Badala—Qeqeshani Abanye Ukuze Bakwazi Ukuthwala Umthwalo

KUMABANDLA amaNgqina kaYehova ehlabathini lonke, kufuneka ngokungxamisekileyo amadoda anokuba ngabaveleli. Zintathu izizathu ezingundoqo ezibangela kubekho le mfuneko.

Okokuqala, uYehova uzalisekisa isithembiso sakhe sokwenza ‘ophantsi abe luhlanga olunamandla.’ (Isaya 60:22) Ngobubele bakhe obungasifanelanga, kule minyaka mithathu idluleyo kuye kwabhaptizwa abafundi abatsha abamalunga nesigidi baba ngamaNgqina kaYehova. Kufuneka amadoda anokuthenjwa anokunceda aba basandul’ ukubhaptizwa ukuba benze inkqubela babe ngamaKristu aqolileyo.—Hebhere 6:1.

Okwesibini, ngenxa yokwaluphala okanye ubuthathaka bempilo, bambi abebekade bekhonza njengabadala kangangamashumi eminyaka kuye kwanyanzeleka ukuba banciphise umthwalo abanawo ebandleni.

Okwesithathu, ngoku iqela labadala abangamaKristu anenzondelelo likhonza njengamalungu eeKomiti Zokunxibelelana Nezibhedlele, eeKomiti Zokwakha Zenqila okanye eeKomiti ZeeHolo Zendibano. Phantsi kweemeko ezithile bamele balungelelanise izinto ngokuthi banciphise iimbopheleleko abanazo ebandleni.

Kunokuhlangatyezwana njani nemfuneko engxamisekileyo yamadoda afanelekayo angakumbi? Oyena ndoqo kukuqeqesha. IBhayibhile ikhuthaza abaveleli abangamaKristu ukuba baqeqeshe ‘abantu abathembekileyo, abakufanelekeleyo ukufundisa abanye.’ (2 Timoti 2:2) Ngokutsho kwesinye isichazi-magama, isenzi ‘ukuqeqesha’ sithetha ukwenza ubani alungele, afaneleke okanye abe lichule ekwenzeni okuthile. Makhe sihlolisise indlela abadala abanokuwaqeqesha ngayo amanye amadoda afanelekayo.

Landelani Umzekelo KaYehova

Ngokuqinisekileyo uYesu Kristu wayekulungele, efanelekile yaye elichule emsebenzini wakhe—yaye oku akumangalisi nakancinane! Wayeqeqeshwe nguYehova uThixo ngokwakhe. Ngabaphi oothunywashe abenza le nkqubo yoqeqesho yaphumelela? UYesu wakhankanya abathathu, njengoko bebhaliwe kuYohane 5:20: “UYise [1] unomsa kuNyana kwaye [2] umbonisa zonke izinto yena azenzayo, yaye uya kumbonisa [3] imisebenzi emikhulu ngakumbi kunale.” Ukuhlolisisa uthunywashe ngamnye kwaba kuya kusikhanyisela ngenkqubo yoqeqesho.

Phawula ukuba uYesu waqala wathi: “UYise unomsa kuNyana.” Ukususela ekuqaleni kwendalo, uYehova noNyana wakhe babengabahlobo abasenyongweni. IMizekeliso 8:30 iyasikhanyisela ngolwalamano lwabo xa isithi: “Ngoko [mna Yesu] ndandisecaleni kwakhe [uYehova uThixo] njengomsebénzi onobuchule, yaye wayendithanda ngokukhethekileyo imihla ngemihla, ndichulumanca phambi kwakhe amaxesha onke.” UYesu wayeqinisekile ukuba uYehova ‘wayemthanda ngokukhethekileyo.’ Yaye uYesu akazange alufihle uvuyo awayenalo ngoxa wayesebenza noYise. Hayi indlela entle ngayo into yokuba abadala abangamaKristu babe ngabahlobo abasenyongweni nabo babaqeqeshayo!

Uthunywashe wesibini owakhankanywa nguYesu kukuba uYise “umbonisa zonke izinto yena azenzayo.” La mazwi avumelana noko kuthethwa kwiMizekeliso 8:30, athi uYesu ‘waba secaleni’ koYehova ngoxa kwakudalwa indalo. (Genesis 1:26) Abadala banokulandela lo mzekelo usemagqabini ngokusebenza ngokusondeleyo nezicaka zolungiselelo, bezibonisa indlela yokwenza umsebenzi wazo ngokuphumelelayo. Noko ke, asizozicaka zolungiselelo ezisandul’ ukumiselwa kuphela ezifuna uqeqesho oluqhubekayo. Kuthekani ngabazalwana abathembekileyo abebekade bezabalazela ukufaneleka njengabaveleli kangangeminyaka emininzi kodwa abangazange bamiselwe? (1 Timoti 3:1) Abadala bamele bawacebise ngokungqalileyo amadoda anjalo ukuze azazi iinkalo amele aphucule kuzo.

