‘Ukufuna Amazwi Amyoli, Amazwi Achanileyo’
“UMHLANGANISI wafuna ukufumana amazwi amyoli nokubhalwa kwamazwi achanileyo enyaniso.” (INtshumayeli 12:10, NW) Hayi indlela anokuba ngaxabiseke ngayo ‘amazwi amyoli nachanileyo’ asekelwe kwiZibhalo eziphefumlelweyo! Afaniswa ‘neelamuni zegolide kwizitya zesilivere,’ abekwe ngobuchule nangokundilisekileyo ngaso nasiphi na isihlandlo ibe axabiseke kunene kwiimeko zokucinezeleka.—IMizekeliso 25:11.
Kumhla wethu uMhlanganisi Omkhulu, uYesu Kristu, uye walungiselela ubuncwane bokomoya obuzuke ngakumbi kunobo babunanditshwa ngabantu bakaThixo ababelawulwa ngookumkani bamandulo bakwaSirayeli. (Mateyu 12:42) Kangangethuba elingaphezu kwenkulungwane, amazwi amyoli nachanileyo enyaniso agubungela zonke iinkalo zobomi aye anikelwa kwiimpapasho zeWatch Tower Society aza asasazwa ngokubanzi ngeelwimi ezininzi. Ngaloo ndlela iintsapho ezininzi nabantu ngabanye baye bakwazi ukuzifumbela kumakhaya abo ithala leencwadi ezineembekiselo ezinokuthenjwa ezisekelwe eBhayibhileni. Ukongezelela koku, inkoliso yamabandla amaNgqina kaYehova inamathala akumgangatho ofanelekileyo okusetyenziswa kwiiHolo zawo zoBukumkani.
Sekunjalo, ukufumana amazwi amyoli nachanileyo ayimfuneko kwimeko ethile kusafuna ukuba kwenziwe uphando. Ikuqonda oku, ukususela ekuqaleni kwembali yayo, iWatch Tower Society iye yapapasha izalathiso ezalatha kwiimpapasho zayo.—Bona ibhokisi kwiphepha 28 nelama-29.
Inkqubo Entsha
Ngonyaka we-1985 kwaqalisa inqanaba elitsha kwimbali yeWatch Tower Publications Indexes. Ii-Index ezisithoba zangaphambili zadityaniswa zaza zenziwa zavisisana kumqulu omnye ogubungela unyaka we-1930 kuse kowe-1985, msebenzi lowo owawunokweziwa ngeminyaka eli-14. Iingenelo zaloo Index engumqulu omnye ogubungela iminyaka emininzi zakhokelela kwinkqubo entsha ngowe-1986, leyo yokupapashwa kweeIndex ezihlanganisa iminyaka ethile ukususela ngoko. Nyaka ngamnye, ngokuqhelekileyo ebudeni beminyaka emine elandelelanayo, incwadana eyi-Index ehlanganisiweyo iya kugubungela unyaka omnye, emibini, emithathu ize ke ibe yiminyaka emine. Kwithuba leminyaka emihlanu i-Index enoqweqwe olulukhuni iya kudibanisa zonke ii-Index ukususela ngowe-1986 kuse phambili, njengeyowe-1986-90, 1986-95, njalo njalo. Ngaloo ndlela, akuyomfuneko ukuba uqwalasele ii-Index ezingaphezu kwezi zintathu: i-1930-1985 Index, i-Index ekhoyo enoqweqwe olulukhuni, nencwadana eyobe isetyenziswa yezalathiso.
I-Index Ilungiselelwe Kucingwa Ngawe
Icandelo lokuqala kwi-Index nganye sisalathiso sombandela. Ekulungiseleleni isalathiso sombandela, kucingwa ngemibuzo emibini: (1) Yiyiphi inkcazelo efanele ibhalwe kwisalathiso? (2) Ubani usenokukhangela phi ukuze afumane loo nkcazelo?
Njengomfundi, ubungayi kufane ube nomdla wokufumana nayo nayiphi na inkcazelo engephi ngombandela othile. Ekubeni ngokuqhelekileyo ukhangela inkcazelo ebalulekileyo okanye esebenziseka ngokwenene, ngulo mbandela ke obhalwayo kwizalathiso. Kodwa akuyomfuneko ukuba lo mbandela ubhalwe ngokweenkcukacha. Kwi-Index kunokubhekiselwa nje kwisivakalisi esinye, njengamazwi abonisa umgaqo woMbutho kulo mbandela. Okanye isenokuquka inqaku lonke, kwanempapasho epheleleyo. Phofu ke, ngokuqhelekileyo isalathiso sikhokelela kwiziqendu eziliqela ezixutyushiweyo.
