe neʼe fakatonutonuʼi ia ia e Sehova. Neʼe fekauʼi e te ʼAtua ia tana polofeta ko Natane ke alu ʼo tokoniʼi ia Tavite. (2 Sam. 12:1-12) Neʼe tali feafeaʼi e Tavite ia te faʼahi ʼaia? Neʼe fakahemala moʼoni ki te meʼa ʼae neʼe ina fai. Koia, neʼe fakaha e te ʼAtua ia tona loto manavaʼofa kia Tavite.—Lau ia 2 Samuele 12:13.

⁷ Neʼe kehe pe te Hau ko Saulo. Neʼe mole fakalogo ki te tokoni. Neʼe fekauʼi e Sehova ia Samuele ke ina fakaha kia Saulo ke ina matehi ia te kau Amaleke pea mo ʼanatou faga manu. Kaʼe neʼe talagataʼa ia Saulo ki te fakatotonu ʼa Sehova. Neʼe mole ina matehi ia te Hau ko Akake, pea neʼe ina taupau ʼana manu sisino. (1 Sam. 15:1-3, 7-9, 12) Ko te tupuʼaga la ʼaia ʼo te fekauʼi ai e Sehova ia Samuele ke alu ʼo tokoniʼi ia Saulo. Neʼe feala pe ke fakalogo ia Saulo ki te tokoni pea mo ina tali ke akoʼi ia ia e Sehova. Kaʼe neʼe mole fia fetogi ia Saulo. Ki tana manatu, ʼe ʼi ai te tupuʼaga lelei ʼo tana mole fakalogo ki te ʼu fakatuʼutuʼu ʼa Sehova. Neʼe ina ui ʼe ina sakilifisioʼi anai te ʼu manu ʼaia maʼa Sehova. Neʼe fakafisi ia te ʼAtua kia Saulo ʼi tona ʼuhiga hau, pea neʼe mole toe maʼu e Saulo ia he ʼu felogoʼi ʼe lelei mo ia.—Lau ia 1 Samuele 15:13-15, 20-23.

ʼE MOLE FAKAPALATAHI TE ʼATUA

8. Kotea te ako ʼe feala ke tou taʼofi ʼo ʼuhiga mo te faʼahiga tali e Iselaele ia te ako mai ia Sehova?

⁸ Neʼe foaki e Sehova ki te ʼu puleʼaga ia te fealagia ʼae ke natou fakalogo age kia te ia. ʼI te hili ʼo tana fakaʼateaina te kau Iselaele mai Esipito, ʼi te taʼu 1513 ʼi muʼa ʼo te temi ʼo Sesu, neʼe natou liliu ai ko te hahaʼi makehe ʼa Sehova. Neʼe fakapapauʼi age e te ʼAtua kia natou ʼe ina akoʼi anai natou. Kaʼe neʼe mole tali e te hahaʼi ke ina akoʼi natou pea neʼe natou haga fai ia te meʼa ʼae ʼe kovi kia mata ʼo Sehova. Neʼe natou tauhi ki te ʼu ʼatua hala ʼo te ʼu fenua ʼo te ʼu tafaʼaki. Neʼe fekauʼi liuliuga e Sehova ia te kau polofeta ke olo ki te kau Iselaele ʼo tokoni kia natou ke fetogi tanatou aga, kaʼe neʼe fakafisi ia te kau Iselaele ki te tokoni ʼa te kau polofeta. (Sel. 35:12-15) Neʼe fakatonutonuʼi natou e Sehova koteʼuhi neʼe mole natou fakalogo. Neʼe maʼu e te kau Asilia ia te ʼu telepi ʼe hogofulu ʼo te potu noleto. Ki muli age, neʼe maʼu e te kau Papilone ia te ʼu telepi ʼe lua ʼo te potu saute. ʼE ʼi ai te ako maʼuhiga ʼe tou taʼofi mai te aluʼaga ʼaeni. Ke feala ke tou maʼu te ʼu fua lelei ʼo te ako mai ia Sehova, ʼe tonu ke tou tali lelei ia te faʼahi ʼaia.

9, 10. Neʼe tali feafeaʼi e te kau Ninive ia te ʼu fakatokaga ʼa Sehova?

