He Koʼe ʼe Tonu Ke Manavasiʼi Ki Te ʼAtua Moʼoni ʼi Te Temi Nei?
“Manavasiʼi ki te ʼAtua moʼoni pea mo taupau tana ʼu fakatotonu. He koʼena te maʼua katoa ʼo te tagata.”—Tagata Tānaki 12:13.
1, 2. He koʼe ʼe ʼaoga te manavasiʼi ʼaē ki te ʼAtua?
ʼE LELEI ki te tagata ke ina maʼu he manavasiʼi ki te ʼAtua, ʼe mata fakaʼapaʼapa pea mo fakatupu hāofaki. ʼIo, logope la ʼe lahi te ʼu mataku fakatagata ʼe fakatupu kovi ki totatou loto, ʼo toe feiā ki totatou maʼuli mālōlō, ʼe lelei ke tou manavasiʼi kia Sehova ʼAtua.—Pesalemo 112:1; Tagata Tānaki 8:12.
2 ʼE ʼiloʼi e te Tupuʼaga te faʼahi ʼaia. ʼI tona ʼofa ʼaē ki te ʼu meʼa ʼaē neʼe ina fakatupu, ʼe ina fakatotonu ki te hahaʼi fuli ke nātou manavasiʼi pea mo atolasio kia te ia. ʼE tou lau fēnei: “Neʼe ʼau sio ki te tahi ʼaselo ʼe lele ʼi te lotomalie ʼo te lagi, pea neʼe ʼi ai tana logo lelei ʼe heʼegata ke ina kalagaʼi ohage ko he evaselio kia nātou ʼaē ʼe nonofo ʼi te kele, pea mo te puleʼaga kehekehe, te telepi kehekehe, te lea kehekehe pea mo te hahaʼi kehekehe ʼo ina ʼui leʼolahi: ‘Koutou manavasiʼi ki te ʼAtua pea mo foaki kia te ia te kolōlia, heʼe kua hoko mai te hola ʼo tana fakamāu, pea koutou atolasio kia Ia ʼaē neʼe ina faʼu te lagi mo te kele.’ ”—Fakahā 14:6, 7.
3. Koteā te meʼa neʼe fai e te Tupuʼaga maʼa tatatou ʼu ʼuluaki mātuʼa?
3 ʼE mahino ia ʼe mole tonu ke tou fakafisi ki te Tupuʼaga ʼo te ʼu meʼa fuli, te Matapuna ʼo te maʼuli, heʼe ko tatou ko tana ʼu meʼa ʼo toe feiā mo te kele. (Pesalemo 24:1) ʼI tana fakahā tona ʼofa lahi, neʼe ina foaki te maʼuli ki tana ʼu fānau ʼaē ʼi te kele pea mo foaki kia nātou te potu taulekaleka ke nātou maʼuʼuli ai—ko te palatiso fakakelekele taulekaleka. Kae, ko te meʼa ʼofa fakaofoofo ʼaia neʼe ʼi ai tona ʼu maʼua. Koia, neʼe falala te ʼAtua kia nāua. Neʼe tonu ke tokaga tatatou ʼu ʼuluaki mātuʼa ki tonā nofoʼaga pea mo nā fakafonu te kele ke hahaʼi pea mo nā puleʼi te kele katoa. Neʼe ʼi ai tonā ʼu pilivilesio pea mo tonā ʼu maʼua ʼo ʼuhiga mo te ʼu manu ʼo te kele, te ʼu manulele, pea mo te ʼu ika—neʼe tonu ke nā tokakaga ki te ʼu manu fuli ʼaia, ʼaē ka maʼuʼuli anai mo nāua pea mo tona hōloga ʼi te kele. ʼAki te toe falala ʼaia neʼe tuku kia nāua, neʼe ʼi ai te meʼa neʼe fakamaʼua kia nāua.
