Indibano Yabagcini Bengqibelelo Benkulungwane Yamashumi Amabini!
IMFAZWE yalungiselelwa isaqala ngqa imbali yabantu. Kwaqhambuka imvukelo kummandla wokomoya nakummandla wabantu, ibe nokulunga kolongamo loMdali kwacelw’ umngeni! Oku kwavelisa imbambano engokuziphatha eyabandakanya umbuzo othi, Ngaba abo basanyanisekileyo kuYehova uThixo babeya kuluphakamisa ulawulo lwakhe ngokugcina ingqibelelo yabo kuye?—Genesis 3:1-24; Eksodus 9:16; Luka 22:31.
USathana uMtyholi uye wenza isityholo sobuxoki sokuba abanquli bakaYehova bamkhonzela nje ingenelo yokuzingca yaye abenjinjalo ngenxa yothando. (Yobhi 1:1—2:10) Kanti, baye bahlala benyanisekile kuThixo phezu kwayo nje imigudu kaSathana neyehlabathi lakhe elibachasileyo ukuba baphule ingqibelelo yabo. (Hebhere 11:4-38; ISityhilelo 12:10-17) Ukuze ishukumisele abakhonzi bakaYehova benkulungwane yama-20 ukuba baqhubeke bethembekile, iWatch Tower Society iye yalungiselela ungcelele lweendibano “Zabagcini Bengqibelelo” zamaNgqina kaYehova ukuba ziqhutywe kwiindawo ezininzi, ukususela ekuqaleni kwehlobo (lomntla welkhweyitha) lo we-1985. Suku ngalunye lwabalaselisa umxholo weBhayibhile ofanelekileyo.
“Ukuhamba Engqibelelweni”
Lo mxholo wosuku lokuqalisa iindibano wavuselela umdla kwizinto zokomoya. Intetho ethi “Yivani, Bantu Bam, ILizwi LikaYehova” yatshayelela ngokubakhumbuza ukuba bonke banikele ingqalelo enenyameko. Ukungqina ubulumko bolo ncomelo yaba yintetho kasihlalo, ethi “Ingqibelelo Mayisilondoloze.” Ingqibelelo ikwenza njani oko? Ingqibelelo ifuna ukuba sizinikele ngokupheleleyo kuThixo, sigcina intliziyo, iintshukumisa nothando lwethu lunyulu. Usihlalo wathi: “Ukuba esi sisigqibo sethu, ngoko ke, ingqibelelo yethu iya kusilondoloza.”—INdumiso 25:5; 31:23.
Ngokulandelayo saye ‘Sakhuthazwa nguMzekelo Wabagcini Bengqibelelo Abacikidiweyo.’ Emva kokubhekisela kwimizekelo ekhuthazayo yexesha elidlulileyo, isithethi saye sadlan’ indlebe nabagcini bengqibelelo abangumzekelo bexesha lethu. Abo balondoloza ingqibelelo ‘abanazintloni ngeendaba ezilungileyo.’ Le ntetho, isekelwe kuMarko 8:38, yenza kwacaca ukuba ukuzibonakalisa kwethu ngokungenazintloni kubulungiseleli bethu, kumsebenzi wethu wempangelo, nakwezinye iindawo kuyinkuselo. ‘Ibe hayi indlela ekuya kuba yinto emangalisayo ngayo xa uYesu ethetha phambi kwezithunywa zamazulu nakuYise, evakalisa ukuba singabafundi bakhe abaye bahamba engqibelelweni!’
“Izinto Ezityhilekileyo Zezethu Nezoonyana Bethu” leyo yayiyimbalasane yocwangciso eyayibonisa ukuba, njengoBawo oluthando, uYehova uyakuvuyela ukutyhilela abantu bakhe “izinto ezisitheleyo.” (Duteronomi 29:29; Amosi 3:7) Ukuzifundisisa ngenkuthalo ezi zinto zityhiliweyo kuya kusixhobisa ukuze sikwazi ukuyigcina ngokuqinileyo ingqibelelo yethu. Umxholo olandelayo owawusithi, ‘Ukuyoliswa LiLizwi LikaYehova,’ wagxininisa ingongoma yokuba amaNgqina kaYehova amele abe ngabafundi beBhayibhile. (INdumiso 1:1, 2) Eneneni, “ufundisiso yinxalenye yobomi bomKristu ngamnye ohamba engqibelelweni.”
