Ingxaki Ngekofu

ZIIKOMITYI ezingaphezu kwe-1 500 000 000 ngosuku! Ngokoqikelelo lwakutshanje, lowo ngumlinganiselo wekofu ephungwayo ehlabathini. Oku kuphungwa kangaka kwekofu kuye kwaqhubeka phezu kwazo nje izilumkiso eziphindaphindiweyo zeminyaka ngeminyaka zezazinzulu zokuba amakhendle ekofu ajamelana phantse neengxaki ezininzi, ukususela kwisifo sentliziyo ukusa kweseswekile kwaneentlobo ezahlukeneyo zomhlaza. Ngoko, kutheni le nto bembalwa kangaka abantu abaphunga ikofu abaye bahlukana nayo?

Kwiminyaka engama-40 edlulileyo, izazinzulu ziye zashicilela iingxelo ezingaphezu kwamakhulu amahlanu ezithetha ngemiphumo yokuphungwa kwekofu. Kodwa, noko, ukuza kuthi ga ngoku izigqibo zabo azikapheleli. Ngoba? Phakathi kwezinye izinto, ikofu intsonkothe ngakumbi kunokuba ibonakala. Ikomityi nganye yekofu isenokuba inemichiza yemvelo engamakhulu amahlanu. Kanti, ubukhulu becala uphengululo belujoliswe nje kwisithako esinye, icaffeine (umchiza osekofini) evuselelayo.

Kwabanye abantu, icaffeine inokubangela ukungalali nesicaphucaphu okanye kube nzima ukuzikisa ingqondo. Kodwa kuthekani ngomhlaza? Iphephancwadi labathengi iWhich? linikela le ngxelo: “Phantse kuphengululo ngalunye olubonakalisa unxibelelwano olukhoyo [phakathi kwecaffeine nomhlaza], kukho olunye olufumanisa okuphikisana noko.” Ngoko, ayimangalisi kangako into yokuba ingxelo yengcali yekofu eLondon isithi ebantwini ngokubanzi, akukhange kubekho “kuguquka kwemeko yempilo kuba ubani ekuyeke ngokupheleleyo ukuphunga ikofu.” Ngapha koko, abaninzi bayazi ukuba iti, ikoko, kwanezinye iziselo ezibandayo zinayo icaffeine. Enyanisweni, iphephancwadi iWhich? liphawula ukuba “kwizixa ezilinganayo, eseti nesekofu, iti iqulatha icaffeine eninzi kunekofu, kodwa ngokuqhelekileyo, kusetyenziswa isixa esincinane ekwenzeni ikomityi yeti.”

Sekunjalo, kukho izilumkiso ezimbalwa amakhendle ekofu angathanda ukuziphawula. Kutshanje iThe Times yaseLondon iye yacaphula oko kuye kwafunyaniswa ngokuphuma kwingxelo yesiDatshi: “Ukuphunga ikofu eyenziwe ngokuxuba ngokuthe ngqo amanzi abilayo neenkozo zekofu kunokuwandisa umlinganiselo wecholesterol emzimbeni nge-10 ekhulwini, xa kuthelekiswa nokuphunga ikofu ehluziweyo okanye ungayiphungi konke konke.” Icholesterol idume ngokufak’ isandla kwisifo sentliziyo. Kwenye inkupho, iThe Times yacaphula ingcali yezezidlo yaseBritani njengethi: ‘Amakhendle ekofu afanele asoloko ephunga ikofu eyenziwe ngeso sihlandlo aze akuphephe ukuphu-​nga ikofu ephinde yafudunyezwa okanye engahluzwanga.’

Ukuba kukho into iingcaphephe ezivumelana ngayo ngokuphathelele ukuphunga ikofu, loo nto bubungcathu. Ngokuqhelekileyo oogqirha badla ngokuncomela ukuba abantu abafanele baphunge iikomityi zekofu ezingaphezu kwezintandathu (okanye iimagi ezine) ngosuku. Abo baneengxaki zempilo ezinjengesifo sentliziyo okanye sezintso nokuba luxinzelelo lwegazi bafanele baphunge ngaphantsi koko. Yaye abafazi abakhulelweyo okanye abo bancancisa abantwana babo bafanele bangaphungi ngaphezu kwekomityi enye ngosuku.