4. Koteā te meʼa neʼe fai e te tagata ki te ʼu meʼa ʼaē neʼe fakatupu e te ʼAtua?
4 Logope la te kamataʼaga fakaofoofo ʼaia, koutou fakakaukauʼi te meʼa neʼe fai e te tagata moʼo ʼulihi tona nofoʼaga matalelei ʼaē ʼi te kele! ʼAki tana fiatuʼu neʼe ʼulihi e te tagata te kele. Kua ʼamanaki pe ki te ʼuli ʼaia ke ina maumauʼi te maʼuli ʼo te ʼu manu, te ʼu manulele, pea mo te ʼu ika. ʼE mole tuku anai e totatou ʼAtua faitotonu pea mo ʼofa ke hoholo te maumau ʼaia. Kua tonu ke fakamāuʼi ia nātou ʼaē ʼe nātou maumauʼi te kele, pea ʼe ko he meʼa ʼe fakatupu mataku ki te tokolahi. ʼI te tahi faʼahi, ko nātou ʼaē ʼe nātou falala ʼaki he aga fakaʼapaʼapa ki te ʼAtua, ʼe ko he meʼa fakafimālie te ʼiloʼi ʼaē te meʼa ka hoko. ʼE fai anai e Sehova he fakamāu, pea ko te kele ʼe fakafoʼou anai. ʼIo ʼe ko he logo fakafiafia ʼaia ki te hahaʼi agatonu fuli ʼo te kele.
5, 6. Koteā anai te meʼa ka fai e Sehova ʼo ʼuhiga mo te aga ʼaē neʼe fai e te tagata ki Tana ʼu meʼa ʼaē neʼe ina fakatupu?
5 Koteā anai te puleʼaki ʼaē ka fai e te ʼAtua moʼo fakahoko ʼo tana fakamāu? ʼE ina fakaʼaogaʼi anai ia Sesu Kilisito, ʼaē kua fakanofo Hau ki te Puleʼaga ʼo te ʼAtua ʼi selo. ʼAki te ʼAlo ʼaia ʼi selo, ʼe fakagata anai e Sehova te tuʼu heʼemaʼa pea mo talagataʼa ʼaenī. (2 Tesalonika 1:6-9; Fakahā 19:11) ʼE ko he faʼahiga puleʼaki ʼaia moʼo fakafimālie ia nātou ʼaē ʼe manavasiʼi ki te ʼAtua pea ʼi te temi ʼaia, ke hāofaki pea mo taupau totatou nofoʼaga ʼaē ko te kele.
6 ʼE hoko feafeaʼi anai te meʼa ʼaia? ʼE fakahā e te Tohi-Tapu ʼe ʼamanaki ke hoko te toe mamahi lahi ʼo iku ki te tau ʼo Halamaketone. (Fakahā 7:14; 16:16) Ko te fakamāu anai ʼaia ʼaē ka fai e te ʼAtua ki te tuʼu ʼo te ʼu faʼahiga meʼa ʼuli ʼaenī pea mo nātou ʼaē ʼe nātou ʼulihi te kele. ʼE hāo anai koa niʼihi ʼi te fakamāu ʼaia? Ei! Ko nātou ʼaē ʼe mole ia nātou te manavasiʼi fakalikoliko ki te ʼAtua, kae ʼe nātou manavasiʼi kia te ia ʼaki he aga fakaʼapaʼapa pea mo aga faka lotu. ʼE hāofaki anai nātou.—Tāʼaga Lea 2:21, 22.
Ko He Fakahā Fakaofoofo ʼo Tona Mālohi
7. He koʼe koa neʼe tokoni te ʼAtua ki te kau Iselaelite ʼi te ʼu ʼaho ʼo Moisese?
7 Ko te gāue fakaofoofo ʼaia ʼa Sehova ʼAtua neʼe fakatātā e te gāue mālohi neʼe ina fai ʼo ʼuhiga mo tana ʼu hahaʼi tauhi kua hili nei kiai taʼu e 1 500 ʼi muʼa ʼo totatou temi. Ko te foʼi kautau mālohi ʼo Esipito neʼe nātou fakapōpulaʼi te kau Iselaelite ʼaē neʼe nonofo ʼi tonatou fenua, pea neʼe nātou faiga ke nātou molehi te kau Iselaelite, ʼi te fakatotonu ʼaē e Falaone ke tāmateʼi fuli te ʼu ʼuluaki tamaliki tagata Iselaelite. Neʼe mālo te ʼAtua ia Esipito, ʼo hāofaki ai ia Iselaele mai te tuʼu mālohi faka politike ʼaia, pea mo faka ʼāteaina nātou mai te puleʼaga neʼe ʼuli ʼuhi ko tanatou tauhi ʼaē ki te ʼu tuʼuga ʼatua.