⁹ Neʼe toe foaki e Sehova ia te fealagia ki te kolo muʼa ʼo Asilia, ʼae ko Ninive, ke natou tali ʼana fakatokaga. Neʼe ui fenei e Sehova kia Sonasi: “Ke ke tuu ki oluga, o alu ki Ninive, ki te kolo lahi, pea ke ke kalaga ki ai! Koteuhi kua kaku mai kia au tana agakovi.” Neʼe fakatuʼutuʼu e Sehova ke maumauʼi ia te kolo ʼo Ninive ʼuhi ko te agakovi ʼa te hahaʼi.—Son. 1:1, 2; 3:1-4.

¹⁰ ʼI te temi ʼae neʼe fakaha ai e Sonasi ia te logo ki te hahaʼi, neʼe natou kamata tui ai ki te ʼAtua. Neʼe natou fia fakahemala fuli pea neʼe natou sesunio pea mo natou tui te ʼu tapoleni taga. Maʼia mo te hau, “nee tuu ake leva ia ia i tona hekaaga fakahau, o hui tona pulupulu, kae ina tui leva he taga, pea nee lala leva ia ia i te lefulefu.” Neʼe tuku e te kau Ninive ke akoʼi natou e Sehova, pea neʼe natou fakahemala. Ko te tupuʼaga la ʼaia ʼo te mole maumauʼi e Sehova ia te kolo.—Son. 3:5-10.

11. Kotea te ako ʼe feala ke tou taʼofi mai te faʼahiga aga ʼa Sehova ʼo ʼuhiga mo Iselaele pea mo Ninive?

¹¹ Logope la, ko Iselaele neʼe ko te hahaʼi makehe ʼa Sehova, kaʼe neʼe ina fakatonutonuʼi natou. Neʼe mole ko tana hahaʼi makehe ia te kau Ninive, kaʼe neʼe natou tali lelei ke akoʼi natou e Sehova. Ko te tupuʼaga la ʼaia ʼo te fakaha ai e Sehova ia tona loto manavaʼofa kia natou ʼo mole ina fakaʼauha natou. ʼE mole fakapalatahi ia Sehova, pea ʼe ina fakamauʼi te ʼu faʼahiga hahaʼi fuli ʼo mulimuli ki tanatou faʼahiga aga.—Tet. 10:17.

ʼE ILOʼI E SEHOVA IA TE TEMI ʼAE ʼE TONU KE INA FETOGI AI ʼANA FAKATUʼUTUʼU

12, 13. (1) He ko ʼe ʼe fetogi e Sehova tana fakatuʼutuʼu ʼo mulimuli ki te faʼahiga tali e te hahaʼi ia tana ako? (2) Kotea te ako ʼe feala ke tou taʼofi mai te fakahemala ʼa Sehova ʼo ʼuhiga mo Saulo pea mo te kau Ninive?

¹² Kapau ʼe fetogi e te hahaʼi tanatou faʼahiga aga, pea ʼe feala kia Sehova ke ina fetogi ʼana fakatuʼutuʼu. Ohage la, ʼe fakaha mai ʼi te Tohi-Tapu, neʼe fakahemala ia Sehova ʼi tana fakanofo ia Saulo ke hau ʼi Iselaele. (1 Sam. 15:11) Kaʼe ʼi te temi ʼae neʼe fakahemala ai te kau Ninive pea mo fetogi ai tanatou faʼahiga aga, ʼe ui fenei ʼi te Tohi-Tapu: “Nee fakahemala leva te Atua ki te kovi ae nee ina fakatotonu ke fai kia natou, pea nee mole ina fakahoko leva ia ia.”—Son. 3:10.