“Ukuqiqa NgeZibhalo” yindlela esetyenziswa ngabagcini bengqibelelo ekuqhubaneni neentlobo ezahlukahlukeneyo zabantu abashumayela kubo. Ngokomzekelo, kwindlu yesikhungu eTesalonika, umpostile uPawulos ‘waxoxa nawo [eqiqa ngeZibhalo, NW], ethabathela eZibhalweni etyhila, ebeka phambi kwawo ukuba uKristu ubemelwe kukuva ubunzima.’ Ngaba waphumelela uPawulos? Ewe, kuba bambi babaphulaphuli bakhe baba ngamakholwa. (IZenzo 17:1-4) Ngaba ababeze endibanweni babengaluxabisa uncedo lokuphendula imibuzo abahlangabezana nayo kubulungiseleli babo? Okunjani kona ukuchulumanca ngokulufumana xa isithethi sakhupha incwadi ephathwayo entsha yobulungiseleli basentsimini, ethi Ukuqiqa NgeZibhalo!
“Ulungise Ukulahlula ILizwi Lenyaniso”
Ngosuku lwesibini, kwakuchwayitisa ukubona oovulindlela abaninzi kangako—abangamawaka kwiindibano ezithile—besima ngokucelwa sisithethi, benikela ubungqina bokuba zizihlwele ezinesabelo kubulungiseleli bexesha elizeleyo. Kule nxalenye, ithi “Zamani Ngamandla Ukungena Kwinkonzo Yexesha Elizeleyo,” kwagxininiswa into yokuba ubuvulindlela buwufanele umgudu, nakubeni kufuneka ukulwa ekubeni nesabelo kulo msebenzi.—Luka 13:24.
Intetho engumxholo, ethi, “Vuyisa Intliziyo KaYehova Ngokugcina Ingqibelelo,” yayisekelwe kwiMizekeliso 27:11. Le ntetho yangena nzulu kuvimba wobutyebi beLizwi likaThixo yaza yaphuma nobu buncwane: ‘Ingqibelelo yokwenene ithetha ukuzinikela komntu okungenakwaphulwa—kuYehova uThixo.’ “USathana useyinkokeli ethwel’ itshoba ekwaphuleni ingqibelelo,” imvukelo yakhe yaphakamisa “imbambano yokulunga kolongamo lukaThixo.” “Nangona ulongamo lukaYehova lungaxhomekekanga ekugcineni ingqibelelo kwezidalwa zakhe, imvukelo kaMtyholi yenza ukuba umbuzo ongengqibelelo yomntu kulongamo lukaThixo ube ngobaluleke gqitha kwimbambano yolongamo lwendalo iphela.” Isithethi sabuza sathi: “Kunokwenzeka njani ukuba soyise njengabagcini bengqibelelo?” “Sinokwenjenjalo ngenxa yokuba sithobela iLizwi likaThixo,” saphendula ngelitshoyo.—Roma 14:8.
Ukubeka izilangazelelo zokomoya kuqala ebomini yayingumongo wentetho elandelayo, “Intsikelelo KaYehova—Yiyo Etyebisayo.” Sancedwa ukuba siqonde ngokuzele ngakumbi ukuba ngoxa imali isebenziseka, ukuthanda imali kunokuba yingozi esa engcwabeni. (INtshumayeli 7:12; 1 Timoti 6:10) Kukuthembeka okuzisa intsikelelo kaYehova, ubutyebi bokwenyaniso.—IMizekeliso 10:22.
Umdlalo othi “Ikamva Lakho—Lilucelomngeni” wathelekisa ikhondo labagcini bengqibelelo abangamaNazarites [abazahluleyo] nocelomngeni abajamelene nalo abaselula abangamaNgqina kumnqweno wabo wokuba ngoovulindlela baze bahlale kwinkonzo yexesha elizeleyo kunokuxhinela usukelo lwezinto eziphathekayo. Wabongoza abaselula ukuba bamkele ucelomngeni baze bamkhonze ngokuzeleyo uThixo. Lo mdlalo wakwacacisa indlela abazali nabanye abanokuba luncedo ngayo.