8, 9. Neʼe tali feafeaʼi ia Moisese pea mo te kau Iselaelite ki te tokoni ʼa te ʼAtua?
8 ʼE fakamatala ia Ekesote kapite 15 te meʼa ʼaē neʼe fai e Iselaele ʼi tanatou hāo ʼaē mai Esipito. Ko te fakakaukauʼi ʼo te fakamatala ʼaia, ʼe tokoni anai kia tatou ke tou mahino peʼe lava feafeaʼi ki te kau Kilisitiano hanatou hāo mai te tuʼu ʼuli ʼaenī ʼi te faʼahi fakalaumālie pea mo fakasino. Tou vakaʼi ia Ekesote kapite 15, pea mo tou fakakaukau ki te ʼu vaega ʼaē kua fili ke tou mahino ai pe koʼe ʼe tonu ke tou manavasiʼi kia Sehova, te ʼAtua moʼoni. ʼE tou kamata ʼaki te vaega 1 pea mo te vaega 2:
9 “ ʼI te temi ʼaia, ko Moisese pea mo te ʼu foha ʼo Iselaele neʼe nātou fai te hiva ʼaenī kia Sehova pea mo ʼui maʼa nātou: ‘Ke ʼau hiva kia Sehova, heʼe kua ina faka māʼoluga ia ia! Ko te hōsi pea mo tana tagata heka hōsi, neʼe ina lī ki te tai. Ko toku mālohi pea mo toku māfimāfi, ko Sah, heʼe ʼaoga ia ki toku hāofaki.’ ”
10. Koteā ʼaē neʼe tupu ai te fakaʼauha e te ʼAtua te ʼu kautau ʼo Esipito?
10 Kua ʼiloʼi e te hahaʼi fuli te fakamatala ʼaia, ʼaē ʼe fakamatala ai pe neʼe feafeaʼi te hāofaki e Sehova ia Iselaele mai Esipito. Neʼe ina fakahoko te ʼu tautea ki te puleʼaga mālohi ʼaia ʼo aʼu ki te temi ʼaē neʼe fakagafua ai e Falaone ke mavae ia Iselaele. Kae ki muli age neʼe tuli e te ʼu kautau ʼa Falaone te hahaʼi ʼaia ʼaē neʼe mole ʼi ai pe la honatou ʼu meʼa tau, pea neʼe kua teitei pe ke maʼu nātou e te ʼu kautau ʼi te kauvai ʼo te Tai Kula. Neʼe lagi manatu te ʼu foha ʼo Iselaele, ʼe mole fualoa anai tonatou ʼāteaina ʼaia, kae neʼe fai e Sehova tana fakatuʼutuʼu. Neʼe ina tofa faka milakulo te ala ʼi te tai pea ina hāofaki ai tana hahaʼi. ʼI tonatou muliʼi ʼaē e te kau Esipito, neʼe haga ia Sehova ʼo fakamapeʼe ifo kia nātou te Tai Kula pea mo fakamoū ai Falaone pea mo tana ʼatu kautau mālohi.—Ekesote 14:1-31.
11. Koteā ʼaē neʼe hoko ʼi te tauʼi e te ʼAtua ia Esipito?
11 ʼI te fakaʼauha ʼaē e Sehova te ʼatu kautau mālohi ʼo Esipito, neʼe ko he meʼa neʼe ina fakahikihiki ia ia ʼi muʼa ʼo tana ʼu kaugana pea neʼe tupu ai te ʼiloa ʼo tona huafa. (Sosue 2:9, 10; 4:23, 24) ʼIo, ko tona huafa neʼe hikihiki ʼo māʼoluga age ʼi te ʼu ʼatua hala pea mo heʼe mālohi ʼo Esipito, ʼaē neʼe ʼiloga mai neʼe mole lava ke nātou hāofaki te hahaʼi ʼaē ʼe tauhi age kia nātou. Neʼe lotomamahi ʼaupito te hahaʼi tauhi ʼaia, he neʼe nātou falala ki tonatou ʼu tamapua pea mo te tagata, pea mo te kautau mālohi. (Pesalemo 146:3) Koia la ʼaē neʼe fai ai e te kau Iselaelite te ʼu hiva fakavikiviki, ʼo fakahā ʼaki ai tanatou manavasiʼi ʼaē ki te ʼAtua maʼuli, ʼaē neʼe ina hāofaki tana hahaʼi ʼaki tona māfimāfi!
