“Nilulwele Nzima Ukholo”!

“Nilulwele nzima ukholo olwanikelwa kwaba kanye okwexesha lonke kwabo bangcwele.”—YUDE 3.

1. Namhlanje amaKristu okwenyaniso asemfazweni ngayiphi ingqiqo?

AMAJONI asedabini asoloko ephila ubomi obunzima. Khawucinge nje ngokuthwala bonke obo buxhakaxhaka bezixhobo zemfazwe uze uthwabaze ngezikaTshiwo iikhilomitha ezininzi enoba injani na imozulu, uqeqeshwa kabuhlungu ukuze ukwazi ukusebenzisa izixhobo, okanye kufuneka uzikhusele kuzo zonke iintlobo zogonyamelo ezisongela ubomi nempilo yakho. Noko ke, amaKristu okwenyaniso akalwi kwiimfazwe zeentlanga. (Isaya 2:2-4; Yohane 17:14) Ukanti, singaze silibale ukuba ngangqiqo ithile sonke sisedabini. USathana umthiy’ egazini uYesu Kristu nabalandeli bakhe abasemhlabeni. (ISityhilelo 12:17) Ngokungathi kunjalo, bonke abagqiba kwelokuba bakhonze uYehova uThixo bangenela umkhosi olwa imfazwe yokomoya.—2 Korinte 10:4.

2. UYude uyichaza njani imfazwe yamaKristu, ibe incwadi yakhe inokusinceda njani siyinyamezele?

² Ngokufanelekileyo, umninawa kaYesu ngonina uYude ubhala esithi: “Zintanda, nakuba bendisenza wonke umgudu wokunibhalela ngalo usindiso esabelana ngalo, ndikufumanise kuyimfuneko ukunibhalela ndinibongoza ukuba nilulwele nzima ukholo olwanikelwa kwaba kanye okwexesha lonke kwabo bangcwele.” (Yude 3) Xa uYude ebongoza amaKristu ukuba ‘alulwele nzima ukholo,’ usebenzisa ibinzana elisondeleyo kwelithetha “intuthumbo.” Ewe, eli dabi linokuba nzima, de lithuthumbise! Ngaba maxa wambi ukufumanisa kunzima ukunyamezela kule mfazwe? Incwadi kaYude emfutshane kodwa enamandla inokusinceda. Iyasibongoza ukuba sixhathise ukuziphatha okubi, sihlonele igunya elimiselwe nguThixo, yaye sizigcine kuthando lukaThixo. Makhe sibone indlela yokusebenzisa esi siluleko.

Xhathisa Ukuziphatha Okubi

3. Yiyiphi imeko engaginyisi mathe elalijamelene nayo ibandla lamaKristu ngomhla kaYude?

³ UYude wayiphawula into yokuba asingawo onke amaKristu akhonza nawo aphumelelayo kwimfazwe nxamnye noSathana. Umhlambi wawukwimo engaginyisi mathe. UYude ubhala esithi amadoda athile awonakeleyo ‘ayethwethwele ngaphakathi.’ La madoda ayekhuthaza ukuziphatha okubi ngendlela engaqondakaliyo. Yaye ayesebenzisa amaqhinga xa esenza izinto, “ebujika ububele obungasifanelanga boThixo wethu bube sisingxengxezo sehambo evakalala.” (Yude 4) Mhlawumbi, njengamaGnostiki amandulo, ayeqiqa ngelithi okukhona ubani esona ngakumbi kokukhona eya kufumana ufefe lukaThixo—lilonke, kwakubhetele ukona kakhulu! Okanye ke ayecinga ukuba uThixo onobubele wayengayi kuwohlwaya. Enoba kwakutheni na, ayewuphosile umhlola.—1 Korinte 3:19.