Ngokomzekelo, kusenokwenzeka ukuba isicaka solungiselelo esithile sithembekile, sifika ngexesha ezintlanganisweni yaye sikhuthele emsebenzini waso. Kwakhona kusenokwenzeka ukuba sinobuchule bokufundisa. Yaye kusenokwenzeka ukuba kwiinkalo ezininzi senza umsebenzi omhle ebandleni. Noko ke, kusenokwenzeka ukuba singqwabalala xa siqhubana namanye amaKristu. Abadala bamele babonakalise ‘ubulali bobulumko’ kule meko. (Yakobi 3:13) Ngaba ibingayi kuba bububele ukuba umdala athethe neso sicaka solungiselelo, asibonise ngokucacileyo ingxaki, asinike imizekelo engqalileyo aze asicebise ngendlela esinokuphucula ngayo? Ukuba ngenyameko umdala ‘usinonga ngetyuwa isiluleko sakhe,’ ngokufuthi icebiso lakhe liya kwamkeleka. (Kolose 4:6) Kakade ke, isicaka solungiselelo siya kuwenza ube lula umsebenzi womdala xa sithetha ngokuphandle yaye siliphulaphula icebiso elinikelwayo.—INdumiso 141:5.

Kumabandla athile, abadala bayaqhubeka benikela uqeqesho olusebenzisekayo kwizicaka zolungiselelo. Ngokomzekelo, bahamba nezicaka zolungiselelo ezifanelekayo xa betyelela abagulayo okanye abalupheleyo. Ngale ndlela izicaka zolungiselelo zizuza amava kumsebenzi wokwalusa. Kambe ke, zininzi izinto isicaka solungiselelo esinokuzenza ukuze sikhule ngokomoya.—Bona ibhokisi engezantsi enomxholo othi “Okunokwenziwa Zizicaka Zolungiselelo.”

Uthunywashe wesithathu owenza uqeqesho lukaYesu lwaba yimpumelelo kukuba uYehova wamqeqesha ecinga ngenkqubela yexesha elizayo. UYesu wathi uYise wayeza kubonisa uNyana “imisebenzi emikhulu ngakumbi kunale.” Amava uYesu awaba nawo ngoxa wayelapha emhlabeni amnceda waba neempawu azifunayo ukuze asingathe izabelo zexesha elizayo. (Hebhere 4:15; 5:8, 9) Ngokomzekelo, hayi indlela esikhulu ngayo isabelo aza kuthi kungekudala uYesu asifumane—eso sokuvusa nokugweba amawaka ezigidi zabantu abafileyo ngoku!—Yohane 5:21, 22.

Namhlanje, xa abadala beqeqesha izicaka zolungiselelo bamele bacinge ngeemfuno zexesha elizayo. Ngoxa kunokubonakala kukho abadala nezicaka zolungiselelo ezaneleyo zokunyamekela iimbopheleleko ezikhoyo ngoku, kuya kwenzeka ntoni xa kusekwa ibandla elitsha? Kuya kuthekani xa kusekwa amabandla angakumbi? Kule minyaka mithathu idluleyo, bekukho amabandla amatsha angaphezu kwama-6 000 ehlabathini lonke. Hayi indlela abafuneka ngayo abadala nezicaka zolungiselelo zokunyamekela loo mabandla matsha!

Badala, ngaba nilandela umzekelo kaYehova wokuhlakulela ubuhlobo obusenyongweni namadoda eniwaqeqeshayo? Ngaba niyawabonisa indlela yokwenza umsebenzi wawo? Ngaba niyacinga ngeemfuno zexesha elizayo? Ukulandela umzekelo kaYehova xa wayeqeqesha uYesu kuya kubangela ukuba abaninzi bafumane iintsikelelo ezongezelelekileyo.

Ningoyiki Ukunika Abanye Iimbopheleleko

Abadala abafanelekayo abaqhele ukusingatha izabelo ezinzima ezininzi banokuba madolw’ anzima ukunika abanye igunya. Kusenokwenzeka ukuba ekuqaleni bakha bazama ukwenjenjalo kodwa izinto azahamba kakuhle. Ngoko banokuba nesimo sengqondo sokuba, ‘Xa ufuna umsebenzi wenziwe kakuhle, kubhetele uzenzele.’ Kodwa ngaba esi simo sengqondo siyavumelana nokuthanda kukaYehova, njengoko kuchazwe eZibhalweni, ukuba amadoda angenamava aqeqeshwe ngalawo anamava?—2 Timoti 2:2.