12, 13. Koteā te meʼa ʼe feala ke tou tāʼofi ʼi te mālo ʼa te ʼAtua ʼi te Tai Kula?
12 Tatau aipe mo te temi nei, ʼe tonu ke mahino kia tatou ʼe mole feala ki he ʼu ʼatua hala pea mo he toe mālohi ʼaupito, māʼia mo te ʼu mahafu tau nukeleʼea ke nātou tauʼi ia Sehova. Ko Sehova ʼe feala ke ina hāofaki tana hahaʼi, pea ʼe ina fai anai te faʼahi ʼaia, koteʼuhi “ ʼe ina fai te meʼa ʼaē ʼe loto kiai ʼi te kautau ʼaē ʼi selo pea ʼi te lotolotoiga ʼo te hahaʼi ʼo te kele. Pea ʼe mole he tahi ʼe feala ke ina tāʼofi tona nima peʼe feala hana ʼui age kia te ia: ‘Koteā ʼaē neʼe ke fai?’ ” (Taniela 4:35) Ka tou mahino lelei ki te ʼu palalau ʼaia, ʼe tou toe fia kau pe foki mo tatou ki te ʼu hiva fakavikiviki fakafiafia ʼaia.
13 Ko te hiva mālohi ʼaē ʼi te Tai Kula ʼe toe hoko atu ʼo ʼui fēnei: “Ko Sehova ʼe ko he tagata tau mālohi. Ko tona huafa ko Sehova.” Koia, ko te Tagata Tau mālohi ʼaia, ʼe mole ko he tagata ia neʼe faʼu e te fakakaukau ʼa te tagata. ʼE ʼi ai tona huafa! ʼE higoa ‘ ʼe ko Ia ʼaē ʼe ina fakahoko,’ te Tupuʼaga Lahi, ʼaē ko tona “huafa ko Sehova, . . . te Māʼoluga ʼAupito ʼi te kele katoa.” (Ekesote 3:14; 15:3-5; Pesalemo 83:18) ʼI takotou manatu, neʼe mole lelei age koa ki te kau Esipito ke nātou aga fakapotopoto ʼo manavasiʼi pea mo fakaʼapaʼapa ki te Māfimāfi ʼi hanatou fakafihiʼi ia ia?
14. Neʼe hā feafeaʼi te maʼuhiga ʼo te manavasiʼi faka lotu ʼi te Tai Kula?
14 Mai tona ʼuhiga ʼaē neʼe ko Ia ʼaē neʼe ina faʼu te kele, ko te Tupuʼaga ʼo te tai ʼe pule ʼāteaina ki te ʼu tuʼuga vai. (Ekesote 15:8) Neʼe ina toe fakaʼaogaʼi tona mālohi ki te matagi, ʼo ina fakahoko te meʼa ʼe molemo feala ki te tagata ke ina fai. Neʼe ina vaheʼi te ʼu toe vai ʼaia pea neʼe ina fakatuʼu te ʼu vai ohage ko he ʼu kaupā ke tofa he ala ʼi te lotomalie ʼo te tai, ke fakalaka ai tana hahaʼi. Koutou fakakaukauʼi age te meʼa ʼaia: ko te ʼu vai ʼe lauʼi miliona tane neʼe fakatuʼu ohage ko he ʼu kaupā, neʼe liliu ko te ala ke feholaki ai ia Iselaele. ʼIo, neʼe puipui ia nātou ʼaē neʼe manavasiʼi ki te ʼAtua. Ki muli age neʼe toe fakatō e Sehova te ʼu vai ʼaia, ʼo mapeʼe mālohi ohage ko he tulivio, ʼo moū ai te ʼatu kautau ʼa Falaone pea mo tanatou ʼu mahafu tau fuli. ʼI toe mālohi fakaʼatua neʼe hoko ki te ʼu ʼatua hala pea mo te ʼatu kautau fakatagata mālohi! ʼE mahino ia, ko Sehova ʼe ko ia ʼaē ʼe tonu ke tou manavasiʼi ki ai, ʼe mole koa la ko takotou manatu ʼaia?—Ekesote 14:21, 22, 28; 15:8.
