Ukungavisisani Nabantu Basebukhweni Okanye Abasemzini Ekukudala Kukho
‘‘NDIDINIWE nguwe!” wangxola watsho uFujiko ethetha noninazala, uTomiko. UFujiko wayediniwe kukuxelwa le naleya. Nangona wayekwazi ukuzigcina ezolile ngokwendlela awayekhangeleka ngayo ngaphandle, wayebandezelekile. Uthi, “Ndandiziva ndibuhlungu. Ndandingendim kakuhle. Ndandingenakukunyamezela ukuphila ngolo hlobo yonke imihla.”
Umfazi okhulileyo ohlala yedwa eJapan uyachaza: “Ndalahlwa kwesinomhlwa ngunyana wam nomkakhe. Ngoku akuyomfuneko ukuba ndizikhathaze ngabanye, ibe ndiphila ngendlela endifuna ukuphila ngayo, kodwa ndiye ndizive ndililolo xa kutshona ilanga.”
Ukungavisisani kukamamazala nomolokazana wakhe kuyinto ekukudala ikho kulo lonke ihlabathi. UDulcie Boling, umhleli wephephancwadi eOstreliya, uyaphawula, “Ngokulusizi, bambi abafazi baya kusoloko bebakhweletela oomolokazana babo. . . . Akukho nto onokuyenza, ngaphandle kokuzama ukunyamezela ungakhalazi.” Kumazwe aseMpumalanga, kukwakho namabali angabafazi abakhulileyo abashiywe ezintabeni, isenzo esiphenjelelwa ngoomolokazana babo.
Namhlanje, oku kungavisisani kuyinto enzima ngakumbi kunanini na ngaphambili. Ngokwamanani, iminyaka umntu alindele ukuba angayihlala iyanda, iintsapho ziyancipha, ibe umsantsa phakathi komlinganiselo wenani lamadoda nabafazi abambatha ingubo kaqaqaqa uyanda. Ube yintoni umphumo? Njengoko abafazi abangakumbi bephila baze bafikelele kwiminyaka yabo yama-70 neyama-80, ukungavisisani koomama noomolokazana babo kuye kwanjengogqatso lweembaleki kusukuzwano olude noluqobayo, kungelulo olweemitha ezili-100 njengoko bekusakuba njalo.
Yintoni Efunwa Ngabantu Abakhulileyo?
Phezu kwako nje ukungavisisani okunjalo, yiyiphi indlela abebenokufuna ukunyanyekelwa ngayo abazali abakhulileyo ukuba bekuya kufuneka bekhethile? Abaphengululi ababhala nabafunda ngamanani abantu abazelweyo, abagulayo nabafayo, uJacob S. Siegel noCynthia M. Taeuber bathi, “Kwiminyaka engamashumi amabini edluleyo, abafazi namadoda bebengatyekelanga kangako ekuhlaleni nabanye abantu xa ubani ebengasenalo iqabane lomtshato.” UElaine M. Brody, owayesakuba ngumalathisi weSebe Leenkonzo Zoluntu, wongezelela ngelithi eUnited States, “ukuhlala kwindawo eyahlukileyo kuleyo yezalamane zikabani kulilungiselelo elikhethwayo ngabantu abakhulileyo.” Ngokufuthi, abantwana babo bahlala kufutshane, bayabatyelela baze babanyamekele.
Abantu abahlala kumazwe aseMpumalanga bakhetha ukwenza ngenye indlela. Ngokohlolisiso lwezizwe ngezizwe olwenziwa liZiko Lolawulo Nolungelelwano Lwezinto eJapan, abantu abakhulileyo abaninzi baseJapan nabaseThailand bafuna ukuhlala neentsapho zabo. Olu hlolisiso lufumanisa ukuba ama-61 ekhulwini abantu abakhulileyo baseThailand nama-51 ekhulwini abaseJapan ngokwenene enjenjalo.
Kambe ke, olu khetho lukwayinto eqhelekileyo kumazwe aseNtshona. Abazali aboluphele kakhulu okanye abangasakwaziyo ukusuka kwiimandlalo zabo ngokufuthi bahlala nabantwana babo. EFransi kuyinto eqhelekileyo ngabo bangaphezu kweminyaka engama-75 ubudala abafelwe ngamaqabane abo ukuba bahlale nomnye wabantwana babo.
Ukwamkela Iingenelo Kwaneengxaki
Kakade ke, xa izizukulwana ezibini okanye ezithathu zigqiba ekubeni zihlale endlwini enye, kukho iingenelo ezithile. Abantu abakhulileyo baziva benqabiseke ngakumbi ibe bengengomalolo. Isizukulwana esiselula sinokufunda kumava abantu abakhulu, ibe kukwakho neengenelo kwezoqoqosho.
Kwelinye icala, ukuhlala kunye kunokuluphazamisa ulwalamano lwezalamane olusele luphazamiseke kade. Ngokomzekelo, eJapan, apho abazali abakhulileyo bathi ngokwesithethe bahlale noyena nyana wabo mkhulu kunye nentsapho yakhe, ukungavisisani koomama noomolokazana kuyinto ngokuqhelekileyo ekuthethwa ngayo.
Ukuba ujamelene nemeko enjalo, unokwenza ntoni? Kwincwadi yakhe ethi America’s Older Population, uPaul E. Zopf, Omnci., unjingalwazi kwinzululwazi ngoluntu kwiKholeji yaseGuilford, uthi: “Kwanentsapho iyakubangela ukungavisisani nethuba lokulawula ukungavisisani oko. Amandla okulawula ukungavisisani nokusebenzisana ngokunempumelelo namalungu entsapho akhulileyo kusenokuba bubuchule obuphumela nakolunye ulwalamano.”
Ngoko yiba nembono engqalileyo ngalo mcimbi. Ukuba ufunda ukukulawula ukungavisisani kwentsapho, ngokunokwenzeka uya kuba nobuchule ngakumbi ekumelaneni nezinye iimeko ezinzima ngokufanayo. Kwamkele oku njengocelomngeni, ibe uya kuba ngumntu okulungele ngakumbi oku. Makhe sihlolisise iingxaki zokuhlala nabantu basebukhweni okanye abasemzini size sibone indlela iingxaki ezinjalo ekunokuqhutywana nazo ngayo ngokunempumelelo. Ibe kwanaxa okwangoku ungekho phantsi kwelo lungiselelo linjalo, sekunjalo unokungene-lwa ngokuqwalasela imigaqo ebandakanyekileyo.
[Ibhokisi ekwiphepha 20]
Abazali Abangakumbi Kunabantwana
Ngoku, okwesihlandlo sokuqala embalini, ngokutsho komfundi nombhali ngamanani abantu abazelweyo nabafileyo, uSamuel Preston, isibini esitshatileyo esiqhelekileyo sinabazali abangakumbi kunabantwana. Imbambano ezijamelene nayo izibini ezininzi namhlanje yindlela yokulungelelanisa imbopheleleko yazo ekunyamekeleni abazali abane.