4. UYude ucaphula yiphi imizekelo emithathu yemigwebo kaYehova yexesha elidluleyo echazwa ziZibhalo?

⁴ UYude uphikisa iingcamango zawo ezingendawo ngokucaphula umizekelo emithathu yemigwebo kaYehova yamandulo: umgwebo owawunxamnye namaSirayeli ‘awayengabonisi lukholo’; onxamnye ‘neengelosi ezashiya indawo yazo efanelekileyo yokuhlala’ ukuze zone namabhinqa; nowawunxamnye nabemi baseSodom naseGomora, ‘ababehenyuze ngokugqithiseleyo baza balandela inyama ngokuchasene nemvelo.’ (Yude 5-7; Genesis 6:2-4; 19:4-25; Numeri 14:35) Kwimeko nganye uYehova uye wabagweba qatha aboni.

5. UYude ucaphula wuphi umprofeti wamandulo, yaye eso siprofeto saziqinisekisa njani ukuba sasiya kuzaliseka?

⁵ Kamva, uYude ubhekisela kumgwebo omkhulu ngakumbi. Ucaphula isiprofeto sikaEnoki—indinyana engafunyanwa kwenye indawo kwiZibhalo eziphefumlelweyo.a (Yude 14, 15) UEnoki waxela kwangaphambili ngexesha uYehova awayeya kugweba ngalo bonke abangahloneli Thixo kunye nezenzo zabo. Okubangel’ umdla kukuba, uEnoki wathetha esebenzisa ixesha elidluleyo, kuba imigwebo kaThixo yayiqiniseke ngokungathi yayisele iphunyeziwe. Kusenokwenzeka ukuba abantu babemgculela uEnoki yaye kamva noNowa, kodwa bonke abo banyelisi barhaxwa ngamanzi kuNogumbe wehlabathi lonke.

6. (a) AmaKristu omhla kaYude ayefuna ukukhunjuzwa ngantoni? (b) Kutheni sifanele sizithabathe nzulu izinto uYude asikhumbuza ngazo?

⁶ Kwakutheni ukuze uYude abhale ngale migwebo kaThixo? Kungokuba wayesazi ukuba abanye ababenxulumene nebandla lamaKristu ngomhla wakhe babesenza kanye izono ezinyhukunyhuku nezilizothe ezazibangele ukuba kuphunyezwe loo migwebo. Ngaloo ndlela, uYude ubhala ngenjongo yokukhumbuza amabandla ngezinye iinyaniso ezisisiseko. (Yude 5) Kuyabonakala ukuba ayelibele ukuba uYehova uThixo wayeyibona into awayeyenza. Ewe, xa abakhonzi bakhe bevukela imithetho yakhe ngabom, bezingcolisa baze badyobhe nabanye, uyabona. (IMizekeliso 15:3) Izenzo ezinjalo zimenza buhlungu gqitha. (Genesis 6:6; INdumiso 78:40) Kuyingcamango eyothusayo ukuthi kanti abantu abaqhelekileyo banokuzichukumisa iimvakalelo zeNkosi enguMongami wendalo iphela. Uyasibona imihla ngemihla, ibe xa sisenza konke okusemandleni ethu ukulandela emanyathelweni oNyana wakhe, uYesu Kristu, ihambo yethu iyenza igcobe intliziyo yakhe. Ngoko ke, singaze sizigatye izinto uYude asikhumbuza ngazo kodwa masizithabathe nzulu.—IMizekeliso 27:11; 1 Petros 2:21.

7. (a) Kutheni kubalulekile ukuba abo babandakanyeke ekwenzeni okuphosakeleyo bafune uncedo ngokukhawuleza? (b) Sinokukuphepha njani sonke ukuziphatha okubi?