Umpostile uPawulos wadana kakhulu xa elinye lamaqabane awayehamba nawo, uYohane Marko, lashiya isabelo salo ePamfiliya laza labuyela ekhaya. (IZenzo 15:38, 39) Noko ke, uPawulos akazange avumele oku kusilela kubangele ukuba angabaqeqeshi abanye. Wakhetha omnye umzalwana omncinane, uTimoti, waza wamqeqesha kumsebenzi wobuvangeli basemazweni.a (IZenzo 16:1-3) Abavangeli basemazweni bajamelana nenkcaso eqatha eBhereya kangangokuba uPawulos wayengenakukwazi ukuqhubeka elapho. Ngoko walishiya eli bandla litsha phantsi kweliso likaSilas, umzalwana oqolileyo onamava, kunye noTimoti. (IZenzo 17:13-15) Ngokungathandabuzekiyo uTimoti wafunda okuninzi kuSilas. Kamva, xa uTimoti wayekulungele ukusingatha iimbopheleleko ezongezelelekileyo, uPawulos wamthumela eTesalonika ukuze aye kuqinisa ibandla lalapho.—1 Tesalonika 3:1-3.

Ulwalamano lukaPawulos noTimoti yayingelolwalamano nje lwabantu abaqheleneyo abangenazimvakalelo omnye ngomnye. Babenolwalamano olusenyongweni. Xa wayebhalela ibandla laseKorinte, uPawulos wabhekisela kuTimoti, awayeceba ukumthumela apho, ‘njengomntwana wakhe oyintanda nothembekileyo eNkosini.’ Wongezelela ngelithi: “[UTimoti] uya kunikhumbuza ngeendlela zam ezingoKristu Yesu.” (1 Korinte 4:17) UTimoti walwamkela uqeqesho alufumana kuPawulos, waza wazisingatha ngokufanelekileyo izabelo zakhe. Abazalwana abaselula abaninzi baye baba zizicaka zolungiselelo ezinobuchule, abadala okanye abaveleli abahambahambayo ngenxa yokuba baye bangenelwa kuqeqesho abalufumana kumadoda akhulileyo anenkathalo awaba nomdla kubo, njengoko uPawulos wenjenjalo ngoTimoti.

Badala, Qeqeshani Abanye!

Ngokungathandabuzekiyo, isiprofeto esikuIsaya 60:22 siyazaliseka namhlanje. UYehova wenza “omncinane uhlanga olunamandla.” Ukuze olo hlanga luqhubeke ‘lunamandla,’ lumele lulungelelaniswe kakuhle. Badala, kutheni ningahlolisisi iindlela zokunikela uqeqesho olungakumbi kumadoda azinikeleyo akufanelekelayo ukulufumana? Qinisekani ukuba isicaka solungiselelo ngasinye siyazazi iinkalo esimele siphucule kuzo ukuze senze inkqubela. Yaye nina bazalwana ababhaptiziweyo, yisebenziseni kangangoko ninako ingqalelo yobuqu eniyifumanayo. Wasebenziseni amathuba okwandisa ubuchule, ulwazi kunye namava enu. Ngokuqinisekileyo uYehova uya kuyisikelela loo nkqubo yoncedo inothando.—Isaya 61:5.

[Umbhalo osemazantsi]

[Ibhokisi ekwiphepha 30]

Okunokwenziwa Zizicaka Zolungiselelo

Ngoxa abadala bemele baqeqeshe izicaka zolungiselelo, kuninzi okunokwenziwa zizicaka zolungiselelo ukuze zenze inkqubela yokomoya.

—Izicaka zolungiselelo zimele zikhuthale yaye zithembeke xa ziphumeza izabelo zazo. Kwakhona zimele zibe nemikhwa emihle yokufundisisa. Ukusa kumlinganiselo othile, inkqubela ixhomekeke ekufundeni nasekusebenziseni izinto ezifundiweyo.

—Xa isicaka solungiselelo silungiselela ukunikela intetho kwintlanganiso yamaKristu, simele singabi madolw’ anzima ukucela umdala ofanelekayo ukuba asicebise ngendlela yokunikela loo ntetho.

—Kwakhona isicaka solungiselelo sinokucela umdala ukuba ajonge indlela esiyinikela ngayo intetho yeBhayibhile aze asicebise ukuze siphucule.

Izicaka zolungiselelo zimele zifune, zamkele zize zisebenzise icebiso labadala. Ngale ndlela, ukuhambela phambili kwazo kuya ‘kubonakala ebantwini bonke.’—1 Timoti 4:15.