XAAJ 3
Li ngeen mën a def bu poroblem amee
‘ Nangeen bëggante mbëggeel gu tar, ndax mbëggeel day suul bàkkaar yu bare. ’ — 1 Piyeer 4:8
Yéen ñi door a séy, xam leen ne poroblem dina am. Li ko mën a indi mooy, bokkuleen xalaat, walla yëg-yëg walla gis-gis. Poroblem yi mën nañu bañ a jóge ci yéen walla sax ñu jóge ci lu leen bett.
Lée-lée daw poroblem mooy gën a yomb ci yaw, waaye Biibël bi dafa ñuy xiirtal ñu bañ a def loolu (Macë 5:23, 24). Dingeen gis ne topp santaane Yàlla yi nekk ci Biibël bi mooy pexe bi gën ci seeni poroblem.
1 WAXTAANLEEN CI POROBLEM BI
LI BIIBËL BI WAX : “ Dafa am waxtu ngir . . . wax ” (Dajalekat 3:1, 7, MN). Nangeen fexe ba jël jot ngir waxtaan ci poroblem bi. Waxal ki nga séyal lépp li nga yëg ak li nga xalaat ci mbir mi. Ci lépp, deel “ wax dëgg ” ki nga séyal (Efes 4:25). Bu dee sax poroblem bi dafa bëgg a indi coow, nanga teye sa bopp, bañ a xuloo. Tont bu neex mën na tax waxtaan bu ndaw bañ a àgg ci xuloo bu metti. — Kàddu yu Xelu 15:4 ; 26:20.
Bu dee sax ànduloo ci li muy wax, ba tey àndal ak yar, te bul fàtte mukk won ko mbëggeel te may ko cér (Kolos 4:6). Jéemleen a regle poroblem ci ni mu gën a gaawe, te buleen gedd. — Efes 4:26.
LI NGEEN MËN A DEF :
Tànnleen waxtu bi gën ngir waxtaan ci poroblem bi
Bu ki nga séyal di wax, bu ko dog. Bu paree dinga mën a wax
2 DÉGLUL TE JÉEM A NÀND GIS-GISAM
LI BIIBËL BI WAX : “ Bëgganteleen ak xol bu leer, niy doomi ndey, te farlu ci teralante ” (Room 12:10). Fasoŋ bi ngay dégloo am na solo lool. Jéemal a nànd gis-gisu ki nga séyal te bokk ak moom “ tiis . . . te woyof ” (1 Piyeer 3:8 ; Saag 1:19). Bul def ni yaa ngi déglu fekk dégluwoo. Bu mënee nekk, bàyyil ci li nga jàpp te déglu ko bu baax a baax. Walla nga laaj ko ndax mën ngeen ci waxtaan beneen waxtu. Ki nga séyal, boo ko jàppee ni sa waay, bañ koo jàppe ni sa noon, doo gaaw a gis sa bopp. — Ecclésiaste 7:9.
LI NGEEN MËN A DEF :
Bu ngeen di wax, nanga ubbi sa xel, déglu ko bu dee sax li ngay dégg neexu la
Xool ko bu baax te seet ni muy waxe. Jéemal a nànd li mu la bëgg a wax, bul yem ci li ngay dégg
3 DEFLEEN LI NGEEN WAXANTE
LI BIIBËL BI WAX : “ Kër-këri, jariñu ; waxi neen, loxoy neen ” (Kàddu yu Xelu 14:23). Juboo ci wax rekk doyul. Fàww ku nekk def li ngeen waxante yéen ñaar. Loolu nag mën na jafe lool waaye jar na ko (Kàddu yu Xelu 10:4). Bu ngeen àndee doon benn, dingeen ci gis njariñ bu réy. — Ecclésiaste 4:9.
LI NGEEN MËN A DEF :
Waxleen li ku nekk war a def ngir regle poroblem bi
Lée-lée nangeen toog xool fi ku nekk tollu ci li muy jéem a def