⁷ UYehova akaneli kubona nje aze asong’ izandla. Ekubeni enguThixo wokusesikweni, uyabohlwaya abenzi bobubi—ngexesha lakhe elifanelekileyo. (1 Timoti 5:24) Abo baqiqa ngelithi imigwebo yakhe zizinto zexesha elidluleyo nokuba akabukhathalele ubungendawo ababenzayo bazibetha ngemf’ iphindiwe. Hayi indlela ekubaluleke ngayo kuye nabani na namhlanje obandakanyeke ekuziphatheni okubi ukuba acele uncedo ngokukhawuleza kubadala abangamaKristu! (Yakobi 5:14, 15) Isisongelo esiziswa kukuziphatha okubi sinokusenza sonke sithi qwa kweli lethu idabi lokomoya. Minyaka le kubakho iingxwelerha—abantu abagxothwayo phakathi kwethu, inkoliso yabo engaguqukiyo ekuziphatheni okubi. Simele sibhinq’ omfutshane sixhathise nasiphi na isihendo esiqalisa ukusirhwebeshela kwelo cala.—Thelekisa uMateyu 26:41.

Hlonela Igunya Elimiselwe NguThixo

8. Yayingoobani “abo bazukileyo” abakhankanywe kuYude 8?

⁸ Enye ingxaki athetha ngayo uYude kukungabi nantlonelo ngegunya elimiselwe nguThixo. Ngokomzekelo, kwindinyana 8 utyhola kwala madoda angendawo ‘ngokuthetha ngokutshabhisayo ngabo bazukileyo.’ Yayingoobani “abo bazukileyo”? Yayingabantu abangafezekanga, kodwa ababenikwe imbopheleleko nguYehova esebenzisa umoya oyingcwele. Ngokomzekelo, amabandla ayenabadala ababenembopheleleko yokwalusa umhlambi kaThixo. (1 Petros 5:2) Ibe kwakukho nabaveleli abahambahambayo, abanjengompostile uPawulos. Yaye iqumrhu labadala elaliseYerusalem lalisebenza njengequmrhu elilawulayo, lisenza izigqibo ezichaphazela ibandla lamaKristu liphela. (IZenzo 15:6) UYude yayimxhalabisa ngokwenene into yokuba abathile emabandleni babethetha ngokutshabhisayo, okanye benyelisa, loo madoda.

9. Yiyiphi imizekelo yokungahloneli igunya ecatshulwa nguYude?

⁹ Ukuze akhalimele ezo ntetho zingabonakalisi ntlonelo, kwindinyana 11 uYude ucaphula imizekelo emithathu eyongezelelekileyo njengesikhumbuzo: uKayin, uBhalam noKora. UKayin wasityeshela isiluleko sothando sikaYehova waza ngabom wafukama intiyo eyakhokelela ekubulaleni. (Genesis 4:4-8) UBhalam wayefumene udederhu lwezilumkiso ngaphandle kwamathandabuzo ezazivela kumthombo onamandla angaphaya kwawemvelo—kwanemazi yedonki yakhe yamxelela ngale nto! Kodwa ngokuzingca uBhalam waqin’ enyaleni esenzela abantu bakaThixo amayelenqe. (Numeri 22:28, 32-34; Duteronomi 23:5) UKora wayenesikhundla sakhe seembopheleleko, kodwa wafun’ ukunyuka nengalo. Waxhaya imvukelo nxamnye neyona ndoda ilulamileyo emhlabeni, uMoses.—Numeri 12:3; 16:1-3, 32.

10. Namhlanje abanye banokuwela njani kumgibe ‘wokuthetha ngokutshabhisayo ngabo bazukileyo,’ ibe kutheni sifanele siziphephe iintetho ezinjalo?