Tou Fakahā Tatatou Manavasiʼi Ki Te ʼAtua
15. Koteā anai tatatou tali ʼo ʼuhiga mo te ʼu gāue mālohi pea mo fakatupu hāofaki ʼa te ʼAtua?
15 Kanapaula neʼe tou kau ʼi te hāofaki ʼaē neʼe hoko kia Moisese, ʼe mahino ia ʼe tou fai anai te hiva ʼaenī: “Ko ai te ʼu ʼatua ʼaē ʼe tatau mo koe, Ê Sehova? Ko ai ʼe tatau mo koe, koteʼuhi ʼe ke mālohi ʼi tau maʼoniʼoni? Ia ia ʼaē ʼe tau mo feʼauga ke manavasiʼi ʼaki he ʼu hiva fakavikiviki, ia Ia ʼaē ʼe ina fai te ʼu meʼa fakamanamana.” (Ekesote 15:11) Neʼe logona te ʼu taʼi manatu ʼaia ʼi te ʼu sēkulō ʼo aʼu mai ki te temi nei. ʼI te tohi fakamuli ʼo te Tohi-Tapu, neʼe talanoa te ʼapositolo ko Soane ki te kau kaugana fakanofo agatonu ʼo te ʼAtua: “ ʼE nātou hiva te hiva ʼaē ʼa Moisese, te kaugana ʼa te ʼAtua, pea mo te hiva ʼa te Akeno.” Koteā te hiva ʼaia? “ ʼE lahi pea mo fakaofoofo tau ʼu gāue, Sehova ʼAtua, te Māfimāfi. Totonu pea mo moʼoni tou ʼu ala, Hau ʼo te heʼegata. Ko ai anai he tahi ʼe mole manavasiʼi kia te koe, pea ʼe mole ina faka kolōliaʼi tou huafa? Heʼe ko koe pe ʼe ke agatonu tokotahi.”—Fakahā 15:2-4.
16, 17. Koteā te meʼa taulekaleka ʼe tou sio ʼe hoko ʼi te temi nei?
16 ʼO toe feiā pe ia ʼaho nei, ʼe ʼi ai te kau atolasio kua ʼāteaina ʼe nātou fakafetaʼi ki te ʼu gāue ʼaē neʼe fai e te ʼAtua pea ʼe nātou toe fakafetaʼi pe foki ki tana ʼu fakatotonu. Ko te ʼu hahaʼi mai te ʼu puleʼaga kehekehe neʼe faka ʼāteaina ʼi hona ʼaluʼaga fakalaumālie, ʼo nātou mavae mai te mālama ʼuli ʼaenī, koteʼuhi ʼe nātou fakamoʼoni ki te ʼu lekula faitotonu ʼa te ʼAtua pea mo nātou maʼuliʼi te ʼu fakatotonu faitotonu ʼa te ʼAtua. ʼI te taʼu fuli, ko te toko lauʼi teau afe ʼe nātou mavae ʼi te mālama fakahehema ʼaenī, ʼo nātou ʼolo ki te kautahi ʼaē ʼe maʼa pea mo faitotonu ʼa te kau atolasio ʼa Sehova. Kua vave pe, mokā ʼosi te ʼu fakamāu kakaha ʼa te ʼAtua ki te lotu hala pea mo te fakaʼauha ʼo te tuʼu ʼo te ʼu faʼahiga meʼa agakovi ʼaenī, ʼe nātou maʼuʼuli anai ʼo heʼegata ʼi te mālama foʼou pea mo faitotonu.