Into yokuba iimbekiselo zifanele zibonakale phi kwi-Index ibaluleke ngokufanayo, kuba abafundi abacingi ngokufanayo ibe baya kukhangela ngaphantsi kwemixholo eyahlukahlukeneyo. Ngokomzekelo, inkcazelo engeNqaba yaseBhabheli ibonakala ngaphantsi kothi TOWER OF BABEL. Kodwa bambi abafundi basenokukhangela ngaphantsi kothi BABYLON, ARCHAEOLOGY, okanye othi LANGUAGE(S), kuxhomekeka kwinkalo yombandela abanomdla kuyo. Ngenxa yoko, kwenziwa imigudu yokuziphindaphinda iimbekiselo ngaphantsi kwemixholo eyahlukahlukeneyo efanelekileyo, kukhunjulwa ukuba abafundi abalingani ngobudala ibe baneemvelaphi ezahlukahlukeneyo, kwaye baneenjongo ezahlukeneyo.
Indlela I-Index Enokukunceda Ngayo
Njengemaphu i-Index inokukunceda kuphela ukuba uyayisebenzisa. Yintoni ofanele ulindele ukuyifumana kwisalathiso sombandela okanye kwicandelo lesalathiso seZibhalo esilandela emva kweso semibandela?
Iimbekiselo kwicandelo lesalathiso seZibhalo zezemibandela ecacisa iindinyana ngeendinyana. Usenokufumana inkcazelo engemeko amazwi endinyana avakaliswa kuyo, isizathu sokubhalwa kwawo, umntu awayebhekiswa kuye okanye intsingiselo yamazwi okanye amabinzana ngamanye. Umzekelo woku usenokuba sisicelo esikumthandazo kaYesu ongumzekelo: “Ungasingenisi ekuhendweni.” (Mateyu 6:13) Kwakutheni ukuze abekwe ngolo hlobo? Isalathiso seZibhalo siya kukunceda ukuba ukuqonde oko.
Isalathiso semibandela, njengoko negama lisitsho, sisalathiso ngokuyintloko semibandela kunokuba nje ibe ngamazwi okanye amabinzana. Bambi abafundi baye bakufumanisa kunzima ukufumana inqaku elithile abalikhumbulayo xa bezama ukulifuna ngomxholo walo. Le ngxaki isenokubakho xa lingekho igama elikumxholo eliwuchaza ngokuchanileyo umbandela. Umzekelo woku usenokuba linqaku elithi “How much is too much?” elalixubusha ngomphumo wesiselo esinxilisayo. Ukhumbula okwakuqulethwe leli nqaku, usenokutyhila kumxholo othi ALCOHOLIC BEVERAGES okanye othi DRINKING kwi-Index, ibe uya kuyifumana imbekiselo yalo apho.
I-Index inokuba luncedo ngokukhethekileyo ekufumaneni inkcazelo engeengxaki osenokujamelana nazo. Ngokomzekelo, ukuba ungumzali, ngaba maxa wambi uziva ukatyiswa kumgudu wakho wokuqeqesha nokunikela ulwalathiso kubantwana bakho? Phantsi kothi CHILDREN uya kufumana imibandela ebhekisela kuvimba wenkcazelo engokuqonda indlela abacinga ngayo, abavakalelwa ngayo neemfuno zabo. Ukanti, phantsi komxholo othi CHILD TRAINING, kulapho uya kufumana iimbekiselo ezithetha ngokufundisa nokuqeqesha kuzo zonke iinkalo zako.
Maxa wambi iWatch Tower Society ifumana iileta zokucela uncedo lokucombulula iingxaki zomtshato okanye ezinemibuzo emayela nokufaneleka kweendlela ezithile zokubonakalisa uthando emtshatweni. Ngoxa uMbutho usenokukwazi ukunikela impendulo, isiluleko esifanayo esinentsingiselo nesisebenzisekayo sinokufunyanwa ngokutyhila kumxholo othi MARRIAGE, onemixholwana ethi “problems” (iingxaki) nothi “sex” (isini) okanye othi “sexual relations” (iintlobano zesini), uze ukhangele iimbekiselo ezidweliswe apho.
Kwakhona kufunyanwa iincwadi ezivela kwabo badandathekileyo okanye abacinezelekileyo ngokwasengqondweni. Ukhuthazo noncedo olufumaneka ngeposi lusenokufumaneka ngokukhawuleza ngakumbi kwithala lakho leencwadi okanye kwelo likwiHolo yoBukumkani yasekuhlaleni ngokuhlola umxholo othi DEPRESSION nothi MENTAL ILLNESS kwi-Index. Amanqaku acacisa indlela yokuhlangabezana nezigulo zengqondo, unyango olufumanekayo, kubhekiselwe nakumava achukumisayo abo babedandathekile.
Ngaba ungoselula? Usenokuba ucinga nzulu ngomtshato, ubomi bentsapho, isikolo, ulwalamano lwakho nabazali bakho, njalo njalo. Umxholo omkhulu othi YOUTHS uneembekiselo ezalatha kuyo yonke le mixholwana neminye. Ukongezelela koku, imixholo enjengothi RELATIONSHIPS, SCHOOL, CAREER, nothi COURTSHIP inenkcazelo eninzi eyinikelayo. Ukwenzela izincoko zesikolo, i-Index inokukukhokelela kumbandela omhle ongendalo, imibandela engenzululwazi, iziyobisi, ezoqoqosho neminye imibandela emininzi.