¹⁰ Hayi indlela le mizekelo esifundisa ngokucace ngayo ukuba siphulaphule isiluleko yaye sihlonele abo basetyenziswa nguYehova kwizikhundla zembopheleleko! (Hebhere 13:17) Kulula gqitha ukubona iziphako kubadala abamiselweyo, ekubeni sonke singafezekanga. Kodwa ukuba sihlalele ukujonga iziphako zabo size singabahloneli, ngaba besingayi kuba ‘sithetha ngokutshabhisayo ngabo bazukileyo’? Kwindinyana 10, uYude ukhankanya abo “bathetha ngokutshabhisayo ngazo zonke izinto ngokwenene abangazaziyo.” Maxa wambi, bambi baye basigxeke kanobom isigqibo elifikelele kuso iqumrhu labadala okanye ikomiti egwebayo. Ukanti, abazi nowathwethwa ngeenkcukacha ezipheleleyo ekuye kwafuneka abadala baziqwalasele ukuze bafikelele kweso sigqibo. Ngoko kutheni bethetha ngokutshabhisayo ngezinto ngokwenene abangazaziyo? (IMizekeliso 18:13) Abo baqhubeka benyemba ngolo hlobo banokudala iyantlukwano ebandleni baze mhlawumbi bade bafaniswe ‘nolwalwa olufihlakele phantsi kwamanzi’ kwiintlanganiso zamanye amakholwa. (Yude 12, 16, 19) Asifanele sonakalise impilontle yokomoya yabanye. Kunoko, sonke masizimisele ukuwaxabisa amadoda anembopheleleko ngenxa yokuzibhokoxa nokuzinikela kwawo kumhlambi kaThixo.—1 Timoti 5:17.

11. Kwakutheni ukuze uMikayeli angamgwebi ngokumtshabhisa uSathana?

¹¹ UYude ucaphula umzekelo womntu owalinika intlonelo efanelekileyo igunya elimiselweyo. Uyabhala: “Xa uMikayeli isiphatha-zingelosi wayeneyantlukwano noMtyholi yaye ephikisana naye ngomzimba kaMoses, akazange abe nobuganga bokuzisa umgwebo ngokunxamnye naye ngamazwi okutshabhisa, kodwa wathi: ‘Ngamana uYehova angakukhalimela.’” (Yude 9) Le ngxelo ichukumisayo, ebhalwe nguYude kuphela kwiZibhalo eziphefumlelweyo, isifundisa izifundo ezibini ezahlukeneyo. Okokuqala, isifundisa ukuba siyekele ukugweba kuYehova. Kuyabonakala ukuba uSathana wayefuna ukuwusebenzisa kakubi umzimba wendoda ethembekileyo uMoses ukuze akhuthaze unqulo lobuxoki. Qotha-qikili lakwabani! Sekunjalo, ngokuzithoba uMikayeli akazange amgwebe, kuba nguYehova kuphela owayenelo gunya. Ngoko, usenokuyithelekelela indlela esimele sikuphephe ngayo ukuwagweba amadoda athembekileyo azama ukukhonza uYehova.

12. Yintoni enokufundwa ngabo bakwizikhundla zembopheleleko ebandleni lamaKristu kumzekelo kaMikayeli?

¹² Kwelinye icala, nabo banomlinganiselo othile wegunya ebandleni banokufunda okuthile kuMikayeli. Ngapha koko, nangona uMikayeli ‘wayesisiphatha-zingelosi,’ inkumanda yazo zonke iingelosi, akazange asisebenzise kakubi isikhundla sakhe segunya, kwanaxa wayephethwe emanyeni. Abadala abathembekileyo bawulandela ngokusondeleyo loo mzekelo, beqonda ukuba ukulisebenzisa kakubi igunya labo kukungaluhloneli ulongamo lukaYehova. Kuninzi okuthethwa yincwadi kaYude ngamadoda athile awayenezikhundla zembopheleleko ebandleni, suke alisebenzisa kakubi igunya lawo. Ngokomzekelo, kwindinyana 12 ukusa kweye-14, uYude ubagxeka kabukhali aba “balusi abazondla ngaphandle koloyiko.” (Thelekisa uHezekile 34:7-10.) Ngamany’ amazwi, babexhalabele iingenelo yabo, kungekhona eyomhlambi kaYehova. Namhlanje abadala banokufunda lukhulu kule mizekelo mibi kangaka. Ngokwenene, la mazwi kaYude asakhela umfanekiso-ngqondweni woko singamele kuba kuko. Xa sivumela ukuzingca kusoyise, asinakuba ngamajoni kaKristu; kuba kaloku sithe phithi kukulwela iziqu zethu. Kunoko, sonke masiphile ngokuvisisana namazwi kaYesu athi: “Kukho uyolo olungakumbi ekupheni kunokuba lukho ekwamkeleni.”—IZenzo 20:35.