17 ʼO mulimuli ki te manatu ʼaē ʼe tuʼu ia Fakahā 14:6, 7, ʼe logo nei te malamanei ki te fakatokaga ʼo te fakamāu ʼaē ʼe tala e te kau Fakamoʼoni ʼa Sehova ʼaki te takitaki ʼa te kau ʼaselo. ʼI te taʼu ʼaenī kua hili, ʼi te ʼu fenua e 230 tupu, ko te toko nima miliona kau Fakamoʼoni neʼe nātou faka mafola te logo lelei ʼo te Puleʼaga ʼo te ʼAtua pea mo te temi ʼaē ka ina fakahoko ai te fakamāu. Moʼo akoʼi tonatou ʼu tatau ke nātou maʼuʼuli, ʼe tatuʼu tuʼumaʼu te kau Fakamoʼoni ki te hahaʼi, ʼo fai te ʼu ako faka Tohi-Tapu. Koia ʼi te taʼu fuli ko te toko lauʼi teau afe ʼe nātou mahino lelei ki te ʼAtua pea ʼe nātou manavasiʼi ki ai, ʼo nātou foaki tonatou maʼuli kia te ia, pea mo nātou papitema. ʼI meʼa fakafiafia te manavasiʼi ʼo te ʼu hahaʼi ʼaia ki te ʼAtua moʼoni!—Luka 1:49-51; Gāue 9:31; vakaʼi ia Hepeleo 11:7.
18. Koteā te meʼa ʼaē neʼe hoko ʼaē ʼe hā ʼaki ai ko te kau ʼaselo ʼe nātou kau ki tatatou fai faka mafola?
18 ʼE moʼoni koa te ʼui ʼaē ʼe kau te kau ʼaselo ki te gāue faka mafola ʼaia? ʼE mahino ia, koteʼuhi ʼi ʼihi temi, neʼe taki e te kau ʼaselo te kau Fakamoʼoni ʼa Sehova ki he ʼu ʼapi ʼo he ʼu hahaʼi ʼe lotomamahi, neʼe nātou loto moʼoni pea mo faikole ke nātou maʼu honatou tokoni ʼi te faʼahi fakalaumālie! Ohage la, ko te ʼu Fakamoʼoni ʼa Sehova e lua neʼe ʼolo mo te kiʼi tamasiʼi tagata ʼo tala te logo lelei aux Antilles. ʼI te kua vave tā ʼo te fetapā, neʼe fakatotonu e te ʼu fafine ʼaia ke fakaʼosi la tanatou gāue. ʼO mole hage ko te agamāhani, neʼe loto e te kiʼi tamasiʼi ke nātou ʼolo ʼo fisifisi te matapā ʼaē ʼe hoa mai. ʼI tana sio ʼaē ʼe mole tokatokaga mai te ʼu fafine, neʼe ʼalu ia ʼo fisifisi te matapā. Neʼe avahi mai te matapā e te kiʼi fafine kei finemui. ʼI te sio ʼa te ʼu fafine kiai, neʼe nā ʼolo ki ai ʼo palalau mo ia. Neʼe fakaafe nātou e te fafine ki tona ʼapi, ʼo ina fakamatalatala age ʼi te temi tonu ʼaē neʼe logo ai ki te fisifisi ʼo te matapā, neʼe faikole ia ki te ʼAtua ke ina fekauʼi mai he ʼu Fakamoʼoni ke ʼōmai ʼo ako mo ia te Tohi-Tapu. Pea fai ai te ʼu fakatuʼutuʼu ke fai hana ako faka Tohi-Tapu.