Intetho ethi ‘Hlwayela Intabalala, Uvune Intabalala’ yacacisa ukuba umgaqo othi ‘Sivuna oko sikuhlwayeleyo’ ngowobulumko, uthe tye, yaye ngowothando. Ngokuxelisa uThixo, uKristu, ‘nomkhonzi othembekileyo,’ siya kuhlwayela intabalala ngokuza kwiintlanganiso, ngokuthandaza, ngokunikela ubungqina, nakulo lonke ulwalamano lwentsapho. (Mateyu 24:45-47) Ukuhlwayela okunjalo kusiqinisekisa ngokuvuna iintsikelelo zikaYehova.—Hebhere 6:10.
Ebudeni bentetho ethi “Indlela Yokuphendula Bonke Ngabanye,” abaphulaphuli banikela ingqalelo epheleleyo kumacebiso nakwimiboniso engendlela yokusebenzisa incwadi entsha ethi Ukuqiqa NgeZibhalo. Okwagxininiswayo kwaba yimfuneko yokoyisa ukungakhathali ngokusebenzisa iintshayelelo ezifanelekileyo, ukuze kubangelwe intsabelo entle xa kukho inkcaso kodwa iyeyokunyaniseka nokubonisa ukuba iBhayibhile ingumthombo weempendulo zethu.—Kolose 4:6.
Emva kwentetho yokugqibela yosuku lwesibini, ethi “Ukuvakalisa Imisebenzi KaYehova Emangalisayo,” saxakeka sisenza oko kanye ngokuba nesabelo kubulungiseleli basentsimini. Kanye ngaloo njikalanga iNgqina elalihamba kwindlu ngendlu eVancouver, eKhanada, ladibana nenkcaso: “Ukuba uThixo nguThixo wothando, kutheni le nto evumele ubungendawo?” Impendulo enikelwe kwincwadi entsha ethi Ukuqiqa yamanelisa lowo wayebuza, yaye saqaliswa ngoko nangoko isifundo seBhayibhile.
“Ukungabi Nakusoleka Esazulwini Sesizukulwana Esigwenxa”
Lo yayingumxholo oxhokonxa ingcinga wosuku lwesithathu. Ngaloo ntsasa, intetho ethi “Ukubeka UYehova Ngezinto Zethu Ezixabisekileyo” yagxininisa ukuba ubomi bethu bokuzahlulela, ulwalamano lwethu olusondeleyo noYehova yaye umzimba wethu, ingqondo, ubumoya, nokuphathekayo xa kukonke kuzizinto ezixabisekileyo esimele simbeke ngazo uBawo wethu wasezulwini.—IMizekeliso 3:9, 10.
Intetho ethi “Ukuzuza Amandla, Singatyhafi” yanikela uyalelo olusexesheni lokusinceda ukuba sixhathise izilingo zikaSathana zokwaphula ingqibelelo yethu ngamathandabuzo, ngokulahlekelwa lukholo, ngokuthanda izinto eziphathekayo, ngezilingo neentlobo ezahlukahlukeneyo zokusityhafisa. Ukufundisisa, ukucamngca, umthandazo, ukuya ezintlanganisweni, nokuba nenxaxheba ngokuthe rhoqo ekushumayeleni uBukumkani kuziindlela eziqinisekileyo zokudimbaza kuMthombo ohlal’ umpompoza amandla, uYehova.—Isaya 40:28-31.
Ingongoma ephambili kwintetho ethi “Ukuphilela Ukuthanda KukaThixo Namhlanje Kuse Ephakadeni” yayikukuba ukuba ngonesimo sengqondo sikaKristu, siya kuthi ‘singabi saphilela iinkanuko zabantu, siphilele ukuthanda kukaThixo.’ (1 Petros 4:1, 2) UYesu akazange avumele nayiphi na inkanuko yabantu ukuba imtyekise kwikhondo elinjalo. Amalungu obhaptizo ayengawona ayeyiphulaphule ngengqalelo intetho elandelayo enomxholo othi “Ukuthelela Abagcini Bengqibeleio BakaYehova.” Baxelelwa ukuba inyathelo lobhaptizo lisisiqalo nje kuphela sogqatso lwabo lokugcina ingqibelelo. Ukuze babaleke kakuhle kufuneka bewasebenzisile amalungiselelo anjengomthandazo, iLizwi likaThixo, iimpapasho zamaKristu, nokunxulumana ngokukhutheleyo nebandla. Amalungu obhaptizo aphakama ukuze aphendule imibuzo emibini ebonisa enoba ayeliqonda na inyathelo elibalulekileyo awayelithabatha. Ukubhaptizwa kwawo ngamanzi kwalandela, maxa wambi bebukelwe ngabanye abantu ababeze endibanweni.