“Zigcineni Kuthando LukaThixo”

13. Kutheni sonke sifanele sibe nomnqweno osuk’ entliziyweni wokuzigcina kuthando lukaThixo?

¹³ Ngasemqukumbelweni wencwadi yakhe, uYude unikela esi siluleko sihlab’ umxhelo: “Zigcineni kuthando lukaThixo.” (Yude 21) Ayikho into enokusinceda silwe imfazwe yamaKristu ngaphandle kwale nto inye, ukuhlala sithandeka emehlweni kaYehova uThixo. Ngapha koko, uthando lolona phawu lubalaseleyo lukaYehova. (1 Yohane 4:8) UPawulos wabhalela amaKristu aseRoma esithi: “Ndeyisekile kukuba kwanokufa nobomi neengelosi noorhulumente nezinto ezilapha ngoku nezinto eziza kuza namandla nomphakamo nobunzulu naso nasiphi na esinye isidalwa aziyi kuba nako ukusahlula eluthandweni lukaThixo olukuye uKristu Yesu iNkosi yethu.” (Roma 8:38, 39) Ngoko ke, sinokuzigcina njani kolo thando? Phawula la manyathelo mathathu esinokuwathabatha, ngokutsho kukaYude.

14, 15. (a) Kuthetha ukuthini ukwakha kukholo lwethu “olulolona lungcwele”? (b) Sinokuyihlola njani imeko yesikrweqe sethu sokomoya?

¹⁴ Okokuqala, uYude usixelela ukuba siqhubeke sizakhela ‘kukholo lwethu olulolona lungcwele.’ (Yude 20) Njengoko siye sabona kwinqaku elandulelayo, oku kumele kwenziwe ngokuqhubekayo. Sifana nezakhiwo ezifuna ukunqatyiswa ngakumbi nangakumbi nxamnye nezivondoviya eziya ziqatsela ngamandla. (Thelekisa uMateyu 7:24, 25.) Ngoko masingazithembi ngokugqithiseleyo. Kunoko, masikhangele iinkalo esinokuthi sakhe ngazo phezu kwesiseko sokholo lwethu, sibe ngamajoni awomelele nathembeke ngakumbi kaKristu. Ngokomzekelo, sisenokuhlola izinto eziyila isikrweqe sokomoya esichazwe kweyabase-Efese 6:11-18.

¹⁵ Sinjani isikrweqe sethu sokomoya? Ngaba ‘ikhaka lethu elikhulu lokholo’ lomelele ngendlela elifanele lomelele ngayo? Xa sijonga emva kwiminyaka yakutshanje, ngaba sibona iimpawu zokuphola, ezinjengokungayi rhoqo ezintlanganisweni, ukungabi nanzondelelo kubulungiseleli, okanye ukuphela komdla wofundisiso lobuqu? Ezo mpawu ziyingozi! Kufuneka siwathabathe ngoku amanyathelo okuzakha nokuzomeleza enyanisweni.—1 Timoti 4:15; 2 Timoti 4:2; Hebhere 10:24, 25.

16. Kuthetha ukuthini ukuthandaza sinomoya oyingcwele, kwaye yintoni esifanele siyicele rhoqo kuYehova?

¹⁶ Indlela yesibini yokuzigcina kuthando lukaThixo kukuqhubeka ‘sithandaza sinomoya oyingcwele.’ (Yude 20) Oku kuthetha ukuthandaza phantsi kwempembelelo yomoya kaYehova nangokuvisisana neLizwi lakhe eliphefumlelwe ngumoya. Umthandazo yindlela ebalulekileyo yokusondela kuYehova ngokobuqu neyokubonakalisa ukuzinikela kuye. Singaze silityeshele eli lungelo limangalisayo! Yaye xa sithandaza, sisenokucela—eneneni, sisenokuqhubeka sicela—umoya oyingcwele. (Luka 11:13) Ungawona mandla makhulu esinokuwafumana. Ngoncedo lwawo, sinokuhlala sizigcine kuthando lukaThixo size sinyamezele njengamajoni kaKristu.