19. Koteā te ʼu meʼa ʼaē ʼe puipui mai tatou e te manavasiʼi ʼaē ki te ʼAtua?
19 Kapau ʼe tou fakahā fakahagatonu te fakamāu ʼaē ka fai e te ʼAtua, ʼe tou toe akoʼi mo tana ʼu fakatotonu agatonu. Kapau ʼe maʼuliʼi e te hahaʼi te ʼu fakatotonu ʼaia, ʼe nātou maʼu ai te ʼu tapuakina ʼi te faʼahi fakalaumālie pea mo te faʼahi fakasino. Ohage la, ʼe fakahā lelei e te Tohi-Tapu tana tapuʼi te ʼu felāveʼi fakasino heʼeʼaoga. (Loma 1:26, 27, 32) ʼI te temi nei, ʼe mole tokagaʼi pe la e te malamanei te ʼu lekula fakaʼatua. Koteā tona ʼu fua? Ko te ʼu taumatuʼa ʼe nātou mavete. Kua tuputupu te agatuʼu ʼa te kau tūpulaga. Kua mafola te ʼu mahaki fakatupu mate ʼaē ʼe maʼu ʼi te ʼu felāveʼi fakasino heʼeʼaoga, ʼaē kua liliu ko he tautea ʼi te 20 sēkulō. ʼIo, ʼe lahi te mafola ʼo te mahaki fakamataku ʼaē ko te SITA ʼuhi ko te ʼu felāveʼi fakasino heʼeʼaoga. Kae ko te manavasiʼi ʼaē ʼe fai ki te ʼAtua ʼaki he loto fakaʼapaʼapa, ʼe mole koa la ko he puipui lahi ki te kau atolasio moʼoni?—2 Kolonito 7:1; Filipe 2:12; toe vakaʼi ia Gāue 15:28, 29.
Te ʼu Fua ʼo Te Manavasiʼi Ki Te ʼAtua ʼi Te Temi Nei
20. Koteā te meʼa ʼaē ʼe hā ʼaki mai ai kua ʼiloʼi e te hahaʼi te ʼuhiga ʼo te kau Fakamoʼoni ʼa Sehova?
20 ʼE lahi te ʼu tapuakina ʼe foaki kia nātou ʼaē ʼe nātou manavasiʼi ki te ʼAtua pea mo muliʼi tana ʼu fakatotonu. Koutou fakatokagaʼi te meʼa neʼe hoko, ʼe ina fakahā ai kua lahi te fakamoʼoni ʼa te hahaʼi ki te ʼui ʼaē ko te kau Fakamoʼoni ʼa Sehova ʼe nātou faʼufaʼu te foʼi famili fakatautehina, ʼe maʼuli ʼi te tokalelei pea mo mulimuli ki te ʼu aga faka Kilisitiano ʼaē ʼe tonu ke fai. Ko te kau Fakamoʼoni, ko te kau fakafofoga ki te fakatahi fakafenua ʼi te Potu Toga ʼo Amelika neʼe nātou nonofo ʼi te otele, neʼe toe fakaʼaogaʼi pe foki ʼi te po e tahi ki te fakatahi neʼe fai e te pelesita ʼo te puleʼaga. ʼI te fehūfi ʼo te ʼu hahaʼi taupau ʼo te pelesita ki te ascenseur, neʼe hū mo te fafine Fakamoʼoni ka neʼe mole ina ʼiloʼi pe ko ai ʼaē neʼe hake ʼi te ascenseur, pea ko he meʼa neʼe mata fakapunamaʼuli ki te ʼu tagata taupau leʼo ʼo te pelesita! ʼI tana mahino ki te meʼa ʼaē neʼe ina fai, neʼe fai fakalelei te fafine Fakamoʼoni ʼaia ʼi tana hū fakapunamaʼuli age. Neʼe ina fakahā age tana kate ʼaē ʼe fakamoʼoni ʼaki ai ko ia ko te Fakamoʼoni pea mo ina ʼui age kia nātou ke ʼaua naʼa nātou tuʼaniaʼi ia ia, heʼe mole feala ke ina fai he meʼa ʼe kovi ki te pelesita. Neʼe malimali te tagata leʼo, pea mo ina ʼui fēnei age: “Kanapaula neʼe tatau te hahaʼi fuli mo te kau Fakamoʼoni ʼa Sehova, ka na ʼaua la ʼe mole fai he puleʼaki fēnei moʼo leʼoleʼohi ʼo te hahaʼi.”—Isaia 2:2-4.