Ngaloo njikalanga, intetho ethi “Ngaba Ukoyika UYehova Kuphezu Kwethu?” yagxininisa ukuhlonela uMongami Wendalo Iphela. (IMizekeliso 8:13) UKumkani uYehoshafati wakwaYuda owayemoyika uThixo noYehoshafati Omkhulu ohlaliswe etroneni ngoku, uYesu Kristu, bafana ngale ndlela: ukulugcina lucocekile unqulo (1 Kumkani 22:16; Malaki 3:1-18); ukukhusela inkululeko yonqulo (2 Kronike 17:1, 2, 12-19; Filipi 1:6, 7); ukucwangcisela ukufundisa abanquli bokwenyaniso (2 Kronike 17:7-9; Mateyu 28:19, 20); nokumisela iinkundla zomthetho wolawulo lobuthixo ukuze kuphunyezwe okusesikweni.—2 Kronike 19:6, 7; 1 Korinte 6:5, 6.
Inxalenye ethi “IZibhalo Ziluncedo Ekululekeni” yalatha indlela iBhayibhile esinceda ngayo ukuba siphile ubomi obulungeleleneyo nokubonakalisa intlonelo ngentlangano, abaveleli abamiselweyo, nabakhulileyo. Kwinxalenye elandelayo, ethi “Zimisele Ukukhonza UYehova Ngentliziyo Epheleleyo,” sachukunyiswa yimfuneko yokuba nentliziyo yokomfuziselo ephilileyo, leyo igcinwe imanyene—igqibelele—enkonzweni kaYehova.—1 Kronike 28:9.
Kodwa kuthekani ngeliso? Isithethi esilandelayo saphendula umbuzo othi, “Njengelungu Lentsapho, Ngaba Iliso Lakho ‘Alinakumbi’?” Ekubeni uSathana esebenzisa izinto ezininzi ukuphazamisa iliso lethu lokomoya, kuyinto ebalulekileyo ukuba oobawo abangamaKristu, oomama, nabantwana balondoloze imbono elungeleleneyo baze bazibeke kuqala izilangazelelo zoBukumkani. (Mateyu 6:33) Imfuneko yokugqala uMlungelelanisi Omkhulu ngokubonakalisa intlonelo kubadala abamiselweyo nakwibandla yagxininiswa kwintetho elandelayo, ethi “Ukuyilandela Ngenyameko Imiyalelo KaKumkani.”—IMizekeliso 8:32-36.
Okwakusencotsheni ngolo suku kwaba yintetho ethi “Ukugqibelela Enyanisweni Kwihlabathi ElingenaThixo.” Phakathi kwezinye izinto, umKristu umele alondoloze ingqibelelo kwinyaniso ngokukhusela imfundiso yendalo eseBhayibhileni nangokuziphuthisa iingcingane zokungahloneli Thixo. Abaphulaphuli bachwayitiswa kukukhutshwa kwencwadi enamaphepha angama-256 ewuphendula gca umbuzo ophakanyiswa ngumxholo wayo, othi Life—How Did It Get Here? By Evolution or by Creation? Iluncedo kangakanani le mpapasho? Owayesakuba ngokholelwa kwindaleko, oliNgqina ngoku eSweden, ngobo busuku wayifunda yonke le ncwadi waza wathi: “Ukuba bendingokholelwa kwindaleko izolo, ngokuqinisekileyo bendiya kuyiguqula ngobo busuku ingqondo yam.”
“Ukulondoloza Ihambo Entle Phakathi Kweentlanga”
Lo yayingumxholo wosuku lokugqibela lwendibano. Enye yeentetho ezanikelwa ngaloo ntsasa yaphendula umbuzo othi “Yintoni Na Eya Kukwahlula Eluthandweni LukaThixo?” Sithi sodwa abanokuzahlula kuthando lukaThixo nolukaKristu. Kodwa lo gama silondoloza ukholo lwethu, akukho ngcinezelo, kungekho meko, kungekho mchasi unokwenza ukuba uThixo ayeke ukusithanda.—Roma 8:35-39.