17. (a) Kutheni umzekelo kaYude wenceba ubalasele kangaka? (b) Ngamnye wethu unokuqhubeka njani ebonakalisa inceba?

¹⁷ Okwesithathu, uYude usibongoza ukuba siqhubeke sibonakalisa inceba. (Yude 22) Umzekelo wakhe siqu ubalasele kulo mba. Kaloku, ngesizathu esiqondakalayo, kwamphazamisa ukonakala, ukuziphatha okubi nowexuko olwaluthwethwela ebandleni lamaKristu. Sekunjalo, akazange aphakuzele, ecinga ukuba kwakuyingozi gqitha ngelo xesha ukubonakalisa uphawu “oluthambe” njengenceba. Kunoko, wabongoza abazalwana bakhe ukuba baqhubeke bebonakalisa inceba nanini na kunokwenzeka, baqiqe ngobubele nabo banamathandabuzo yaye bade ‘babaxwile emlilweni’ abo bakhasela kwisono esinzulu. (Yude 23; Galati 6:1) Esinjani ukuba sihle isibongozo kubadala bala maxesha azaliswe ziinkathazo! Nabo bazabalazela ukubonakalisa inceba nanini na benesizathu sokwenjenjalo, ngoxa besiba ngqongqo xa kuyimfuneko. Nathi sonke sifanele ukubonakalisa inceba omnye komnye. Ngokomzekelo, kunokuba sibe nenqala ngezinto ezingabalulekanga, sinokuxolela ngesisa.—Kolose 3:13.

18. Sinokuqiniseka njani ukuba siyoyisa kwimfazwe yethu yokomoya?

¹⁸ Le mfazwe siyilwayo ayilula. Kunjengoko uYude esitsho, ‘ngumlo onzima.’ (Yude 3) Iintshaba zethu zinamandla. Asigcayiselwa nguSathana kuphela kodwa nehlabathi lakhe elingendawo kunye nokungafezeki kwethu zisifun’ esiqwini. Sekunjalo, sinokuqiniseka ngokupheleleyo ukuba siza koyisa! Ngoba? Ngenxa yokuba sikwicala likaYehova. UYude uqukumbela incwadi yakhe ngokusikhumbuza ukuba uYehova ulufanele ‘uzuko, ubungangamsha, amandla negunya kususela kuwo onke amaphakade adluleyo nangoku nakuwo onke amaphakade.’ (Yude 25) Ngaba leyo asiyongcamango ebangela uloyiko? Ngoko, ngaba usekho umntu othandabuzayo ukuba uThixo ‘uyakwazi ukunilinda ekukhubekeni nokunimisa’? (Yude 24) Ngokuqinisekileyo akakho! Ngamnye wethu makazimisele ukuqhubeka exhathisa ukuziphatha okubi, ehlonela amagunya amiselwe nguThixo kwaye azigcine kuthando lukaThixo. Ngaloo ndlela, siya kufumana uloyiso oluzukileyo sikunye.

[Imibhalo esemazantsi]

Imibuzo Yempinda

◻ Incwadi kaYude isifundisa njani ukuba sixhathise ukuziphatha okubi?

◻ Kutheni kubaluleke kangaka ukuhlonela igunya elimiselwe nguThixo?

◻ Yintoni le inzulu kangaka ekusebenziseni kakubi igunya ebandleni?

◻ Sinokukusebenzela njani ukuzigcina kuthando lukaThixo?

[Umfanekiso okwiphepha 15]

Ngokungafaniyo namajoni angamaRoma, amaKristu alwa imfazwe yokomoya

[Umfanekiso okwiphepha 18]

Abalusi abangamaKristu abakhonzi ngenxa yokuzingca, kodwa bakhonza ngenxa yothando