¹³ Ka ui ʼi te Tohi-Tapu, neʼe “fakahemala” ia Sehova, ko tona fakaʼuhiga ʼe fetogi tana faʼahiga manatu ʼo ʼuhiga mo he tahi peʼe ina fetogi tana fakatuʼutuʼu. ʼI te kamata, neʼe leleiʼia e Sehova ia Saulo. Kaʼe ʼi te temi ʼae neʼe talagataʼa ai ia Saulo, neʼe lituʼa ia Sehova kia Saulo ʼi tona ʼuhiga hau. Neʼe mole faihala ia Sehova ʼi te temi ʼae neʼe ina filifili ai ia Saulo ke hau, neʼe lituʼa ki ai ʼuhi he neʼe talagataʼa kia te ia. Kaʼe ʼi te temi neʼe fakahemala ai te kau Ninive, neʼe lotolelei ia Sehova ke ina fetogi tana fakatuʼutuʼu pea mo ina fakahao natou. ʼE fakalotomalohi kia tatou ia tatatou iloʼi ʼae ʼe agalelei ia Sehova pea mo loto manavaʼofa. ʼE lotolelei ke ina fetogi tana fakatuʼutuʼu mo kapau ʼe fetogi ia te faʼahiga aga ʼa te hahaʼi.

ʼAUA NAʼA TOU FAKAFISI KI TE FAKATONUTONU ʼA SEHOVA

14. (1) ʼE akoʼi feafeaʼi tatou e Sehova ia ʼaho nei? (2) Kotea ʼae ʼe tonu ke tou fai moka akoʼi tatou e te ʼAtua?

¹⁴ Ia ʼaho nei, ʼe akoʼi tatou e Sehova ʼaki ia te Tohi-Tapu pea mo tana kautahi. (2 Tim. 3:16, 17) ʼE tonu ke tou fiafia moka foaki mai he faʼahiga tokoni peʼe moka fakatonutonuʼi tatou. Tatau aipe pe ʼe kua fualoa tatatou kua papitema, peʼe kotea te ʼu pilivilesio ʼe tou maʼu ʼi te kokelekasio, ʼe tonu ke tou haga fakalogo ki te ʼu tokoni ʼa Sehova. Kapau ʼe tou tali lelei ke akoʼi tatou e Sehova, ʼe feala ke tou liliu ko te faʼahiga kaugana ʼae ʼe ʼofa ki ai.

15, 16. (1) Kotea ʼae ʼe logoʼi e he tahi ʼe toʼo ʼona pilivilesio ʼi te kokelekasio? Kotou tuku mai he faʼifaʼitaki. (2) Kotea ʼae ʼe feala ke tokoni mai ke tou tauʼi ia te ufiufi moka fakatonutonuʼi tatou?

¹⁵ ʼE fakatonutonuʼi feafeaʼi tatou e Sehova? ʼE ina ako mai ia te ʼu meʼa ʼae ʼe loto ke tou fai, pea ʼe ina fakatonutonuʼi tatatou faʼahiga manatu. ʼI ʼihi temi, ʼe ʼaoga ke fakatonutonuʼi tatou he neʼe tou fai ia he meʼa ʼe kovi. Pea ʼe feala ke toʼo ʼotatou pilivilesio ʼi te kokelekasio. Tou vakaʼi ia te faʼifaʼitaki ʼo te tagata ʼafeā ʼe higoa ko Dennis.a Neʼe fakatonutonuʼi he neʼe ina fai ia te tonu ʼe mole lelei ʼi tona fale gaue. Kotea ʼae neʼe logoʼi e Dennis ʼi te temi ʼae neʼe tala ifo ai ki te kokelekasio mole kei tagata ʼafeā? Neʼe ina ui fenei: “Neʼe hage kia au, neʼe mole he ʼuhiga ʼo te ʼu meʼa ʼae neʼe au fai koteʼuhi lolotoga taʼu ʼe 30, neʼe lahi ʼoku pilivilesio. Neʼe au pionie katoa pea neʼe au gaue ʼi te Petele. Neʼe toe fakanofo au ke au faifekau fakaminisitelio pea ki muli age neʼe fakanofo au ke au tagata ʼafeā. Neʼe ko taku ʼuluaki akonaki ʼaeni ʼi te fakatahi fakatisitilike. Pea fokifa pe kua toʼo fuli ʼoku pilivilesio.” Neʼe ufiufi pea neʼe feʼuiʼaki pe ʼe toe feala anai ke ʼaoga ki te kautahi.