Intetho ethi “Ningazanyazanyiswa Kwakamsinya, Nahlukane Nengqiqo” yagxininisa imfuneko yokukhusela indawo yethu kwiparadisi yokomoya. Njani? Ngokuyinxenye, ngokuphepha umoya wokukhalaza nangokuxhathisa uwexuko, ngaloo ndlela sinamathela kwisiluleko sikaPawulos esithi ‘ningazanyazanyiswa kwakamsinya, nahlukane nengqiqo’ ngalo naluphi na udaba oluthethwayo okanye olubhaliweyo olucetyelwe ukuvelisa amathandabuzo luze lonakalise ukholo lwethu.—2 Tesalonika 2:1, 2.
“Moyike UThixo, Usuke Ebubini” lowo yayingumdlalo wesibini onomtsalane. Wayengumgcini-ngqibelelo uYobhi ibe wabonakalisa ukuba intshutshiso nokuva ubuhlungu ngenxa yokukhonza uThixo asinto intsha. Phezu kwayo nje imigudu eyenziwayo yokusityekisa, njengoYobhi simele sizimisele ukubambelela ngokuqinileyo kwingqibelelo yethu, sisoyika uYehova yaye sisuka ebubini.
Intetho yesidlangalala, ethi “Amaxesha Namathuba KaThixo—Alatha Ntoni?” yasikhumbuza ukuba uYehova ‘ebeguzula ookumkani, amise ookumkani’ ngokuvisisana nenjongo yakhe engaguquguqukiyo. Ngoko ke, xa ixesha lakhe lifika uya kuthi ngaphandle kokusilela abuphelise ubungendawo aze abuyisele ubulungisa.—Daniyeli 2:21, 44.
Eneneni iintetho ezimbini zokuqukumbela zazifanelekile. Intetho ethi “Intuthuzelo Kubantu Bengqibelelo” yasichukumisa iintliziyo ngesiqinisekiso sokuba uYehova ngeLizwi lakhe, umoya wakhe, nangokuphendula imithandazo yethu, uya kuthi ngokungasileliyo asizimase kwisilingo. Yaye njengoko yabonisayo intetho yokugqibela, amaNgqina kaYehova akarhoxobisi ngenxa yokuba ephila kweli hlabathi lichasayo. Ndaweni yoko ‘ayiNtlangano Eqhubekayo Negcina Ingqibelelo’! Le ntlangano iphume yodwa ekuxhaseni ulongamo lukaYehova nangokuqiniseka kwayo ngokoyisa nangokusinda.
Phambili Njengabagcini Bengqibelelo!
Ukongezelela kulonwabo lokufumana kwabo okunye ukutya kokomoya okutyebileyo, kuquka iincwadi ezintsha nezintle ezimbini, ababeze endibanweni bachwayitiswa kukukhutshwa kwencwadana enamaphepha angama-32 nenemifanekiso emibalabala ethi Urhulumente Oya Kuzisa IParadisi. Yaye hayi indlela ekwakuluyolo ngayo ukufumana iKingdom Melodies No. 6, yekhaseti yomculo omnandi wokusonwabisa!
Ehlaziyekile yaye esikeleleke gqitha, amalungu achithekayo ngokwenene aba nombulelo ngesi sidlo sokomoya sivuza ngokonakona. Intembelo yethu iye yahlaziywa kukuba Lowo uthe kangangeminyaka engama-6 000 waxhasa abaphakamisi bolongamo lwakhe uya kuthi ngokunoloyiso aqinisekise ukuphumela okukhuselekileyo kwamaNgqina kwincopho yale “mihla yokugqibela” nokungena kuLungelelwaniso Olutsha, konke oko ukuze athethelelwe ngonaphakade.—2 Timoti 3:1; ISityhilelo 7:9-12; 21:1-5.
Sinale ntembelo nokholo kuThixo wethu, uYehova, yintoni esizimisele kuyo? Kaloku, sinesigqibo sokuhlala sihambela phambili ngenkalipho njengentlangano kaYehova yenkulungwane yama-20 yabagcini bengqibelelo!