Iingenelo Zabantu Babo Bonke Ubudala
Omnye umfazi oneminyaka engama-81 ubudala wabhala oku: “Incwadi namaphephancwadi zingumgodi wegolide wenkcazelo nowamandla okomoya—ibe i-Index ikwembela loo golide.” Omnye umama onabantwana abaneminyaka esibhozo nesithoba ubudala wathi: “Ngoku ndizibuza indlela endaphumelela ngayo ngaphandle kwayo. Iye yandikhokelela ekufumaneni iimpendulo zemibuzo emininzi ebendizibuza yona kangangexesha elide ibe ikwenze kwaba lula ngakumbi ukwenza uphengululo ebudeni bokulungiselela iintlanganiso zebandla. . . . Ndithanda nokunixelela indlela le mpapasho eye yasinceda ngayo kwisifundo seBhayibhile sentsapho. . . . Xa umyeni wam esithi amantombazana mawakhethe oko ebengathanda ukukwenza, ngokufuthi afuna ukwenza uphengululo esebenzisa le Index. Ayakunandipha ukukhetha umbandela anomdla kuwo, njengezilwanyana azithandayo okanye amazwe awahlukahlukeneyo, ibe ayakwazi ukukhangela inkcazelo ngoncedo nje oluncinane. Kwakhona oku kuye kwawafundisa ukuba ukufundisisa iBhayibhile kuluyolo.”
Ukufuna amazwi amyoli namazwi achanileyo enyaniso kunemivuzo engenakulinganiswa nanto. Imigudu yoMhlanganisi yazisa iingenelo ezizuke ngaphezu kwenjongo yakhe yantlandlolo, kuba amazwi anjalo aye abakhuthaza aza abakhokela abakhonzi bakaYehova ukuza kufikelela kulo mhla. Imigudu yethu efanayo ikwazisa intsikelelo kaYehova, nto leyo enokuba nemiphumo kanaphakade.—IMizekeliso 3:13-18, 21-26.
[Ibhokisi/Umfanekiso okwiphepha 28, 29]
Izalathiso Zangaphambili
Ngowe-1902 uhlelo olukhethekileyo lweHolman Parallel Edition Bible lwashicilelwa yiWatch Tower Society, ibe lwaluqulethe izinto eziliqela eziluncedo ezazilungiselelwe nguMbutho. Isihlomelo salo sasinezalathiso zombandela nezeZibhalo ezazisalatha kungcelele lweencwadi ezithi Millennial Dawn (kamva ezathi zaziwa ngokuba ziiStudies in the Scriptures), iincwadana ezimbini ezazibalasele neZion’s Watch Tower, yowe-1879-1901.
IiBerean Bibles zowe-1907 nezathi zalandela kamva zanikela izalathiso ezifanayo. Ezi zathatyathelw’ indawo ngowe-1922 zizalathiso eziqulethe okuninzi ezazisalatha kuzo zonke iimpapasho zoMbutho. Ezi zalathiso zabonakala kwimiqulu yokugqibela esixhenxe yohlelo oluphinde lwashicilelwa lweWatch Tower (lowe-1879-1919). Ukuza kuthi ga kulo mhla ezi zalathiso zamva ziyindlela eyintloko yokufumana umbandela owanikelwa kwiimpapasho zangaphambili zeWatch Tower Society.
Phofu ke, kwiminyaka engama-40 eyalandelayo, uphengululo kwiimpapasho ezakhutshwa emva kowe-1919 lwalumele lwenziwe ngokusetyenziswa kwezalathiso ezahlukeneyo ezikumaphepha okugqibela eencwadi nakwinkupho yokugqibela yephephancwadi yonyaka ngamnye. Kodwa ngowe-1959 uMbutho waqalisa iphulo elikhulu lokulungiselela isalathiso semibandela neZibhalo kumqulu omnye weempapasho zayo zesiNgesi. Kwayilwa iqela elaliquka amalungu abasebenzi kwikomkhulu, abavangeli basemazweni ababephumelele kwiSikolo seBhayibhile seWatchtower saseGiliyadi, kwanabaveleli abahambahambayo besiXeko saseNew York. Emva konyaka onesiqingatha kusetyenzwa ngononophelo ngabasebenzi abazahluleleyo abali-18, iWatch Tower Publications Index yokuqala, enecandelo elinemibandela exutyushiweyo nezibhalo ezicacisiweyo, eyayigubungela iminyaka engama-31 ukususela kowe-1930 kuse kowe-1960, yakhutshwa. Eso salathiso sakhutshwa okokuqala kubaphulaphuli abanemincili ababekwiiNdibano Zabanquli Abamanyeneyo ngowe-1961.
Ukususela ngoko, iWatch Tower Publications Index iye yaveliswa ngesiNgesi nyaka ngamnye, kuze kubekho i-Index eneqweqwe elilukhuni ehlanganisa iminyaka ethile emva kweminyaka emihlanu.