21. Koteā te ʼu meʼa ʼaē ʼe fealagia kiai te hahaʼi ia ʼaho nei?
21 Ko te ʼu faʼahiga hahaʼi ʼaia ʼe fakatahiʼi nei e Sehova pea mo teuteuʼi nātou ke ‘nātou hāo ʼi te mamahi lahi’ ʼaē ka ina fakaʼauha te tuʼu ʼaenī. (Fakahā 7:9, 10, 14) ʼE mole hoko feiā pe te hāofaki ʼaia. Ke hāo he tahi, ʼe tonu ke manavasiʼi kia Sehova, ke ina fakamoʼoni ki tona ʼuhiga Tuʼi Pule faitotonu, pea mo foaki tona maʼuli kia te ia. Kae ʼi tona fakahagatonu, tokolahi ʼe mole nātou maʼu anai te faʼahiga manavasiʼi ʼaē ʼe tau mo he hāofaki. (Pesalemo 2:1-6) Kua ʼiloga lelei ia, ko te Pule ʼaē neʼe fili e Sehova, ia Sesu Kilisito, kua nofo Hau talu mai te taʼu fakamataku ʼo te 1914. Ko tona faka ʼuhiga, ʼe kei toe te kiʼi temi nounou ki te hahaʼi ke nātou maʼu pea mo nātou fakahā he manavasiʼi katoa kia Sehova. Logope la te faʼahi ʼaia, kae ʼe faka fealagia e totatou Tupuʼaga, māʼia mo nātou ʼaē ʼe tuʼulaga māʼoluga, ke nātou tali fēnei: “ ʼI te temi nei, ko koutou ko te ʼu hau, ke ia koutou te fakasiosio poto; koutou tuku ke akonakiʼi koutou, kau tuʼi fakamāu ʼo te kele. Koutou tauhi kia Sehova ʼi te manavasiʼi pea mo koutou fakafiafia ʼi he tetetete. Koutou ʼuma ki te ʼAlo, ke ʼaua naʼa malaga tona hāūhāū pea mo koutou mamate mai te ala, heʼe ko tona ʼita ʼe haʼu fakavilivili. Manuʼia ia nātou fuli ʼaē ʼe fenonoʼi ia te ia.”—Pesalemo 2:7-12.
22. Koteā anai te ka haʼu ʼo nātou ʼaē ʼe nātou manavasiʼi ki te ʼAtua ʼi te temi nei?
22 ʼOfa pe ke tou kau ia nātou ʼaē ʼe nātou fakavikiviki anai totatou Tupuʼaga ohage ko he Tahi ʼe ina hāofaki tatou. ʼE ko he faʼahi ʼe ina fakamaʼua ai kia tatou, ke tou manavasiʼi nei ki te ʼAtua moʼoni! (Vakaʼi ia Pesalemo 2:11; Hepeleo 12:28; 1 Petelo 1:17.) ʼE tonu ke tou haga ako tana ʼu fakatotonu agatonu pea mo mulimuli kiai. Ko te hiva ʼa Moisese pea mo te Akeno, ʼaē ia Fakahā 15:3, 4, ʼe toe ʼāsili anai tona hivaʼi mālohi ʼi te temi ʼaē ka molehi ai e Sehova te agakovi katoa ʼi te kele pea mo kamata fakamālōlō te tagata pea mo fakamaʼa tona nofoʼaga ʼaē ko te kele mai te ʼu fua kovi ʼo te agahala. Koia ʼaki totatou loto katoa, ʼe tou hiva anai: “ ʼE lahi pea mo fakaofoofo tau ʼu gāue, Sehova ʼAtua, te Māfimāfi. ʼE totonu pea mo moʼoni tou ʼu ala, Hau ʼo te heʼegata. Ko ai anai ʼaē ka mole manavasiʼi kia te koe, ʼo mole faka kolōlia ki tou huafa?”
Kei Koutou Manatuʼi Koa?
◻ He koʼe ʼe tau mo Sehova ke tou manavasiʼi kia te ia?
◻ Koteā ʼaē neʼe hā lelei ʼi te ʼu meʼa ʼaē neʼe fakahoko e te ʼAtua ʼi te Tai Kula?
◻ Koteā te ʼu lelei ʼe tou maʼu ʼi tatatou manavasiʼi ʼaki he loto fakaʼapaʼapa kia Sehova?
◻ Koteā te ka haʼu ʼe maʼu anai e nātou ʼaē ʼe nātou manavasiʼi ʼi te temi nei ki te ʼAtua moʼoni?