[Ibhokisi ekwiphepha 29]
Oko Kuye Kwathethwa Ngabanye
Umphathi wamapolisa, waseLeeds, eNgilani uthi: “Ndithanda ukunincoma nina, abantu benu, nabo bonke abantu benu abezileyo . . . ngendlela egqibeleleyo okwathi oku kwacetywa kwaze kwaqhutywa ngayo. Ndinincoma xa ninonke. Ndaye ndatyelela ibala lemidlalo ngenjikalanga yangoMgqibelo nakusasa ngeCawa ndaza ndafumana imekobume nokwakuqhubeka kungawona mava ahlaziya gqitha. Oogxa bam abaliqela baye bagqabaza ngendleia efanayo.”
Umbhali ongumhleli oyintloko wephephandaba laseMontreal, eKhanada, phantsi komxholo othi “Masibonakalise umoya omhle kubantu bakaYehova”: “Izolo elinye, kungaphelanga ziyure zimbini, babengene kwizindlu ezingama-800 000 kulo mmandla. Indlela yokuguqula kwegqiza okungokomoya, elisenokuthanda ukucaphukisa, kodwa eneneni elingesiso isikruqukruqu. . . . Xa usamkela iindwendwe kwikhaya lakho ayikukhathazi nakancinane into yokubanika ithuba. . . . Ngoko, kuthekani ukuba asilwamkeli ukholo lwamaNgqina kaYehova; ngeentsuku nje ezimbalwa, besingacaphula nje intwana yokuzola kwawo, ibe besingakuva kusilungele oko. Aba bantu banoxolo baye banyula ukuhlangana eMontreal; makuze abangakumbi babo, amashumi angamawaka abo.”
Igosa lamapolisa eDortmund, kwelaseNtshona Jamani lathi: ‘Kwiminyhadala yeembaleki apha ubuncinane siba namapolisa angama-200 asemsebenzini; kwiintlanganiso zenu sifuna nje amabini, namanye amabini ukuba ayalele izithuthi.’
Umphathi webala lomdlalo webhola eNorwich, eNgilani wathi: “Imekobume yoxolo ebudeni beentsuku ezine . . . inomtsalane. Uba namava enzolo yobuqu eyahluke ngokupheleleyo kuyo nayiphi na enye yeentsuku ezine kwihlabathi lezoshishino elixinekileyo nakubomi bamihla le obusijikelezileyo. AmaNgqina ngokwenene anento awahluke ngayo nekunzima ukuyicacisa.”
[Ibhokisi ekwiphepha 30]
Indibano YaseMontreal—Iyinto Ekhethekileyo!
Koko kwakuqulethwe lucwangciso, iNdibano Yesithili “Yabagcini Bengqibelelo” eyayiqhutyelwa kwiBala lemidlalo elikhulu nelidumileyo leOlympic eMontreal, eQuebec, eKhanada, yayinjengazo zonke ezinye ezikolu ngcelele. Kodwa ngeendlela ezithile yayikhethekile. Phakathi kwezinye izinto, yayiyeyokuqala kweli qela leendibano eyayiza kuba yekhethekileyo ngobukhulu okanye ngezinye lindlela.
Ubukhulu: Isimbuku sama-78 804 sahlanganisana kwimpuma yelaseKhanada nakumntlampuma welaseUnited States. Kwakusomelez’ ukholo ukuba yinxalenye yeendimbane ezinjalo zabagcini bengqibeleio ezaziphulaphule, zivuma. yaye zithandaza kunye. Kwakuyinto ekhethekileyo oko!
Ubhaptizo: Kwakuluvuyo olukhethekileyo ukubona i-1 004 lababesandul’ ukuzahlulela besima ukuze babhaptizwe. Nabu ke ubungqina obubonakalayo bokukhula okuqhubekayo ngoku phakathi kwethu.
Iilwimi: Kwakukho ucwangciso olungeelwimi ezili-11—isiArabhi, isiTshayina, IsiNgesi, isiFrentshi, isiGrike, isiHungari, isiTaliyane, isiKorea, isiPhuthukezi, iSpanish nesiUkrainian. Kumbindi webala lemidlalo, isixhobo esikhetheklleyo selizwi salungiselelwa ngendlela yokuba abo bakwicandelo lesiFrentshi baphulaphule ngolwimi lwabo ngoxa abaphulaphula IsiNgesi babemamele olwabo.