¹⁶ Neʼe fetogi ia te aga ʼa Dennis. Kaʼe kotea ʼae neʼe ina fakalotomalohiʼi ia ia ke ina tauʼi ia te ufiufi? Neʼe faiga ʼo ako ia te Tohi-Tapu, mo faifakamafola tuʼumaʼu pea mo kau tuʼumaʼu ki te ʼu fono. Neʼe loto fakafetaʼi ki te ʼu fakalotomalohi ʼe fai age e te ʼu tehina mo tuagaʼane pea mo ʼae ʼe ina maʼu mai te ʼu tohi Fakatohi-tapu. ʼI te alatike ʼo Te Tule Leʼo (Fakafalani) ʼo te ʼaho 15 ʼo ʼAukusito 2009, ʼae ʼe talanoa ʼo ʼuhiga mo te faʼifaʼitaki ʼo he ʼu hahaʼi ʼi te temi muʼa neʼe fakatonutonuʼi e Sehova, neʼe hage pe ko he tohi neʼe fai maʼa ia moʼo tali ki ʼana faikole. Neʼe iloʼi e Dennis ʼaki ia te alatike ʼaia, ʼe tonu ke ina fakaʼaogaʼi tona temi moʼo fakamalohiʼi ʼana felogoʼi mo Sehova. Neʼe fua lelei ia te fakatonutonu ʼae neʼe fai ki ai, pea hili ki ai ni taʼu, neʼe toe fakanofo ia ia ko te faifekau fakaminisitelio.

17. ʼE tokoni feafeaʼi ia te fakamavae ki he tahi neʼe agahala? Kotou tuku mai he faʼifaʼitaki.

¹⁷ Ko te fakamavae ʼo he tahi mai te kokelekasio ʼe ko he tahi ʼaia fakatonutonu mai ia Sehova. ʼE ina puipui ia te kokelekasio mai te ʼu fakaneke kovi ʼa ia ʼae neʼe agahala, pea ʼe ina fakafealagia kia ia ʼae neʼe agahala ke fakahemala. (1 Ko. 5:6, 7, 11) Neʼe fakamavae ia Robert lolotoga taʼu ʼe 16. Lolotoga te ʼu taʼu ʼaia, neʼe mulimuli ʼana matuʼā mo ʼona tehina pea mo ʼona tokolua ki te ʼu tokoni ʼo te Tohi-Tapu, neʼe mole natou fakatahi mo ia pea neʼe mole natou fefakamaloʼaki. Kua hili ki ai ni taʼu, neʼe toe fakahu mai ia Robert, pea ʼe tuputupu lelei ʼi te faʼahi fakalaumalie. ʼE ina ui neʼe tupu tana toe liliu mai ki te moʼoni ʼi te hili ki ai ʼo te ʼu taʼu, he neʼe mole fia fakatahi tona famili pea mo ia. Neʼe ina ui, kapau neʼe fakatahi tona famili pea mo ia, peʼe natou fakalavelave age pe ʼe feafeaʼi ia ia, neʼe mole feala hana toe liliu mai. Neʼe ina uga ia ia ke toe liliu mai kia Sehova pea mo Tana hahaʼi.

18. Kotea ʼae ʼe tonu ke kotou fai moka akoʼi tatou e te ʼAtua?

¹⁸ ʼE lagi mole ʼaoga kia tatou ia te taʼi fakatonutonu ʼaia. Kaʼe ʼe ʼaoga ke tou fakakaukau fakalelei pe ʼe kotea ʼae ka tou fai anai moka akoʼi peʼe fakatonutonuʼi tatou e te ʼAtua. Kotea ʼae ka tou fai anai? ʼE tou tali anai koa te tokoni ohage ko Tavite peʼe tou fakafisi anai tatou ki ai ohage ko Saulo? ʼE ko Sehova ia totatou Tufuga Faʼu Ipu Kele Lahi pea mo Tamai. ʼAua naʼa galo kia koutou “e tauteai e [Sehova] ia ia ae e ofa ia ki ai, o hage ko he tamai ki te fanau ae e ofa mamahi ia ia ki ai.” Kotou tuku ia Sehova ke ina fakatonutonuʼi koutou.—Taag. 3:11, 12.