Isixeko Esasizaliswe Ziikharavan: Le yayiyenye imbalasane ekhethekileyo. Ukuze kwamkelwe abantu ababefuna isithuba seekharavan, iinqwelo-mafutha zokuzonwabisa neentente, ngoDisemba we-1984 kwaqaliswa ukwenziwa kwemigudu ukuze kusetyenziswe iMaisonneuve Park ekufuphi, phesheya nje kwesitrato ukusuka kwibala lemidlalo. Xa kwathi kwathethwa okokuqala neziphatha-mandla mayela nentlawulo yale paki, ngokuqondakalayo zaye zahleka. Ngapha koko, ukuhlawulelwa kwepaki yonke yesixeko akuzange kwenziwe ngaphambill. Noko ke, ekugqibeleni yanikelwa imvume. Ludumo oluhle lwamaNgqina kaYehova olwancedayo.
Ekugqibeleni, kwafakwa iikharavan ezingama-4 300 ibe phantse ama-20 000 abo babeze endibanweni amkelelwa kwingca emfumamfuma phakathi komthunzi onabileyo wemithi. Yabanjani ke imeko yepaki emva kokuba isetyenziswe ngabantu abaninzi kangako kangangeveki? Iziphatha-mandla ezamangaliswayo azizange zifumanise monakalo ungako naphi na. Ngenxa yoko, sonke isixa esifakwa kwangaphambili somonakalo esiyinxalenye esisihlanu sabuyiswa!
Amalungu EQumrhu Elilawulayo Ayekho: Le nkalo ibalaseleyo nayo yayenza indibano yaseMontreal yaba yekhethekileyo. Ngoxa abantu bakaYehova beluphepha lonke unqulo lwezidalwa, ngokungathandabuzekiyo abaninzi bavakalelwa ngendlela efanayo nomnye umzalwana owathi ngokunoxabiso: “Ubukho bamalungu asixhenxe eQumrhu Elilawulayo elithandekayo, bambi babo endandingazange ndibabone okanye ndibeve benikela intetho ngaphambili, kwakukhuthaza gqitha.” Unxulumano olunjalo luphumela “ekuvuselelaneni,” ngokomoya.—Roma 1:11, 12.
Ukwamkeleka Okuhle: Iziphatha-mandla nabantu ngokubanzi zaqhubana namaNgqina kaYehova ngendlela encomekayo nangengqondo entle. Oku kwaba kokukhethekileyo xa kukhunjulwa into yokuba kwiminyaka nje engephi eyadlulayo owayesakuba ylNkulumbuso yaseQuebec uMaurice Duplessls wavakalisa ekuhleni “Imfazwe engenanceba kumangqina kaYehova” de angabi sabakho. Ngoko, ngesizathu esilungileyo, omnye unondaba wephephancwadi wathi: “Khawufan’ ucinge, izolo [ngoLwesihlanu] bekukho kanye amaNgqina angama-74 846 phakathi kwibala lemidlalo! UMaurice Duplessls, owayelivale umlomo eli butho, makube wayengazolanga kwingcwaba lakhe.”
Eli yayingeloxesha lokuqala uYehova aye wabasikelela ngalo ngokuyintabalala abagcini bengqibeleio. Noko ke, ngeendlela ezininzi indibano yaseMontreal yayiyinto ekhethekileyo.
[Itshati ekwiphepha 28]
Ezinye Zeendibano “Zabagcini Bengqibelelo”
Ilizwe Iindibano Abezileyo Ababhaptiziweyo
EOstriya 3 23 123 237
EBrazil 25 389 387 4 825
KwiBritish Isles 10 142 859 925
EKhanada 14 146 897 1 585
E-Ecuador 4 22 918 394
EFransi 11 119 940 2 002
KwiNtshona Jamani 17 148 853 904
EGrisi 3 37 337 368
EItali 25 184 078 4 153
EJapan 25 202 221 3 512
ENetherlands 1 40 694 151
EPortugal 10 52 581 990
ESpayin 13 90 808 1 628
ESweden 8 27 194 315
ESwitzerland 3 20 601 213
EUnited States of America 112 1 189 173 9 851
EVenezuela 4 69 843 1 063
[Imifanekiso ekwiphepha 31]
EMontreal, uW. L. Barry weQumrhu Elilawulayo wakhupha incwadi entsha enomtsalane ethi “Life—How Did It Get Here? By Evolution or by Creation?”
Ikhondo lokugcin’ ingqibelelo likaYobhi labalaseliswa kulo mdlalo weBhayibhile, owaqhubeka kwindibano yaseAthens, eGrisi